Kơ-iăng khua pơ ala mơnuih ƀôn sang dêh čar yă Nguyễn Thị Thanh brơi thâo: bruă ruah khua pơ ala mơnuih ƀôn sang dêh čar tal XVI hăng khua pơ ala mơnuih ƀôn sang djŏp gưl rơwang thun 2026-2031 pơphun amăng hrơi mơak mơai, abih bang dưi ngă pô, bơkơnar, djơ̆ tơlơi phiăn, rơnuk rơnua, pơkrem prăk hăng pơđut hiam laih, sit jing Hrơi mơak prong mơ̆ng lŏn ia ta, Hrơi mơak prong mơ̆ng mơnuih ƀôn sang. Anai jing bruă kơđi čar yom biă mă hăng bruă prăp rơmet hơdeč hmar, tong ten, gơgrong bruă, ha pran jua mơ̆ng abih bang anom bruă čar mơ̆ng Gơnong dlông truh pơ tơring čar: "Boh than hiam mơ̆ng bruă ruah khua jing pơsit brơi pran kơtang mơ̆ng khul gum pơgôp djŏp djuai ania, kơ tơlơi rơgơi git gai mơ̆ng Ping gah hăng boh tŭ yua bruă mă mơ̆ng abih anom bruă kơđi čar; laih dong mơ̆ng anun pơsit pran đăo kơnang kjăp khŏp mơ̆ng Mơnuih ƀôn sang hăng Ping gah, Kơnuk kơna”.

Kơ bruă ruah khua pơ ala mơnuih ƀôn sang dêh čar, dêh čar hơmâo ruah djŏp laih 500 čô khua pơ ala mơ̆ng 863 čô mơnuih tơbiă anăn. Amăng anun, 214 čô khua yua Gơnong dlông tơbiă anăn djơ̆ anăn ngă khua lu biă. Mrô khua ăt pơplih klă tui, hăng bruă hrŏ trun mrô khua ngă rah lu bruă hăng đĭ tui mrô khua apăn sa mơta bruă. Mrô khua pơ ala mơnuih ƀôn sang  dêh čar či ngă sa mơta bruă hơmâo ruah đĭ lu hloh kơ mơ̆ng hlâo, hơmâo rơbêh 40%. Biă ñu, Khua pơ ala mơnuih ƀôn sang dêh čar tal XVI hăng lu tơlơi pơplih phrâo amăng bruă dưm dăp kah pơpha mơnuih ngă khua: blung a hơmâo khua pơ ala mơ̆ng djuai ania Ơ Đu; mrô khua jing ƀing đah kơmơi hơmâo năng ai 30%, ăt jing mrô lu mơn. Anai ăt jing blung a mrô khua yua Gơnong dlông tơbiă anăn kiăng ruah ngă khua pơ ala pơ tơring čar leng kơ djơ̆ anăn ngă khua soh. Ơi Lê Ngọc Chung, mơnuih ruah khua phường Phước Thắng (Bà Riạ - Vĩng Tàu hơđăp), ƀôn ptong HCM mơak biă yua ƀing khua pơ ala mơnuih ƀôn sang dêh čar dưi ruah đĭ tal anai dưm kơnar, hơmâo tơlơi rơgơi, tơlơi hrăm phara mơn...hơmâo lu khua hơmâo ruah glăi, hrăm bruă kơđi čar, hrăm bruă mă rơgơi, gưl prong soh, lu khua jing mơnuih djuai ania ƀiă: “Jing sa čô mơnuih plĕ hră kâo lăng, amăng hră čih anăn khua pơ ala mơnuih ƀôn sang phrâo ruah đĭ phrâo anai hơmâo djŏp laih khul mơnuih, wơ̆t hăng amăng anom bruă kơđi čar, ƀing adoh suang ngă sen, ƀing mơdrô, tơhan blah ngă. Anai jing tơlơi mơak biă mă, pơƀuh anŏ phara, hăng tơlơi pơmin nao pơ anăp dlăm biă mă amăng khul mơnuih hơmâo ruah ngă khua pơ ala. Biă ñu, hăng tơlơi gơgrong ngă mơnuih ruah khua ƀơi anăp tơlơi pơplih phrâo mơ̆ng lŏn ia ta, kâo čang rơmang ƀing khua phrâo hơmâo ruah jing mơnuih hur har, gơgrong bruă, rơgơi, ngă bruă beč bal hăng pơčeh phrâo. Sit jing ƀing khua pơ ala brơi mơnuih ƀôn san kiăng gum pơgôp čih pơkra tơlơi piăn, hơdră djru ba lŏn ia ta jăp tơkai mut amăng rơnuk phrâo”.

