Akŏ bruă dăp, pơƀut glăi plơi pla mơ̆ng Jơnum min mơnuih ƀôn sang să Sơn Tây Hạ, tơring čar Quảng Ngãi, plơi Ka Năng amra hơmâo pơmut hăng plơi Ra Tân laih anun plơi Bà He, plơi phrâo djă anăn Ka Năng. Tơdơi kơ pơmut hrŏm, plơi pla phrâo him lăng hơmâo 293 boh sang anŏ hăng 1.030 čô mơnuih, jing sa amăng hơdôm boh plơi hơmâo lu mơnuih hloh amăng să.

Ră anai, Ka Năng jing plơi anet hloh amăng klâo boh plơi či pơmut hrŏm. Anai ăt jing plơi pla ataih yaih, hơmâo lu mơnuih djuai ania ƀiă, jơlan nao rai ataih mơn. Mơnuih ƀôn sang plơi Ka Năng lu biă ñu lĕ mơnuih djuai ania Ca Dong hăng H’rê, bơwih ƀong mơ̆ng bruă ngă hmua - pla kyâo đôč, kah hăng pla phun keo, čik, hơbơi čên Japan, tiu hăng kơphê. Hơdôm ƀut plơi pla dŏ raih dai ƀơi djŏp kơnua čư̆, anun yơh bruă iâu ană plơi jơnum tơnap biă, ră anai tơnap hlohdong lơ̆m plơi pla prong tui. Ơi Đinh Văn Loại, Khua plơi, Khua ping gah plơi Ka Năng brơi thâo: “Să ăt pơčrâo brơi mă Sang gru grua plơi Ka Năng ngă anih či dưm măi mok, biă ñu măi computer, gêh găl ƀiă či ngă hră pơ-ar. Pơ anăp anai, blung hlâo lĕ jơnum plơi, ƀut plơi pla či pơmut hrŏm. Hăng bruă ngă khua ping gah plơi, kâo khŏm nao hlâo yơh, tơdơi kơ anun lĕ sang anŏ, ngă tui tơlơi pơtrun mơ̆ng Ping gah kiăng ană plơi hla tui”.

Să Sơn Tây Hạ hơmâo akŏ pơdong yua pơmut hrŏm klâo boh să Sơn Tinh, Sơn Màu hăng Sơn Lập hlâo adih. Amăng să hơmâo rơbêh 5.600 čô mơnuih, amăng anun djuai ania ƀiă hơmâo rơbêh 93% mrô mơnuih. Plơi pla prong biă, rơbêh 136 km2, leng kơ čư̆ soh, lu anih ƀu thâo nao rai ôh amăng bơyan hơjan. Yua tui anun, bruă dăp glăi plơi pla ƀu dưi kiăo tui mrô sang anŏ đôč ôh.

Tui hăng bruă prăp rơmet mơ̆ng să, mơ̆ng 12 boh plơi glăk hơmâo, dưi pơƀut glăi jing 8 boh plơi. Khă hnun, ƀu djơ̆ abih bang plơi leng kơ ba pơmut hrŏm ôh. Hơdôm boh plơi Mang Rễ, Xà Ruông, Nước Kỉa, Hà Lên hăng Tà Vinh ăt dŏ hơnong đôč, yua anih anom pơ anai nao rai tơnap, mơnuih ƀôn sang dŏ raih daih, laih dong ataih biă mơ̆ng să, anun jing ƀu thâo pơmut hrŏm ôh. Ơi Cao Quốc Tiến, Khua ping gah să Sơn Tây Hạ brơi thâo: “Lơ̆m pơmut hrŏm plơi pla, hăng hơdôm boh plơi pơ ataih, jơlan nao truh pơ sang să atauh truh 25km, jơlan đĭ hăng čư̆ soh. Lơ̆m anun, ƀing apăn bruă amăng plơi hai aset mơn. Tui hăng tơlơi kiăng amăng mông anai, ƀing ngă bruă kơnuk kơna khŏm thâo mă yua boh thâo pôr pơhing, anun bruă anai jing tơnap biă kơ sang să amăng bruă ruah mơnuih ngă khua plơi pơ anăp. Khă hnun, djŏp bruă hơmâo ngă amăng ƀrư̆ laih. Ră anai, mă yua boh thâo mrô hơmâo pok pơhai tơl plơi pla hăng hơdôm grup pơtô brơi mă yua boh thâo mrô. Pơ anăp dong, să amra brơi măi computer kơ abih bang plơi đah mơ̆ng dưi ngă hră pơ-ar”.

