Anai lĕ sa amăng hơdôm hơdră dưm kơnar bơnai hăng rơkơi hăng pơsir hơdôm tơlơi kiăng hloh hăng đah kơmơi hăng čơđai muai.

Să Trường Sơn, tơring glông Quảng Ninh, tơring čar Quảng Bình lĕ sa amăng 8 bôh să dưi hmâo Khul pơlir hơbit đah kơmơi Việt Nam ruah ngă anih pơphô hlâo amăng đơ đam dêh čar pok pơhai Rơwang bruă 8. Ƀơi anai, hơdră Grŭp lăi pơhing plơi dưi pơdŏng laih hăng 10 čô mơnuih. Grŭp hmâo bruă lăi pơhing, pơsur mơnuih ƀôn sang pơplih tơlơi pơmin, hơdră ngă amăng bruă đang hmua, pơđĭ kyar bơwih ƀong, sut lui hơdôm tơlơi kah pha mơnuih amăng sang anô̆ hăng plơi pla, hơdôm phiăn juăt sô hơđăp, ƀu tŭ yua klă. Yă Hồ Thị Thư, plơi Đá Chát, să Trường Sơn, tơring glông Quảng Ninh, tơring čar Quảng Bình brơi thâo, hlâo adih, kiăng pơanur rơkơi brơi kơ ñu gum hrŏm hơdôm bruă mă mơnuih mơnam lĕ tơlơi ƀu amuñ ôh. Khă hnun hai, mơ̆ng hrơi hmâo hơdôm bruă mă mơ̆ng grŭp lăi pơhing plơi, rơkơi ñu hmâo lu tơlơi pơplih rơđah amăng tơlơi pơmin hăng bruă ngă. Rơkơi ñu thâo gum djru bruă amăng sang pioh ñu hmâo dong mông mă bruă mơnuih mơnam ƀơi plơi:

“Tơdơi anai kâo amra pơphun jơnum mơnuih ƀôn sang lăi pơhing tơlơi dưm kơnar bơnai hăng rơkơi. Bơhmutu ñu hăng đah rơkơi lĕ kiăng ngă hăng gum djru hơdôm bruă mă hơget kơ bơnai pô, kơ ană pô dưm kơnar hăng gêh gal amăng sang anô̆. Tơdah rơkơi ƀu thâo hluh laih anun lăi hne adih kơ bơnai, ngă tơnap kơ bơnai, samơ̆ tơdah pô dưi hrăm hluai tui tơlơi dưm kơnar bơnai hăng rơkơi amra hmâo bôh tŭ yua kơ drơi pô rah hăng kơ mơnuih mơnam rah. Drơi pô kâo amra lăi brơi neh wa thâo hluh, biă ñu ƀing hnưr thun hlăk ai”.

Ƀu djơ̆ kơnong kơ amai Thư ôh mơ̆, lu đah kơmơi ƀơi să Trường Sơn ăt gum djru mơn, lơm gum hrŏm hơdôm mông lăi pơhing mơ̆ng grŭp pôr pơhing plơi ƀơi plơi, lu ƀing rơkơi hmâo laih tơlơi pơplih, thâo gum djru bruă sang sui hăng anai pơmin kơnong kơ đah kơmơi đôč mă. Lu tơlơi juăt sô hơđăp ƀơƀrư̆ lŏm lui, ba glăi tơlơi hơđong kơ sang anô̆ hăng plơi pla. Ăt ƀơi să guai dêh čar anai mơn, Khul pơlir hơbit đah kơmơi tơring čar lăi pơthâo hơdôm hơdră anih anom đăo kơnang, pơhrăm kơ tơlơi dưm kơnar bơnai hăng rơkơi ƀơi dua bôh plơi hăng hơdră Khul khua mua mơ̆ng tơlơi pơplih ƀơi Sang hră gưl 2 đom lom djop djuai aniă ƀiă Trường Sơn; Hrŏm hăng anun, ƀơi gưl să ăt pơjing mơn 6 grŭp hyu lăi pơhing plơi ƀơi 6 bôh plơi. Yă Dương Thị Hồng Chuyên, Khua Khul pơlir hơbit đah kơmơi tơring glông Quảng Ninh, tơring čar Quảng Bình brơi thâo, hluai tui hơdôm “Grŭp hyu lăi pơhing plơi” hmâo lăi pơhing truh neh wa djuai ania Bru-Vân Kiều kơ bôh thâo, kah hăng: Tơlơi phiăn dưm kơnar bơnai hăng rơkơi; phiăn juăt amăng bruă sang; Pơgang pơgăn tơlơi dô̆ rơkơi bơnai mơ̆ng muai hăng pơdô̆ rơkơi bơnai giăm drah kơtak; Hơdôm tơlơi pơhing hăng bôh thâo kiăng hloh pioh djru hmao tlôn hơdôm tơlơi truh taih amang amăng sang anô̆:

