VOV4.Jarai - Prăp lui kơ Tal jơnum lok 4, Khua pơ ala mơnuih ƀôn sang dêh čar ta tal 15 pơ̆ anăp, rơwang hrơi tơjuh rơgao, amăng đơ đam dêh čar ta pơphun hơdôm bruă bưp mơnuih ƀôn sang. Ƀơi ƀôn prong Hồ Chí Minh, Khua mir sir dêh čar ta ơi Nguyễn Xuân Phúc hmâo bưp mơnuih ƀôn sang hơdôm bôh tơring glông Củ Chi hăng Hóc Môn. Khua mir sir dêh čar hmâo črâo ba khua ƀôn prong lăi glăi kơ mơnuih ƀôn sang amăng mông bưp mơtăm, hrom hăng anun rơkâo pơsir hơdôm tơlơi kiăng lăp djơ̆ mơnuih ƀôn sang lăi nao. Ƀơi kual Dăp Kơdư, mơnuih ƀôn sang lăi nao lu tơlơi yôm phăn mơng lŏn ia, ăt kah hăng sa dua mơta tơlơi phrâo hmâo, biă ñu bruă wai lăng ia xăng ia jâu.

Gah tơlơi hơdôm mơnuih ƀôn sang Củ Chi hăng Hóc Môn leng kơ lăi tơbiă, anun lĕ tơlơi lu rơwang bruă kaih rơnoh, kual pơkă yôl, ngă tơnap kơ tơlơi hơdip mơda mơnuih ƀôn sang hăng ngă bơngot ƀơi sa dua kual rơwang bruă, amăng anun hmâo rơwang bruă Kual Sang măi Đông Nam ngă giăm truh 80 bôh sang anô̆ mơnuih ƀôn sang bưp tơnap, mơnuih ƀôn sang Huỳnh Văn Tây rơkâo đĭ:

“Kâo ba tơbiă sa wot dong ƀôn prong khom đing nao Kual sang măi Đông Nam. Mơnuih ƀôn sang dô̆ glăi 1/3 truh mông anai akă thâo mơn pô dưi pơ ala glăi nao dô̆ pơ̆ anih anom phrâo hiưm hơpă ôh. Kâo lăi bơhmutu ñu anet hloh, kơnong kơ ƀơi sang apah 800 truh 1 klăk prăk amăng 14 thun đôč thâo hơdôm hơpă prăk. Bôh nik anai khom lăi lĕ tơlơi bơngot hăng ruă pran jua mơng mơnuih ƀôn sang”.

Khua mir sir dêh čar ta ơi Nguyễn Xuân Phúc bưp mơnuih ƀôn sang ƀôn prong Hồ Chí Minh

Gah tơlơi jê̆ hăng anai sa dua bôh anih anom sĭ ia xăng ia jâu krư̆ bah amăng, nua ia xăng ia jâu đĭ hơdôm hrơi rơgao, bơdjơ̆ nao bruă bơwih ƀong huă hăng tơlơi hơdip mơda rim hrơi, mơnuih ƀôn sang Phan Thị Tuyết Anh, ƀơi tơring glông Hóc Môn rơkâo:

“Kâo rơkâo Ding jum sĭ mơdrô, Ding jum prăk kak tâ̆o hloh jak iâu ƀing sĭ ia xăng ia jâo, hơdôm anih sĭ phun prong kiăng gum hrom hmâo hrom bôh pơhiăp, pơsir tơlơi tơnap, pơhlôm bôh tŭ yua djơ̆ kơplah wah hơdôm bơnah, pơhlôm mrô ia xăng ia jâo kơ mơnuih ƀôn sang hơđong, huăi tơ̆i đưn”.

Lăi pơthâo hăng mơnuih ƀôn sang kơ tơlơi anai, Khua mir sir dêh čar ta ơi Nguyễn Xuân Phúc brơi thâo, mrô ia xăng ia jâo pơkra amăng dêh čar pơhlôm 2/3 mrô kiăng sĭ. Yua anun bruă pioh hmâo tơlơi phrâo rơgao lĕ sa tơlơi akă gal amăng bruă wai lăng git gai:

“Tui mrô mơng anom wai lăng bruă rô nao rai hăng dêh čar tač rơngiao ƀôn prong Hồ Chí Minh, bơhmu hăng thun hlâo hmâo blơi mut đĭ rơbêh kơ 20%. Samơ̆ yua kơ tơlơi kiăng yua lu. Thun hlâo yua kơ klin Covid-19 anun yua ƀiă. Thun anai bruă pơkra rai leng kơ đĭ, ƀing ta ƀu dưi pơkă lăng hlâo, hrom hăng nua (ƀơi rŏng lŏn tơnah) pơplih ƀing ta ƀu hmao git gai anun ba truh tơlơi anai. Kâo pơmin anai lĕ tơlơi dô̆ đôm mơ̆ mơnuih ƀôn sang hmâo lăi djơ̆ biă kiăng Kơnuk kơna hăng hơdôm ding jum, ƀôn prong hmâo bruă mă hmao tlôn hloh”.

