VOV4.Jarai-Ngă tui jơlan hơdră pioh lui anung prăk djru amăng Hơdră rŭ glăi hăng pơđĭ kyar tơlơi bơwih ƀong huă mơnuih mơnam tui Hră pơtrun mrô 11 lơ 30/1/2022 mơ̆ng Kơnuk kơna, phrâo anai, Sang bruă prăk djru mơnuih mơnam djop tơring čar amăng kual Dap Kơdư hơmâo pơphun jơnum lăi pơthâo rơnoh prăk kiăng hmai brơi kơ mơnuih ƀôn sang čan.

Phrâo anai, sang bruă prăk djru mơnuih mơnam brơi čan rơnoh prăk 50 klăk, amai Săn plơi Piơm, tơring kual Đak Đoa, tơring glông Đak Đoa brơi thâo, ñu amra mă yua prăk čan anai pioh rŭ glăi pla 1 ha kơphê sang anŏ amăng bơyan hơjan thun anai. Kiăng dưi čan prăk djru kơmlai anai, mơ̆ng akŏ thun anai, ñu hơmâo pơtruh nao rai hăng grup brơi čan prăk amăng plơi pla kiăng lăi pơthâo anŏ kiăng mơ̆ng mơnuih ƀôn sang kơ sang bruă prăk thâo. Tơdơi kơ anun, mơnuih mă bruă amăng sang bruă prăk hlong nao ĕp lăng đang kơphê, hmư̆ amai Săn lăi nao kơ bruă rŭ pla glăi kơphê:

“Kâo hok mơak biă mă dưi čan 50 klăk prăk pioh tuh pơ alin rŭ pla glăi kơphê anai. Sa črăn prăk kâo blơi kmơ̆k pioh pruai đang kơphê brơi đĭ hiam. Anai lĕ anŏ pơhrui phun mơ̆ng sang anŏ gơmơi anun yơh kâo gir run mă bruă pla pơjing kiăng mơboh lu”.

Bơ hăng ayong Nguyễn Hoàng Linh dŏ pơ thôn 1, tơring kual Đak Đoa, tơring glông Đak Đoa, rơnoh prăk čan 400 klăk prăk, kơmlai ƀiă amăng 20 thun djru kơ sang anŏ ñu ngă tui  tơlơi kiăng man pơdong sa boh sang kjăp ƀiă. Rơkơi bơnai ñu pơkrem prăk tuh pơ alin hăng ĕp bruă mă dơ̆ng kiăng hơmâo prăk čan djơ̆ hrơi blan:

“10 thun hăng anai dŏ sang apah, hơmâo sang ta pô mơak biă mă yơh. Prăk kơmlai rĭm blan ƀiă, thun blan tla prăk sui, anun prăk blan dua rơkơi bơnai gơmơi ăt rơbêh ƀiă mơ̆n, kiăng hơmâo prăk tla djop prăk kơmlai rĭm blan, dưi tla prăk čan hlâo kơ hrơi blan pơkă”.

Amai Săn tŭ mă prăk čan lơ̆m rơnuč blan 4 pioh rŭ pla glăi kơphê

Ngă tui Hơdră rŭ glăi tơlơi bơwih ƀong huă hăng pơđĭ kyar tui Hră pơtrun mrô 11 lơ 30/1/2022 mơ̆ng Kơnuk kơna, tal anai, Sang bruă prăk djru mơnuih mơnam tơring čar Gia Lai dưi pơpha rơbêh 100 klai prăk pioh ngă tui 2 hơdră: brơi čan djru ĕp bruă mă, brơi čơđai sang hră tơnap tap čan pioh hrăm hră, čan prăk djru pơdong sang dŏ kơ mơnuih tơnap tap. Ơi Nguyễn Văn Ngọc, Khua anom bruă sang bruă prăk djru mơnuih mơnam tơring glông Đak Đoa, Gia Lai brơi thâo:

“Tơhnal pơkă lĕ djru mơnuih ƀôn sang hơmâo prăk pơđĭ kyar bơwih ƀong huă, hơđong tơlơi hơdip mơda, rŭ glăi bruă ngă hmua pla pơjing. Tơdơi kơ brơi čan prăk, ta ăt khom nao sem lăng bruă mă yua prăk kăk mơ̆ng mơnuih ƀôn sang djơ̆ hơdră mơ̆n; ngă hrom hăng djop sang bruă laih anun khul grup mơnuih mơnam, hyu ĕp lăng re se, bruă mă yua prăk kăk čan, kiăng tañ ƀuh laih anun pơsir hŭi rơngiă prăk čan soh sel”.

Hrom hăng Gia Lai, rơnuč blan pă rơgao, Sang bruă prăk djru mơnuih mơnam djop tơring čar kual Dap Kơdư brơi čan prăk tui Hră pơtrun mrô 11/NQ-CP mơ̆ng kơnuk kơna kơ hơdră rŭ glăi hăng pơđĭ kyar bơwih ƀong huă mơnuih mơnam. Tum teč biă ñu, ƀơi Dak Lak hơmâo brơi čan 5 klai kơ ƀing čan blung a. Amăng anun, hơmâo 83 čô tuai čan tui hơdră djru pơsir bruă mă, pok prong bruă mă rơnoh prăk 4 klai 200 klăk prăk. Tui hăng akŏ bruă, tơring čar Dak Lak dưi hơmâo dêh čar djru 71 klai pioh pok pơhai 3 amăng 5 kơčăo bruă brơi čan tui Hră pơtrun mrô 11/NQ-CP, amăng anun, brơi čan pơsir bruă mă, djă bong bruă mă hơđăp rơnoh prăk brơi čan 50 klai; brơi čan prăk pioh pơdong sang djru mơnuih tơnap tap 20 klai prăk….

Ƀơi Lâm Đồng, anom bruă sang bruă prăk djru mơnuih mơnam tơring čar ăt pơphun brơi čan prăk tui hră pơtrun mrô 11/NQ-CP mơ̆ng kơnuk kơna. Anun lĕ hơdră djru čan pioh pơsir bruă mă, djă hnong bruă mă kơ 50 čô mơnuih mă bruă, abih tih rơnoh prăk 3 klai ƀơi tơring glông Di Linh hăng Dăm Rông. Hăng ƀing brơi čan lu biă mă ñu lĕ ƀing ngă bruă mơ̆ng ƀôn prong glăi pơ plơi pla, tơdơi kơ bơbeč djơ̆ klin kheng covid 19, čan prăk kiăng hơđong tơlơi hơdip mơda. Thun blan rơgao, sang bruă prăk djru mơnuih mơnam tơring čar Lâm Đồng hơmâo brơi 15 boh anom bruă sĭ mơdrô čan tla prăk blan kơ 4.600 čô  mơnuih yua pơdơi bruă lơ̆m klin kheng ngă, rơnoh prăk čan truh 18 klai.

Bruă pok pơhai hơdră bruă čan anai pơsir bruă mă, djă hnong hăng pok prong pơsir bruă mă tui Hră pơtrun mrô 11/ND-CP mơ̆ng kơnuk kơna kiăng ngă djop anŏ kiăng kơ lu mơnuih bưp tơlơi tơnap tap yua klin kheng covid 19 ngă laih anun rŭ glăi, pơđĭ kyar bơwih ƀong huă mơnuih mơnam.

Nay Jek: Pơblang