Ƀu kơnong ƀơi čư̆ siăng đôč ôh, amăng plơi prong hnun mơn, bruă dăp glăi ăt hơmâo jŭ yap tong ten kiăp tui anih ană plơi dŏ hăng tơlơi hơdip mơda hiưm pă mơn. Ƀơi phường Đức Phổ, mơ̆ng 25 ƀut plơi ră anai dŏ glăi 15 ƀut plơi đôč. Phường glăk hơduah tơña mơnuih ƀôn sang mơn hlâo či ngă hră pơ-ar ba pơdah pơ ƀing khua kĭ brơi. Ơi Trần Ngọc Sang, Khua jơnum min mơnuih ƀôn sang phường Đức Phổ brơi thâo, bruă dăp glăi plơi pla hơmâo sem lăng tong ten kiăo tui anih anom, lŏn tơnah, gru grua, tơlơi phiăn ngă hmua, bơwih ƀong hơdip mơda mơ̆ng mơnuih ƀôn sang: “Amăng mông dăp glăi hơdôm ƀut plơi pla, Khul khua apăn bruă ping gah ăt kah hăng khua mua jơnum min mơnuih ƀôn sang pơmin tong ten kơ anih dŏ, tơlơi phiăn, tơlơi hơdip mơda bơwih ƀong huă mơ̆ng mơnuih ƀôn sang. Bruă dăp glăi hơdôm ƀut plơi amra ngă tui tơlơi pơkă: hơdôm ƀut plơi ƀu djŏp mrô sang anŏ tui tơlơi pơtrun lĕ amra pơmut hrŏm hăng ƀut plơi ieo gah, jê̆ giăm, hơmâo tơlơi hơdip mơda, bơwih ƀong hrŭp hrŏm mơn”.

Tui hăng hơdră ngă bruă hơmâo Jơnum min mơnuih ƀôn sang tơring čar Quảng Ngãi, tơring čar amra hrŏ trun 549 boh plơi, ƀut plơi. Tơdơi kơ dăp giong, tơring čar dŏ glăi 1.161 boh plơi, ƀut plơi, hrŏ trun 32%. Khă hnun, gah tlôn hơdôm mrô anun ƀu kơnong bruă pơhrŏ trun mrô plơi pla đôč ôh. Tơlơi prong hloh lĕ akŏ pơjing anih wai lăng ngă bruă hơbôt, mă bruă tŭ yua, lăp djơ̆ hăng gong gai dua gưl.

Tui hăng ơi Trần Đình Dũng, Kơ-iăng khua anom bruă Akŏ pơdong gong gai, Gơnong bruă čar tơring čar Quảng Ngãi, amăng mông pok pơhai, tơring čar lăp đing nao biă gru grua, djuai ania, tơlơi đăo hăng tơlơi phara anih anom, lŏn dŏ, đah mơ̆ng hơmâo mơnuih ƀôn sang tŭ ư: “Bruă kiăng ngă hrŏm mơ̆ng Kơnuk kơna pơkă, hăng plơi pla lĕ mơ̆ng 300 boh sang anŏ truh pơ ngŏ, bơ hăng ƀut plơi lĕ mơ̆ng 350 boh sang pơ ngŏ. Rơngiao kơ anun, tui hluai kơ rim boh plơi mơn, Kơnuk kơna jao kơ tơring čar pơtô brơi rơđah rơđông. Hăng mơnuih ƀôn sang djuai ƀiă, čư̆ siăng, kual phara hơjăn ƀudah plơi pla hơmâo čư̆ pơgăn, amăng bruă dăp glăi khŏm kơđiăng nao tơlơi đăo, djuai ania hăng gru grua, kiăng tơdơi kơ dăp glăi, hơdôm anom bruă mă bruă bơkơnar hloh, ngă gêh găl brơi bruă wai lăng, git gai amăng plơi pla”.

Dăp glăi plơi pla, ƀut plơi ƀu kơnong jing pơhrŏ trun mrô plơi pla ƀudah ngă hơbôt anom bruă kơnuk kơna đôč ôh. Anai ăt jing bruă jŭ yap tong ten pơhlom djơ̆ hăng tơlơi kiăng wai lăng amăng rơwang phrâo, ƀrô djă bong tơlơi gum pơgôp amăng plơi pla, gru grua, laih anun gêh găl hloh kơ mơnuih ƀôn sang amăng tơlơi hơdip rim hrơi. Kơnong kơ ta ngă bơkơnar djŏp tơlơi hơmâo lăi nao anun kah, bruă dăp glăi mơ̆ng tŭ yua, ngă phun atur kơ gong gai mă bruă klă, tŭ yua hloh pơ anăp anai./.