Mơnuih ƀôn sang Lâm Đồng dô̆ tơguan ha mlăm kiăng čih anăn ngă hră pơ-ar pơsit hră mă yua lŏn

Ăt amăng rơwang hrơi tơjuh rơgao mơn, Khul khua pơ ala mơnuih ƀôn sang tơring čar Lâm Đồng hmâo pơphun ngă tui bruă bưp mơnuih ƀôn sang ƀơi hơdôm bôh tơring glông, plơi prong amăng tơring čar. Lu tơlơi lăi nao dưi hmâo mơnuih ƀôn sang gum pơhiăp hăng rơkâo đĭ. Rơngiao kơ hơdôm tơlơi yôm phăn dưi hmâo mơnuih ƀôn sang đing nao kah hăng: bruă pơgang pơgăn hưp ƀong kông ngăn mơng kơnuk kơna hăng tơring čar, bruă pơgang pơgăn tơlơi taih amang amăng sang anô̆, hơdră bruă pel ĕp – pơjrao tơlơi ruă, tơlơi ngă tui hơdôm jơlan hơdră pơkă mơng lŏn ia, prăk tuh pơplai bruă hrom, jơlan nao rai amăng kual, pơhlôm hơđong tơlơi hơdip mơda mơnuih mơnam... Mơnuih ƀôn sang tơring čar Lâm Đồng biă ñu đing nao truh hơdôm bruă mă ngă tui hrŏ trun ƀun rin kơjăp phik, hơdôm tơlơi pơsir ia hơdjă yua ƀơi plơi pla, wai lăng pơgang dlai tlô, mă yua lŏn čuah, djru anom bơwih ƀong hăng mơnuih ngă đang hmua pơđĭ tui bôh tŭ yua ngă đang hmua, pơplih pơkra tơlơi kơmok pruai, gơnam mă yua kơ đang hmua ƀu klă.

Ƀơi hơdôm mông bưp, mơnuih ƀôn sang gum pơhiăp dong truh Khul khua pơ ala mơnuih ƀôn sang tơring čar Lâm Đồng khom kơtưn hloh dong bruă lăng tui pok pơhai ngă tui hơdôm rơwang bruă hăng ring bruă phun ƀơi tơring čar; khom hmâo bruă mă kơtang hloh amăng pơsir hơdôm tơlơi phă dlai sua mă lŏn; kơtưn bruă wai lăng hơđong bruă man pơdŏng, pơsir abih hơdôm ring bruă man pơdŏng sua mă lŏn pơgang ia krông, čroh ia, ngă ia ling lip ƀơi sa dua bit anih sit adai hơjan prong. Amăng anun, bôh yôm dưi hmâo lu mơnuih ƀôn sang lăi nao anun lĕ hră pơ-ar pel ĕp, pơsit hră mă yua lŏn tal blung a dô̆ lu mơta ngă gun, glêh tơnap, sui hrơi. Pơ ala kơ mơnuih ƀôn sang ƀơi tơring glông, mơnuih ƀôn sang K’Sói, ƀơi să N’Thol Hạ, tơring glông Đức Trọng, lăi:

“Tơring glông ră anai bruă pel ĕp pơsit ăt kah hăng rơkâo pơsit hră mă yua lŏn tal blung a kơ mơnuih ƀôn sang glêh tơnap biă hăng tơnap dong. Hơdôm bôh ƀirô lĕ čih hră ƀuăn tla hră bruă čar amăng rơwang 20 hrơi, samơ̆ bôh nik ñu lĕ bruă tla glăi hră pơ-ar sui mơng 5 truh 10 blan, ƀudah lu thun ăt ƀu ƀuh hră mă yua lŏn mơn. Mơng anun ngă ƀu mơ-ak, ngă gun kơ mơnuih ƀôn sang”.

Grŭp khua pơ ala mơnuih ƀôn sang tơring čar Lâm Đồng pioh laih lu mông bơkơtuai, lăi pơhing, lăi glăi sa dua bôh yôm phăn, hrom hăng anun djă pioh, tŭ mă, ruah mă hơdôm tơlơi gum pơhiăp rơkâo đĭ mơng mơnuih ƀôn sang./.

VOV.TN ruah mă/Siu H’ Prăk pơblang