Hrơi ĕp mơnuih mă bruă hơmâo rơbêh 1.000 čô mơnuih, ƀing čơđai sang hră…amăng tơring čar; 30 anom bơwih ƀong sĭ mơdrô, anih pơtô bruă mă hăng 10.000 anih kiăng mơnuih mă bruă. Rơngiao kơ bruă tuh tia pơkra ming, ĕp mơnuih nao hrăm pơ tač rơngiao, hrơi ĕp bruă mă tal anai kiăng ĕp pơmut lu mơnuih mă bruă gah anih ngă hiam, spa, nai ia jrao, hơdôm anih sĭ kơphê, sĭ mơdrô gơnam tam.

Ƀrô tal anai, Anom pôr pơhing Sang bruă prăk kơnuk kơna Việt Nam ăt pơphun jơlan hơdră “Thâo hluh yua prăk kak” kiăng djru brơi mơnuih mă bruă ƀơi Dak Lak thâo rơđah kơ bruă yua prăk kak, pel ĕp hơdôm tơlơi bơdjơ̆ nao prăk amăng dêh čar Việt Nam, bruă mă yua lăp djơ̆; mơnuih mă bruă ăt mut hrŏm jơlan hơdră ngui apah prăk. Ƀrô tal anai, Khul pơlir mơnuih mă bruă tơring čar Dak Lak ăt jao 50 anung gơnam brơi ding kơna tơnap tap.