Lăng nao tơlơi kjăp bruă, ƀing khua hơmâo ruah ngă khua pơ ala mơnuih ƀôn sang dêh čar tal 16, yă Tạ Thị Yến, Kơ-iăng khua Jơnum min prăp rơmet ruah khua, Kơ-iăng khua Khul ruah khua dêh čar lăi: “Anŏ rơgơi mơ̆ng ƀing khua hơmâo ruah jai đĭ tui. Bruă dưm dăp ƀing khua ăt pơhlom pơ ala brơi mơnuih ƀôn sang ăt kah hăng bơkơnar khul mơnuih, bruă mă hơget leng kơ hơmâo soh, laih anun tơlơi pơplih yom dong ta pơđĭ tui mrô khua hrăm rơgơi, hrăm prong ăt kah hăng apăn bruă, pơhlom mrô khua đah kơmơi, hlăk ai djuai ania ƀiă”.

Khul ruah khua dêh čar pơsit, bruă ruah khua pơđut klă hiam, tŭ yua, pơhlom dưi ngă pô, rơđah rơđông, djơ̆ tơlơi phiăn, rơnuk rơnua. tơlơi git gai črâo bruă khut mơ̆ng Ping gah jing phun tơdŭ pơhlom bruă ruah khua dưi truh kih. Bruă prăp rơmet ruah mơnuih ngă khua hơmâo prăp mơ̆ng ngŏ truh pơ yŭ, tŏ tui mơ̆ng djŏp gưl mơn. Laih dong, gơñăm nao pơtŏp rơguăt bruă prăp rơmet, hyu pel ĕp, sem lăng, pơsir hĭ tañ hơdôm bruă aka ƀu thâo hluh, aka ƀu hruaih amăng mông ngă bruă. Ơi Nguyễn Hưũ Đông, Khua jơnum min bruă ruah khua pơ ala, ding kơna Khul ruah khua dêh čar lăi: “Bruă ruah djŏp 500 čô khua pơ ala mơnuih ƀôn sang dêh čar, 2.552 čô khua pơ ala mơnuih ƀôn sang tơring čar hăng rơbêh 72.437 čô khua pơ ala mơnuih ƀôn sang să phường hơmâo prăp lui tong ten, bơkơnar, dưi ngă pô, djơ̆ tui tơlơi phiăn. Mrô mơnuih nao plĕ hră lu hloh kơ mơ̆ng hlâo, pơƀuh tơlơi pơmin kơđi čar kjăp hăng tơlơi gơgrong bruă mơ̆ng mơnuih ƀôn sang; bruă git gai mơ̆ng ping gah, gong gai djŏp gưl hơmâo pok pơhai klă, dưm kơnar; bruă pôr pơhing hơmâo ngă djŏp, tŭ yua”.

Hăng tơlơi truh kih mơng tal ruah khua, pơƀuh tơlơi pơmin kjăp, tơlơi đăo kơnang hăng tơlơi pơmin hrŏm mơ̆ng Mơnuih ƀôn sang hăng Ping gah, Kơnuk kơna, ngă atur kjăp kơ Khua mua pơ ala mơnuih ƀôn sang dêh čar tal 16 ngă klă bruă jao amăng rơwang bruă phrâo./.