Hơdôm hrơi rơgao, hơdôm Khul hmâo pơsur laih giăm truh 14 klai prăk. Mơ̆ng ngăn rơnoh keh prăk anai hmâo djru brơi laih kơ čơđai sang hră tơnap tap, ƀơk prăk djru hrăm hră kơ čơđai sang hră ƀun rin triăng hrăm hră; bơni čơđai sang hră hơdôm gưl; apah bơni kơ čơđai sang hră hăng nai pơtô hmâo bôh than prong amăng hơdôm tal pơplông, bruă pơplông ƀơi kual hăng lŏn ia.

Ơi Phạm Đăng Khoa, Khua Gơnong bruă pơtô pơhrăm tơring čar Dak Lak, Khua Khul wai lăng Keh prăk brơi thâo, bruă lăi pơthâo Keh prăk pơsur hrăm hră tơring čar Dak Lak hăng Tơlơi pơkă sit nik amra pơsit ngă tui bôh than ba tơbiă, bruă mă ƀu pơmin nao kơmlai, gơgrong mă pô, anăp nao bơwih brơi ba glăi bôh tơhnal pơđĭ kyar pơtô pơhrăm, pơsur hrăm hră, pơsur mơnuih rơgơi ƀơi tơring čar. Ƀrô djơ̆ tal anai, Grŭp pơphun bruă ăt ƀơk laih 15 anung prăk djru hrăm hră kơ 15 čô čơđai sang hră yak rơgao tơlơi tơnap hrăm hră rơgơi ƀơi tơring čar Dak Lak./.