Sa mơguah bơyan pơdơi prong ƀơi să guai dêh čar Ia Dom, tơring čar Gia Lai, rơkơi bơnai Kpuih Đin, plơi Bi, hơ̆k mơak čơkă nai neh pô wai lăng anih hrăm ană đah rơkơi ñu hăng ƀing khua mua amăng să nao čuă ngui sang anŏ. Tơlơi pơhing mơak lĕ, ană đah rơkơi gơñu nô Ksor Đam arăng čih anăn dưi mut hrăm pơ sang hră kơnuk kơna čem rông dua gưl, gưl sa hăng gưl dua Ia Dom amăng thun hrăm 2026-2027 pơ anăp. Anun lĕ tơlơi pơhing mơak prong biă mă hăng sang anŏ ƀun rin, tơnap tap kah hăng ayong Đin anai. Mơ̆ng thun hrăm phrâo pơ anăp, mut hrăm anih 8, amôn Ksor Đam amra dưi hrăm hră, dŏ glăi đih đŏm, ƀong huă amăng sang hră, kơnuk kơna čem rông ba, djru kơ sang anŏ plai ƀiă mŏn tơnap, sang anŏ ayong Đin h’ĭn pran jua kơ ană nao hrăm hră pơar.

“Kâo hmư̆ mơak biă mă lơ̆m sang hră djru ba kơ ană bă gơmơi dưi mut hrăm pơ sang hră đôm lăm. Rơkơi bơnai gơmơi dŏ hơmâo ană bă anet, adơi ñu, kâo lĕ hyu mă bruă arăng apah. Brơi ană bă mut hrăm sang hră kơnuk kơna čem rông ba hơđong yơh pran jua, kiăng gơñu đing nao hrăm hră đôč, đah mơ̆ng thâo thăi hră pơar kơñ pơgi plai ƀiă tơnap tap”.

Tơlơi mơak anun, ăt ƀuh ƀơi lu sang anŏ lơ̆m plơi Bi, să Ia Dom. Amai Triệu Thị Say, djuai ania Yao, brơi thâo, lu thun laih rơgao, rim hrơi ană nao pơ sang hră, rơbat rôk jơlan prong 19, ngă kơ pran jua pơmin na nao đôč, dŏ tơguan ană bă glăi mơ̆ng sang hră rơnuk rơnua. Lơ̆m hmư̆ hing, ană bă amra dưi nao hrăm pơ sang hră kơnuk kơna čem rông, dŏ glăi huă ƀong amăng sang hră phrâo, abih bang amăng sang anŏ hơ̆k mơak biă mă yơh.

“Kâo juăt nao pơ hmua găn rơgao nao rai pơ anun, kâo dŏ glăi rơdêh, lăng sang hră phrâo anun pran jua mơak biă mă. Hơdôm ruăi sang dlông tal hiam biă, ană bă ta dưi mut hrăm pơ anun hiam klă yơh. Mut hrăm sang hră đôm lăm, kơnuk kơna čem rông kâo ƀuh h’ĭn pran jua laih, hơmâo nai pơtô amăng anun, hơmâo ƀing met wa wai lăng, hơmâo anih dŏ, anih huă ƀong, đih đŏm amăng sang hră, djop mơta hơmâo soh”.

Să guai dêh čar Ia Dom hơmâo rơbêh 9000 čô mơnuih ƀôn sang dŏ ƀơi 7 boh plơi pla, amăng anun mơnuih ƀôn sang djuai ƀiă lĕ 34%. Lŏn mơnai glai klô rơhaih prong, lu plơi ataih mơ̆ng să, mơ̆ng sang hră, khom rơbat tơkai truh 20 km mơtam mơ̆ng truh pơ sang hră. Ƀu ƀiă ôh, ƀing čơđai rơbat rôk tui jơlan prong lu rodêh kah hăng jơlan 19, hŭi biă mă, tơlơi či truh ƀơi jơlan glông.

Yua kơ anun yơh, bruă akŏ pơdong sang hră đôm lăm anai dưi lăng kah hăng sa tơlơi djru ba prong biă mă hăng tơlơi tơnap tap mơnuih ƀôn sang ƀơi ter guai dêh čar, yua lŏn mơnai glai klô prong, jơlan glông ƀu klă, tơlơi bơwih ƀong huă dŏ tơnap tap gleh glar, lu čơđai tơbiă sang hră ƀah wư. Ơi Nguyễn Văn Tiến, Kơ-iăng khua Jơnum min mơnuih ƀôn sang să Ia Dom, tơring čar Gia Lai brơi thâo, să gơñu hơmâo 272 čô čơđai sang hră mơ̆ng anih 4 truh anih 9, dưi hơmâo anăn mut hrăm sang hră đôm lăm.

