VOV4.Jarai-Anom bruă pơhlôm nua bruă mơnuih mơnam ƀôn prong Hồ Chí Minh brơi thâo, tơdơi kơ 1 blan pok pơhai ngă tui jơlan hơdră djru prăk apah sang dŏ kơ mơnuih mă bruă apah tui hăng Hră pơtrun mrô 08 mơ̆ng Khua dêh čar, truh ră anai hơmâo pơtong rơđah 21 rơbâo 116 čô mơnuih mă bruă apah amăng 1.855 boh sang bruă apah mă bruă, dưi rơkâo djru prăk apah sang dŏ.

Anom bruă pơhlôm nua bruă mơnuih mơnam ƀôn prong HCM ăt pơtă pơtăn, hrơi blan hăng hơdră ngă hră rơkâo hơmâo mơnuih pơsit brơi. Hrơi blan pơkă kơ mơnuih hlăk dŏ mă bruă lĕ anom bruă apah gơñu ngă brơi hră rĭm blan ƀudah pơƀut 2 blan ƀudah 3 blan ha wơ̆t samơ̆ kaih biă mă truh abih lơ 15/8/2022. Hăng mơnuih mă bruă pơwơ̆t glăi dơ̆ng tơdơi kơ pơdơi hĭ yua klin ngă hră kaih biă ăt abih lơ 15/8/2022 mơ̆n.

Nay Jek: Pơblang