  “Pơ̆ anăp anai, Khul pơlir hơbit đah kơmơi tơring glông amra gum hrŏm hăng khul đah kơmơi să dong pioh črâo ba, pơphun bruă ngă hơdră grŭp lăi pơhing plơi ba glăi bôh tơhnal klă. Biă ñu khul amra đing nao amăng bruă pơhrăm, pơđĭ tui bôh thâo kơ tơlơi dưm kơnar bơnai hăng rơkơi, pơdŏng sang anô̆ yâo mơ-ak”.

Hrŏm hăng bruă lăi pơhing hơdôm grŭp lăi pơhing plơi dô̆ pơsur, pơtrut mơnuih ƀôn sang gum hrŏm Rơwang bruă pha ra lĕ đah rơkơi amra gum djru, glăm ba bruă sang, djru ngă giong hơdôm bruă jao mơ̆ Jơlan hơdră pơkă mơ̆ng lŏn ia pơđĭ kyar bơwih ƀong mơnuih mơnam kual neh wa djuai ania ƀiă hăng kual čư̆ siăng hmâo ba tơbiă. Yă Nguyễn Thị Kim Dung, Khua Grŭp pơtô juăt bruă Ping gah, Khul pơlir hơbit đah kơmơi Việt Nam brơi thâo, hơdră “Grŭp lăi pơhing plơi”gah Rơwang bruă ngă tui tơlơi dưm kơnar bơnai hăng rơkơi hăng pơsir hơdôm tơlơi kiăng hloh hăng đah kơmơi, čơđai muai yua kơ Khul pơlir hơbit đah kơmơi Việt Nam git gai hmâo djru laih 120 čô adơi amai să Trường Sơn, tơring glông Quảng Ninh dưi tŭ mă hơdôm bôh thâo kơ dưm kơnar bơnai hăng rơkơi, lŏm lui hơdôm phiăn juăt sô hơđăp hăng amăng ƀrư̆ pơđĭ tui pran gơgrong mơ̆ng đah kơmơi amăng sang anô̆, mơnuih mơnam:

“Rơwang ataih nao rai bơnai hăng rơkơi hăng tơlơi kah pha bơnai hăng rơkơi ăt dô̆ mơn amăng plơi pla hăng biă ñu neh wa djuai ania ƀiă. Yua anun, bơhmu hăng hơnong ñu hrŏm gah tơlơi pơmin ăt kah hăng tơlơi hơdip mơda bơwih ƀong mơnuih mơnam mơ̆ng neh wa djuai aniă glăk dô̆ mơn rơwang kah nao rai bơnai hăng rơkơi. Ƀing gơmơi ăt čang rơmang mơn pơđĭ tui tơlơi pơmin pioh gơñu pơplih, lŏm lui hơdôm tơlơi kah pha, sut lui anô̆ ngă gun pioh gơñu dưi ngă, tơhnal mơ̆ ngă tui bruă pô, bôh thâo mơ̆ng pô”.

 Yap truh blan 5 thun anai, tơring čar Quảng Bình hmâo pơjing 32 grŭp lăi pơhing plơi, 6 Grŭp khua mua mơ̆ng tơlơi pơplih hăng 19 bôh anih anom đăo kơnang. Rơgao kơ bôh tơhnal ngă tui yak blung a amra ƀuh, hơdôm bruă mă mơ̆ng Rơwang bruă 8 dưi dăp hơdră hăng pok pơhai kiăo tui tơlơi kiăng pơsit jơlan gah mơ̆ng rơwang bruă, hmâo tơhnal abih bang rah, rơđah rah, sit nik, lăp djơ̆ hăng bôh nik, ba glăi tơlơi dưi kơ bơnai hăng čơđai muai ƀơi hơdôm anih anom dưi pok pơhai, djru pơđĭ tui tơlơi pơmin, pơplih tơlơi pơmin, bruă ngă./.