Să Trà Mai, tơring glông Nam Trà My, tơring čar Quảng Nam hơmâo 4 ƀut plơi pla hăng 14 kual ƀon lan. Đơ đam să hơmâo rơbêh 1.200 boh sang anŏ, rơbêh 5.000 čô mơnuih, amăng anun giăm 80% lĕ mơnuih djuai ania ƀiă. Rơbêh 2 thun laih rơgao, rơnoh prăk mơng hơdôm akŏ bruă gah jơlan hơdră tui hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng hơmâo djru brơi kual čư̆ siăng pơplih ƀô̆ mơta. 100% boh sang anŏ amăng să hơmâo apui lơtrik; djop sang hră amăng să đĭ hơnong pơkă dêh čar gưl I. Tơlơi hơdip kơ neh met wa kual čư̆ siăng pơplih tong ten, pơhrui rĭm akŏ mơnuih giăm 38 klăk/čô/thun. Ơi Nguyễn Thanh Út, mơnuih djuai ania Ca Dong, kơ-iăng Khua apăn bruă Ping gah să Trà Mai, tơring glông Nam Trà My brơi thâo, să juăt pơkiăo nao ƀing apăn bruă nao tơl plơi pla, djru brơi mơnuih ƀon sang pok pơhai tŭ yua hơdôm akŏ bruă gah jơlan hơdră tui hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng.

“Ƀing gơmơi jao bruă brơi ƀing apăn bruă lĕ ƀing mơnuih kiăo tui lăng tơl anih. Tơdah hơmâo tơlơi gun găn hơpă amra lăi pơthâo brơi Khul apăn bruă Ping gah să. Amăng khul apăn bruă amra pơčrông sai pơsir hĭ tơnap tap, tơlơi gun găn kiăng ngă tui. Hăng hơdôm khul grup ƀon lan rĭm thun lêng kơ hơmâo tơlơi črâo trun soh”.

Rơbêh 2 thun laih rơgao, Kơnuk kơna hơmâo lu hơdră bruă phrâo kiăng pơsir hĭ tơnap tap kơ bruă ngă hră pơ-ar, tơlơi phiăn amăng wai lăng, pơphun ngă tui Jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng. Samơ̆, ră anai ăt dŏ sa, dua boh tơhnal kiăng tŏ tui pơplih pơkra. Sit biă ñu, 10 akŏ bruă mơng jơlan hơdră tui hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng hơmâo lu akŏ bruă boh tơhnal giăm bơkơnar, tơnap pok pơhai. Kar hăng akŏ bruă 1: Pơsir hĭ bruă kơƀah lŏn mơnai, sang dŏ, lŏn ngă hmua, ia yua hăng Akŏ bruă 2: Dưm dăp man pơdong, pơhlôm hơđong brơi tơlơi hơdip mơnuih ƀon sang ƀơi hơdôm anih kiăng hloh…Hơmâo boh tơhnal, hơnong pơkă hăng ƀing mơnuih dưm kơnar. Lu ƀon lan rơkâo Kơnuk kơna pơplih pơkra, pơƀut glăi hơdôm akŏ bruă bơkơnar kiăng đing nao tuh pơ alin. Laih dong, hơmâo akŏ bruă lu anom bruă ngă hrŏm, lu boh tơhnal pơčut nao rai kơplah wah gưl tơring čar, tơring glông hăng să. Pơhmutu lĕ akŏ bruă 8: Ngă tui bruă bơkơnar đah rơkơi đah kơmơi hăng pơsir hĭ hơdôm bruă kiăng hloh hăng ƀing đah kơmơi hăng čơđai anet, hơmâo 3 anom bruă ngă hrŏm lĕ Khul đah kơmơi, Khul hlăk ai hăng anom bruă djuai ania. Mơnuih ƀon sang ha wŏt mă bruă hăng lu anom bruă ngă rơngiă hrơi mông, hăng ƀu ba glăi tŭ yua. Tui ơi Trần Duy Dũng, Khua Jơnum min mơnuih ƀôn sang tơring glông Nam Trà My, tơring čar Quảng Nam, mrô hră pơ-ar lu đơi, hơdôm boh tơhnal pơčut nao rai ngă ƀing apăn bruă gưl să tơnap tap biă mă, ba truh kơ bruă hŭi ngă soh lơm pok pơhai hơdôm akŏ bruă anai:

