Hăng sang anô̆ djuai ania Khmer ƀun rin, dua rơkơi bơnai amai Huỳnh Thị Cẩm Tú hăng ayong Thạch Thường ƀơi ấp Vĩnh Thanh, să Vĩnh Quới čung nao pơ̆ Bình Dương ngă mơnuih mă bruă. Lơm klin Covid-19 gluh đĭ amăng thun 2021, rơkơi bơnai pơwot glăi pơ̆ plơi pla, dưi hmâo amĭ ama pha brơi lŏn pơdŏng sang dô̆ pha, hyu mă bruă arăng apah dô̆ hơdip mơda. Hơdôm thun rơgao, ƀu hmâo rơdêh nao rai anun bruă bơwih ƀong bưp lu tơlơi tơnap. Yua anun, lơm dưi ruah djru 10 klăk prăk pơplih bruă mă, dua rơkơi bơnai ñu hmâo blơi laih rơdêh thut pioh nao rai, pơgiăng rah bôh troh hyu sĭ. Amai Huỳnh Thị Cẩm Tú, brơi thâo, kơnang kơ hmâo rơdêh mơ̆ bruă blơi sĭ mơ̆ng sang anô̆ jing gêh gal hăng amuñ hloh:

 “Sang anô̆ pơhrui glăi prăk ƀu hơđong, ƀu hmâo ngăn rơnoh, ƀu hmâo rơdêh nao rai pioh sĭ mơdrô gơnam tam, samơ̆ dưi hmâo kơnuk kơna djru lĕ hmâo blơi sa bôh rơdêh thut pioh nao rai sĭ mơdrô gơnam tam, ră anai hơdai nao bruă bơwih ƀong sĭ mơdrô hlao. Sa blan ăt ĕp hmâo mơn 7-8 klăk prăk, sĭ tơmun mơkai, tơdah abih bơyan tơmun lĕ hơdai nao blơi sĭ gơnam pơkon kah hăng hơbơi añăm hơbơi pơđăm hra, bôh tơsâu rơmô, bôh trol. Sang anô̆ bơni kơ Ping gah, Kơnuk kơna hmâo djru laih kâo ƀơƀiă prăk pioh sang anô̆ bơwih ƀong sĭ mơdrô, 2 rơkơi bơnai kâo amra gir run piohg tơtlaih mơ̆ng ƀun rin, kâo čang rơmang tơlơi hơdip plai ƀiă hloh".

Bơ̆ yă Sơn Thị Lùng, ƀơi plơi Vĩnh Thành, să Vĩnh Quới, hăng mrô prăk 10 klăk prăk dưi gum djru mơ̆ng Jơlan hơdră pơkă lŏn ia pơđĭ kyar bơwih ƀong – mơnuih mơnam kual neh wa djuai ania ƀiă, ñu hmâo blơi laih 1 drơi un ania pioh rông, pơkra glăi war un hơđăp hăng blơi gơnam ƀong kơ un amăng hơdôm blan blung a. Mă yua lŏn gah tlôn sang, ñu pla dong añăm pơtăm pioh ngă gơnam ƀong kơ un. Tơdơi giăm 4 blan rông, ñu prăp lui sĭ laih hnưr un blung a, hăng 13 drơi un, pơkă hlâo pơhrui hmâo rơbêh kơ 20 klăk prăk.

 “Dưi gum djru tui anun kâo bơni lu biă. Ră anai un tuh rai rơbêh kơ 10 drơi, hăng kâo sĭ abih ha pŭ un hlao mơtăm. Kâo rông tŏng ten biă, prăk pơhrui glăi ăt djru brơi mơn sang anô̆ kâo hơđong”.