Anai lĕ, čơđai sang hră sang anŏ ƀun rin, hơmâo anăn djru kơnuk kơna bruă hơkrŭ, čơđai sang hră mơnuih djuai ƀiă sang anŏ ƀun rin, ană bă drit druai djai amĭ ama ƀudah ataih đơi mơ̆ng sang hră. Rơngiao kơ anun, 876 čô čơđai sang hră pơkŏn dưi hrăm dŏ glăi apah huă ƀong tơhrơi ƀudah apah prăk dŏ glăi amăng sang hră huă ƀong tom ƀing čơđai sang hră kơnuk kơna čem rông. Să hơmâo ruah djop khua mua apăn bruă, nai pơtô amăng sang hră, kiăng djop nai hăng mrô čơđai hrăm prăp lui mut thun hrăm phrâo pơ anăp huăi hơmâo tơlơi gun.

“Hăng nai pơtô, blung hlâo lĕ khom đing nao ĕp nai mut pơtô amăng sang hră đôm lăm pioh pơphun bruă mă. Dua lĕ khom sem lăng tơlơi thâo, bruă hrăm dơ̆ hnơ̆ng, mrô nai pơtô či kiăng djop tơlơi hrăm. Pơtrut pơsur bruă ĕp nai pơtô pioh kơ sang hră đôm lăm hlâo, ƀing nai hơmâo sang anŏ jĕ giăm sang hră ƀơ̆i, ƀing nai hlăk ai kiăng djru kơ bruă wai lăng gah rơngiao mông hrăm hră, yang hrơi dơ̆ng hăng tlam mơmŏt”.

Ơi Phạm Văn Nam, Khua Gơnong bruă Pơtô hăng pơjuăt tơring čar Gia Lai brơi thâo, ră anai, Gơnong bruă pơtô hrăm ngă hrŏm 7 boh să ƀơi guai dêh čar, ngă giong bruă akŏ pơjing khul grup khua mua hơmâo tơlơi dưi pơsit glăi anăn. Laih dơ̆ng, anom bruă pơtô hrăm jŭ yap glăi abih bang mrô čơđai sang hră, mrô nai pơtô sit nik, ngă hrŏm gơnong bruă čar lăi pơthâo ngă hră pơsit tŭ jum, iâu pơmut nai pơtô amăng sang hră djơ̆ hăng tơlơi phiăn pơtrun.

“Hăng mrô nai hơmâo ră anai, gơmơi jŭ yap glăi ngă hrŏm Gơnong bruă čar, rơkâo hăng jơnum min mơnuih ƀôn sang tơring čar, pơhrua nao dơ̆ng mrô nai pơtô, kiăng djop anăn nai pơtô sit nik. Kơ ƀing nai gah bruă tơnă asơi hơbai añăm čem rông lĕ, gơmơi hơmâo ngă hrŏm sang hră hrăm bruă ngă nai Gia Lai, ră anai, pok anih pơtô bruă tơnă asơi hơbai añăm, khom hơmâo mơnuih thâo gah bruă čem rông, wai lăng ba ƀing ană amôn čơđai sang hră pơ anăp adih”.

Hơdôm hrơi amăng bơyan pơdơi prong, hrŏm hăng bruă mă pơtrut hmar 90 hrơi mlam, kiăng man pơdong tañ 7 boh sang hră đôm lăm, kơnuk kơna čem rông dua gưl ƀơi djop să guai dêh čar gah yŭ tơring čar Gia Lai, bruă mă čih anăn pơmut čơđai sang hră, ruah hră pơar plơi pla, sang anŏ, anŏ gêh găl prăp lui giong laih, wơ̆t mrô nai pơtô, mơnuih wai lăng, djru hrŏm amăng bruă mă lơ̆m sang hră. Hơdôm boh sang hră đôm lăm ƀơi guai dêh čar anai djă ba sa tơlơi čang rơmang prong, bong pioh tơkai čơđai sang hră hrăm hră hơđong, kiăng pơhrŏ ƀiă anŏ pleh ploh bruă pơtô hrăm plah wah kual gêh găl hăng kual tơnap tap. Mơ̆ng anun, lu adơi đeh čơđai muai djuai ania ƀiă amra hơmâo anŏ gêh găl hrăm hră tŭ yua klă hloh, gir run kiăo tui anŏ gơñu kiăng, pok jơlan pơblih phrâo kơ tơlơi hơdip mơda kơñ pơgi hăng tơlơi kơhnâo ia rơgơi, thâo hrăm mơ̆ng ƀing gơñu.