“Sa, dua čô mơnuih apăn bruă să lu wŏt pơđok hrăm pơ-ar aka ƀu tong ten, laih anun lu boh tơhnal amăng hră pơ-ar aka ƀu djơ̆ tơlơi sit nik, tơnap pok pơhai ngă tui. Tơring glông hơmâo hruă kjăp brơi ƀing apăn bruă gơgrong hăng pran thâo pơmĭn, khin ngă, amra glăm ba. Samơ̆, pran jua thâo pơmĭn khin ngă kiăng tui tơlơi pơkă mơ̆ ƀu djơ̆ ngă tui hluai ôh. Rơnuč thun ƀing gơmơi hluai tui mrô prăk kah trun kiăng kơ sem lăng ƀing apăn bruă, khul grup Ping gah hăng mơnuih apăn bruă Ping gah”.

Thun 2023, tơring čar Quảng Nam hơmâo kah pha giăm 1.227 klai prăk ngă tui jơlan hơdră tui hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă. Truh abih blan 10/2023, tơring čar Quảng Nam hơmâo jao trun giăm 310 klai prăk, giăm 50% tui mrô pơkă amăng thun; rơnoh prăk brơi hơdôm anom bruă mă yua giăm 5 klai prăk, giăm 10% tui mrô pơkă. Khul apăn bruă Ping gah tơring čar Quảng Nam pơpha mơnuih apăn bruă, khua mua rĭm blan nao tơl ƀon lan, krăo lăng bruă pok pơhai hơdôm akŏ bruă, gơgrong pơsir hĭ gun găn, pơtrut jao trun prăk kak. Ơi Trần Anh Tuấn, Kơ-iăng khua Jơnum min mơnuih ƀôn sang tơring čar Quảng Nam, Khua khul git gai hơdôm Jơlan hơdră tui hơnong pơkă dêh čar tơring čar Quảng Nam, brơi thâo, tơring čar anai đing nao pel ĕp glăi hơdôm hră pơ-ar dŏ gun găn kiăng rơkâo đĭ gơnong glông pơsir hĭ; laih dong gơgrong ba tơbiă hơdră bruă djru ƀing apăn bruă amuñ thâo rơđah hơdôm boh tơhnal amăng hră pơ-ar.

“Tơring čar Quảng Nam hơmâo hră pơ-ar pơmut hrŏm tong ten hăng rĭm jơlan hơdră tui hơnong pơkă dêh čar phara. Hăng amra čih pơkra hră pơ-ar črâo ba hrŏm hơdôm boh tơhnal pơprong. Bơ hăng hơdôm boh tơhnal tong ten amăng pok pơhai ngă tui hơdôm bruă bơdjơ̆ nao hơdôm ding jum, gơnong bruă amra hơmâo hră pơ-ar pơƀut phara. Khul git gai hơdôm jơlan hơdră tui hơnong pơkă dêh čar amra jơnum kiăng pel ĕp glăi rĭm bruă tong ten kiăng pơsit bruă hơpă dŏ gun găn, tơlơi ngă soh amra sem lăng tong ten hăng čih pơƀut glăi amăng sa pok hră pơ-ar”.

Kiăng pơtrut tañ bruă jao prăk ngă tui jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng, tơring čar Quảng Nam git gai hơdôm anom bruă, gong gai ƀon lan jao prăk tañ ƀiă. Akŏ bruă hơpă hơmâo laih tơlơi črâo ba rơđah rơđông, amuñ ngă tui, ƀon lan đing nao pok pơhai tañ, pơhlôm djơ̆ hrơi blan pơkă. Hăng hơdôm tơlơi gun găn ƀơi hơdôm akŏ bruă anet prong aka ƀu pơsir hĭ, hơdôm anom bruă tuh pơ alin anăm săl yua hơdră bruă, dŏ tơguăn gơnong glông črâo ba mơ̆ kiăng gơgrong ĕp hơdră pơsir, ngă klă hơdôm hơnong pơkă mơng akŏ bruă jao./.