Bruă djru bơwih ƀong huă, pơplih bruă mă kơ neh wa djuai ania ƀiă hơdôm thun jê̆ hăng anai dưi hmâo plơi prong Ngã Năm, tơring čar Sóc Trăng đing nao ngă tui hăng hmâo lu bôh tơhnal klă. Hơdôm hrơi rơgao, plơi prong hmâo đing nao pơtrut tañ bruă pok pơhai ngă tui hơdôm rơwang bruă, rơwang bruă anet… amăng Jơlan hơdră pơkă mơ̆ng lŏn ia pơđĭ kyar bơwih ƀong – mơnuih mơnam amăng kual neh wa djuai ania ƀiă hăng čư̆ siăng, rơwang 2021-2030, amăng anun, hmâo brư djru pơplih bruă mă kơ neh wa djuai ania ƀiă, amăng ƀrư̆ djru sang anô̆ ƀun rin djuai ania ƀiă hmâo dong tơlơi gal bơwih ƀong huă, đĭ dong prăk pơhrui glăi, amăng ƀrư̆ hrưn đĭ pioh hơđong tơlơi hơdip mơda.

 Truh ră anai, mơ̆ng jơlan hơdră hmâo djru laih lŏn dô̆ sa bôh sang anô̆ hăng mrô prăk 44 klak prăk; djru sang dô̆ 35 bôh sang anô̆ hăng mrô prăk rơbêh kơ 1 klai 500 klăk prăk; djru pơplih bruă mă 87 bôh sang anô̆ hăng mrô prăk rơbêh kơ 767 klăk prăk; djru ia yua kơ 9 bôh sang anô̆ hăng mrô prăk 27 klăk prăk. Rơngiao kơ anun, să dô̆ ngă tui 2 hơdră djru pơđĭ kyar ngă đang hmua, pơplih phrâo bruă mă plơi pla, amăng anun hmâo hơdră rông bip sim Prang, akan bư vèo ƀơi plơi Vĩnh Thuận, să Vĩnh Quới hăng hơdră rông bip sim Prang ƀơi plơi Long Thành, să Tân Long hăng mrô prăk rơbêh kơ 343 klăk prăk hăng amra pok pơhai dong, pơhư hyu amăng thun 2024. Ơi Huỳnh Văn Lơ, Khua Anom wai lăng mơnuih mă bruă, tơhan rơka ruă hăng mơnuih mơnam plơi prong Ngã Năm brơi thâo:

 “Pơphô brơi dong kơ Jơnum min mơnuih ƀôn sang plơi prong, pok pơhai djop kơčăo bruă, hăng ngă tui djop hơdră tui jơlan gah pơkă hrŏ trun ƀun rin kơjăp phik, jơlan hơdră pơđĭ kyar bơwih ƀong – mơnuih mơnam kual neh wa djuai ania ƀiă hăng čư̆ siăng, biă ñu đing nao pơplih bruă mă, pơtô pơhrăm bruă kơ mơnuih mă bruă ƀơi plơi pla hmâo bruă mă hreč ba glăi prăk pơhrui glăi pơđĭ kyar bơwih ƀong sang anô̆”.

Rơwang bruă pơsir tơlơi kơƀah lŏn dô̆, sang dô̆, lŏn ngă đang hmua pơplih bruă mă hăng ia yua hmâo bôh tŭ yua phara yôm phăn biă, pioh gal brơi hơdôm bôh sang anô̆ Khmer ƀun rin dưi ngă juăt, pơplih bruă mă, pơđĭ tui rơnoh hơdip, tơlơi hơdip rim hrơi. Yua anun, bruă pok pơhai glăk dưi hmâo tơring čar Sóc Trăng lăi hrŏm hăng plơi prong Ngã Năm lăi ha jăn đing nao ngă tui, pơhlôm djơ̆ mơnuih, hmao tlôn rơnoh pioh hơdôm bôh sang anô̆ hmâo tơlơi gal hrưn đĭ, djru pơplih ƀô̆ mơta, tơlơi hơdip mơda bơwih ƀong - mơnuih mơnam kual neh wa djuai ania ƀiă pơ̆ anăp anai./.