VOV4.Jarai-Hơdră anăn “Sang pơđao mơ̆ng mơnuih tơpuôl” yua kơ anom bruă Mơnuih tơpuôl tơring čar Dak Lak pơphun hơdôm thun rơgao djru ba hơdôm rơtuh čô mơnuih mă bruă mut phung, mơnuih mă bruă apah tơnap tap hơmâo sang dŏ hơđong. Kơnong thun 2021, mơ̆ng Keh prăk “Sang pơđao Mơnuih tơpuôl” djop gưl anom bruă mơnuih tơpuôl amăng tơring čar hmao kru djru brơi man pơdong, hrêp glăi sang kơ 120 boh sang anŏ mơnuih mut phung tơnap tap aka ƀu hơmâo sang dŏ hơđong, rơnoh prăk tuh pơ alin truh kơ 4 klai 500 klăk prăk.

Rơkơi djai tañ, amai Nguyễn Thị Loan, dŏ pơ să Ea Rok, tơring glông Ea Sup, tơring čar Dak Lak jing mơnuih mă bruă phun kơ sang anŏ, rông ană bă hăng lăng ba tơhmua, amĭ rơkơi ñu tha rơma. Sang anŏ tơnap tap anun yơh tơlơi kiăng hơmâo hmăi sang dŏ kjăp, tơlơi anun ƀu khin pơmin nao ôh mơ̆ng amai Loan. Amai Loan lăi: Ñu dong hnưh lu čan prăk pơjrao kơ tơhmua, bơwih brơi asơi añăm tlam mơguah kơ sang anŏ hăng rông ană bă hrăm hră pơar, anun yơh ñu tơnap tap gleh glar. Dŏ amăng sang tơ̆i, răm laih, amĭ ană gơñu hăng yă tơčô mô yâo hŭi biă mă sit bơyan hơjan kơthel truh.

Jao sang pơđao mơnuih tơpuôl kơ mơnuih mă bruă sang anŏ tơnap tap

“Rơngôt hing lu yua rơkơi rơngiă laih, bơwih ƀong huă tơnap dơ̆ng, samơ̆ bưng băi hơmâo adơi ayong amăng sang bruă Mơnuih tơpuôl tơring glông ƀuh gơmơi tơnap tap đơi, djru ba amĭ ană gơmơi amăng mông tơnap tap. Biă mă ñu ƀing adơi ayong djru kiăng kơ amĭ ană gơmơi hơmâo sang dŏ pơđao mơ̆ng tơlơi khăp pap anai”.

Thun 2021, amai H’Ni Wong Ƀuôn Krông, mơnuih tơpuôl mơ̆ng anom bruă mut phung ƀơi să Čư̆ Huê, tơring glông Ea Kar, hok mơak glăi dŏ pơ sang phrâo, yua kơ khul mơnuih mut phung tơring čar djru prăk man pơdong. Sang phrâo dưi man pơkra đơ đam 70 met karê, rơnoh prăk 180 klăk. Amăng anun, sang bruă mơnuih tơpuôl tơring čar djru 50 klăk, khua mua tơhan tơring glông Ea Kar djru 10 klăk, rơnoh prăk dŏ glăi sang anŏ ñu pơkom hlâo hăng čan dơ̆ng prăk phung wang gơyut gơyâo.

Amai H’Ni Wong Ƀuôn Krông ră ruai: Rơbêh 10 thun hăng anai tơlơi hơdip mơda sang anŏ ñu tơnap tap biă mă anun yơh rơkơi bơnai gơñu dŏ hrom sang amĭ ama gah rơkơi hăng adơi đeh rơkơi đôč. Ră anai, hơmâo sang phrâo laih, djru kơ sang anŏ gơñu hơmâo anih dŏ hơđong, hrưn đĭ kơnong bơwih ƀong huă kiăng hơđong hơdip mơda.

“Yua prăk pơhrui glăi ƀu hơđong ôh, anun ƀu hơmâo prăk pơdong sang, dŏ hrom truh 10 thun. Ră anai dưi hơmâo sang phrâo kâo mơak biă mă bơni kơ tơlơi djru mơ̆ng djop sang bruă ping gah, gong gai kơnuk kơna să, tơring glông ăt kah hăng pơ tơring čar hơmâo djru ngă gêh găl kơ rơkơi bơnai gơmơi kiăng dưi hơđong tơlơi hơdip mơda, pioh gơmơi hơđong pran jua mă bruă”.

Jao rơnoh prăk djru hrom man pơdong sang pơđao mơnuih tơpuôl

Tui hăng tơlơi jŭ yap mơ̆ng Anom bruă mơnuih tơpuôl tơring čar Dak Lak, amăng thun 2021, mơ̆ng Keh prăk “Sang pơđao Mơnuih tơpuôl” djop gưl anom bruă mơnuih tơpuôl amăng tơring čar hơmâo djru hmao kru man pơdong, ming pơkra glăi sang kơ 120 boh sang anŏ mơnuih mut phung tơnap tap aka ƀu hơmâo sang dŏ hơđong hăng rơnoh prăk djru lĕ 4 klai 500 klăk prăk.

Ơi Nguyễn Công Bảo, Khua anom bruă mơnuih tơpuôl tơring čar Dak Lak brơi thâo: Hơdră “ Sang pơđao Mơnuih tơpuôl” hơdôm thun rơgao hơmâo tŭ mă tơlơi djru hrom djop mơnuih, tơlơi gum tơngan hrom mơ̆ng sang bruă ping gah, gong gai kơnuk kơna, djop sang bruă mơnuih tơpuôl, khul grup mut phung, sang bruă sĭ mơdrô amăng tơring čar hăng gah rơngiao tơring čar. Hơdră anai hơmâo djru mơnuih mă bruă kơnuk kơna ngă ding kơna mơnuih tơpuôl, mơnuih mă bruă dŏ tơnap tap aka ƀu hơmâo sang dŏ, lir hơbit tong ten hăng anom bruă mơnuih tơpuôl, djru mơnuih mơnam tơnap tap amăng tơring čar.

“Thun hlâo, Sang pơđao mơnuih tơpuôl ăt kah hăng anom bruă ngă hrom klă bruă jak iâu mơnuih mă bruă djru hrom pơčruh keh prăk anai. Tui hăng tơlơi pơkă hlâo, sa čô mơnuih tơpuôl sa blan pơčruh 5000 prăk. Tơdơi kơ anun gơmơi mơ-it kơ anom bruă mơnuih tơpuôl gơnong dlông adih laih anun kah pơpha kơ anom bruă pơyŭ dơ̆ng 90% pioh dăp hơdră pok pơhai ngă tui. Dŏ glăi 10% gơmơi pioh glăi pơpha djru kơ hơdôm anom bruă tơnap tap hloh. Rơngiao kơ anun, Anom bruă mơnuih tơpuôl tơring čar jak iâu lu anom bruă pơkŏn pơčruh hrom”.

Hơdôm boh sang pơđao mơnuih tơpuôl dưi jao kơ pô sang tơnap tap, jing mơnuih mă bruă kơnuk kơna mut phung mơnuih tơpuôl tơnap tap, gơñu hok mơak biă mă, djru pơtrut pran jua  hur har mă bruă, kjăp pran jua ai hơtai, akŏ pơdong tơlơi hơdip mơda sang anŏ.

Tuấn Anh pô čih-Nay Jek: Pơblang