VOV4.Jarai - Abih bang prăk mă yua brơi gơnam tam Tết hăng braih, bơwih brơi tơlơi hơdip hơdôm mơnuih gah hơdră bruă, mơnuih mă bruă tal Tết tui phiăn juăt Nhâm Dần lĕ rơbêh kơ 9.280 klai prăk brơi rơbêh kơ 75,81 klăk čô mơnuih gah hơdră bruă. Amăng tal Tết tui phiăn juăt Nhâm Dần, hơdôm anih anom hmâo ngă tui brơi gơnam tam hmao tlôn mơng Khua mir sir dêh čar kơ 1,56 klăk čô mơnuih djru ngă hơkrŭ đưm. Rơngiao kơ anung gơnam mơng hơdôm ƀirô kơnuk kơna, hơdôm tơring čar, ƀôn prong hmâo gơgrong hlâo mă yua ngăn drăp tơring čar, ƀôn prong pô hăng prăk pơsur gum pơčruh pioh ƀơk gơnam kơ mơnuih gah hơdră bruă, mơnuih djru ngă hơkrŭ đưm. Bruă djru bơwih brơi Tết kơ mơnuih ƀun rin, mơnuih pơgang gah mơnuih mơnam hăng mơnuih mă bruă tal Tết tui phiăn juăt djuai ania dưi hmâo hơdôm bôh tơring čar, ƀôn prong lăng ba. Hơdôm anih anom ăt hmâo pơphun hyu tơña bla, brơi gơnam tam kơ hơdôm bôh anom khul ling tơhan mă bruă ƀơi guai lŏn ia amăng tal Tết, ƀing duăm ruă kraih, mơnuih glăk dô̆ pơjrao tơlơi ruă klin Covid-19./.

Siu H’ Prăk: Pơblang