Amăng sang “Sang dô̆ Khul mut phung” phrâo pơdŏng giong, ayong Trần Đình Thu, ƀơi khối 1, phường Khánh Xuân, plơi prong Buôn Ma Thuột (Dak Lak) ƀu tlaih tơlơi mơ-ak, ol pran jua. Tơlơi hơdip mơda sang anô̆ ayong Thu tơnap tap biă, drơi pô ñu ngă bruă pơgang wai lăng ƀơi Sang hră gưl 2 Trần Hưng Đạo, plơi prong Buôn Ma Thuột, prăk pơhrui glăi ƀiă, bơnai ñu lĕ ƀu hmâo bruă mă, dua čô ană anet glăk amăng hnưr thun hrăm hră. 16 thun rơgao, abih bang sang anô̆ ñu dô̆ kơnang kơ sang dô̆ yua kơ sang hră pơdŏng. Tơdơi kơ djă pơkrem pioh, hyu čan blơi hmâo ƀiă lŏn, laih anun ñu dưi hmâo Khul mut phung plơi prong Buôn Ma Thuột djru 50 klăk prăk mơ̆ng Keh prăk “Sang dô̆ Khul mut phung”. Grŭp apăn bruă sang hră hăng ƀing nai pơtô čơđai amăng sang hră ăt djru mơn ñu čan prăk ƀu mă kơmlai pioh ñu hmâo dong tơlơi gal pơdŏng sang dô̆ klă hiam, kơjăp. Ayong Trần Đình Thu lăi:

 “Kâo pơ ala kơ sang anô̆ bơni kơ tơlơi lăng ba mơ̆ng Khul mut phung, khul nai pơtô čơđai amăng sang hră hmâo gum djru, brơi kâo čan prăk hăng djru brơi pioh kâo dưi pơdŏng sang anai, sang anô̆ ƀu hmâo hơget mơ-ak hloh. Hluai tui anai kâo kiăng Khul mut phung lăng ba hloh dong hơdôm mơnuih kah hăng kâo anai”.

Bơyan bơnga Giáp Thìn thun 2024 lĕ thun blung a amĭ ană amai Trần Mai Hương Giang, ƀơi phường Ea Tam, plơi prong Buôn Ma Thuột dưi čơkă tết amăng sang dô̆ phrâo hơdor tơngia. Amai Giang lăi pơthâo, hăng prăk blan mơ̆ng nai pơtô čơđai gưl sa, kơnong kơ djŏp pioh ƀong huă hăng rông 2 čô ană hrăm đôč. Lu thun rơgao, 3 amĭ ană gơñu hơdip kơnang kơ sang dăp gưl 4 mơ̆ng amĭ ama ñu. Akô̆ thun 2023, ñu dưi hmâo amĭ ama pha brơi lŏn hăng Khul mut phung plơi prong Buôn Ma Thuột djru ƀơƀiă prăk pioh pơdŏng sang. Yua anun yơh, amĭ ană amai Giang hmâo laih sang dô̆ klă hiam pioh dô̆ hăng hơđong pran jua mă bruă:

 “Kâo mơ-it tơlơi bơni truh abih bang hơdôm mơnuih amăng khul hmâo djru laih pran jua mơ̆ng pô kơ amĭ ană gơmơi hmâo sang anet pioh dô̆ đah mơ̆ng hơđong pran jua”.

Hmâo čơkă mă 50 klăk prăk djru pơdŏng sang “Sang dô̆ Khul mut phung” yua kơ Khul mut phung tơring čar Dak Lak jao, amai H’ Ngăm Niê, nai pơtô čơđai ƀơi Sang hră wai lăng čơđai anet Hoa Thủy Tiên, să Dliê Ya, tơring glông Krông Năng ƀu tlaih dong tah pran jua ol kơdol. Amai H’ Ngăm brơi thâo, lu thun rơgao, sang anô̆ ñu hơdip amăng sang pơkra hăng hnal kyâo răm tui laih, ƀu pơhlôm pioh dô̆ dong tah. “Sang dô̆ Khul mut phung” truh hăng sang anô̆ ñu lĕ kông ngăn yôm phăn biă, djru sang anô̆ ñu hmâo dong pran pioh pơplih tơlơi hơdip mơda:

 “Bơni kơ gưl dlông hmâo djru brơi kâo čơkă mă prăk hrơi anai. Kâo ol pran jua biă, sit nik mơ̆ng hlâo truh kơ ră anai akă hmâo ôh prăk lu tui anai pioh djru kâo pơkra sang dô̆. Kâo pơmin pơkra sang năng ai ñu 90 klăk prăk ƀudah ƀiă hloh. Rơngiao kơ prăk djru, amăng sang năng ai 15 klăk prăk hăng hyu čan adơi amai năng ai ñu 20 klăk prăk dong".

Jơlan hơdră “Sang dô̆ Khul mut phung” jing bruă mă tŭ yua sit nik hăng tơlơi hơdip mơda mơ̆ng mơnuih mă bruă, hơdôm thun rơgao, Khul mut phung tơring čar hmâo črâo ba klă laih hăng pơtô brơi hơdôm gưl khul grŭp mut phung pơphun hyu lăi pơhing, pơsur pơjing Keh prăk “Sang dô̆ Khul mut phung”. Kơnong yap mơ̆ng thun 2023 truh ră anai, Khul mut phung tơring čar hmâo djru pơdŏng phrâo hăng pơkra glăi 129 bôh sang dô̆ “Sang dô̆ Khul mut phung” hăng abih bang prăk mă yua 5 klai prăk. Yă Nguyễn Thị Lý, Kơ-iăng Khua Khul mut phung tơring čar Dak Lak brơi thâo mơ̆ng akô̆ thun truh ră anai, đơ đam tơring čar hmâo pơdŏng phrâo laih 27 bôh sang dô̆. Hơdôm blan dô̆ glăi mơ̆ng thun, hơdôm gưl Khul mut phung tơring čar Dak Lak amra iâo pơthưr, djru dong 73 bôh sang “Sang dô̆ Khul mut phung" pioh jao kơ mơnuih amăng khul, mơnuih mă bruă tơnap tap kơ sang dô̆.

 “Pơ̆ anăp anai, Khul mut phung tơring čar amra hmâo črâo ba dong pioh pok pơhai rơđah hơdôm yôm phăn phun ngă tui bruă bơwih brơi pơgang tơlơi dưi, bôh tŭ yua lăp djơ̆  kơ mơnuih mă bruă hăng kơtưn hơdôm ngăn rơnoh pioh ngă tui bruă bơwih brơi klă hloh kơ mơnuih mă bruă. Dua lĕ pơplih phrâo dong hơdră bơwih brơi pioh lăp djơ̆ hăng tơlơi čang rơmang, tơlơi kiăng mơ̆ng mơnuih amăng khul ƀơi tơring čar, amăng anun pok pơhai dong bruă pơjing Keh prăk djru mơnuih amăng khul ƀơi tơring čar Dak Lak pioh ngă klă jơlan hơdră pơdŏng sang dô̆ khul mut phung”.

Hơdôm bôh sang dô̆ dưi pơdŏng hăng ngăn rơnoh djru “Sang dô̆ Khul mut phung” ƀơi Dak Lak hmâo djru lu biă kơ mơnuih amăng khul, mơnuih mă bruă hmâo tơlơi hơdip tơnap dưi hơđong anih dô̆, hmâo dong pran hrưn đĭ amăng tơlơi hơdip mơda./.