Tha plơi Y Đheh Ayun, 65 thun, djuai ania Êđê, ƀơi ƀuôn Phơng, să Ea Tul, tơring glông Čư̆ M’gar, tơring čar Dak Lăk mut Ping gah mơ̆ng ñu 25 thun. Ñu hơmâo ană plơi abih pran kơnang yua dah ñu lăi lĕ ñu khŏm ngă mơtăm. Amăng plơi, sang anŏ hlơi thơi tơnap tap ñu mơtăm gơgrong brơi iâu pơthưr, djru ba prăk hăng pơtô brơi hơdră bơwih ƀong. Ƀơi hơdôm mông jơnum plơi, tha plơi Y Đheh Ayun ăt pioh mông lăi nao hơdôm hơbô̆ bruă klă, hơdră ngă bruă phrâo mơ̆ mơnuih ƀôn sang amăng plơi dưi ngă tui đah mơ̆ng pơđĭ kyar tơlơi bơwih ƀong sang anŏ. Pô ñu ăt juăt ngă hrŏm hăng ping gah, gong gai să pơphô bruă kơ Khua grup ping gah plơi kơ bruă rơnuk rơnua hơđong amăng plơi. ơi Y Đheh Ayun lăi:

“Mơ̆ng hlâo truh kơ ră anai neh met wa kual mơnuih ƀôn sang djuai ƀiă ƀơi buôn Phơng lăi hrŏm ƀu hơmâo pô hlơi ôh ƀong ia bah ƀing ƀu klă, pơčut pơčao kah ania pơpha djuai, plư ană plơi pơ anai. Dua dong lĕ pơtô brơi neh met wa khŏm djă pioh gru grua boh thâo hiam mơng djuai ania Êđê hơđăp ƀơi anai”.

Hăng tha plơi Y Ngôn Knul, ƀơi ƀuôn Tria, să Ea Tul, tơring glông Čư̆ M’gar, tơring čar Dak Lăk, 30 thun jing mơnuih ping gah Cộng sản Việt Nam lêng kơ pơtă glăi pô ñu thâo hluh tơlơi gơgrong bruă hăng nao hlâo ngă tui tơlơi pơtrun mơ̆ng Ping gah, tơlơi phiăn mơ̆ng Kơnuk kơna. Rim hrơi, ơi Y Ngôn Knul ăt nao pơ rim boh sang amăng kơnung djuai kiăng thâo hluh tơlơi hơmâo, tơlơi pơmin pran jua, pơtă pơtăn pơtô ba ană tơčô amăng kơnung djuai ngă tui tơlơi phiăn, huăi hơdip soh glăi, ngă bruă răm ƀăm. Ƀu kơnong tui anun đôč ôh, ơi Y Ngôn Knul ăt jing pô rơgơi mơbruă amăng bruă hyu pơtô pơblang, jak iâu ană plơi gum pơgôp, khăp pap, djru ba ană plơi.

“Amăng hrơi blan rơgao gơmơi hơmâo pơphun pơtô pơblang kơ ană plơi ƀơi ƀuôn Tria, biă ñu lĕ djru pơsir kơđi amăng sang anŏ, kah hăng kơđi rơkơi bơnai, ană bă bơrơdjơ̆ sao. Hlâo či phăt kơđi, gơmơi ăt hơduah ĕp yua hơget hơmâo tơlơi bơrơdjơ̆ amăng sang anŏ. Mơ̆ng anun gơmơi hơmâo jơlan phăt brơi, ngă bơmơ-ak brơi sang anŏ. Lăi nao abih bang bruă gơmơi bơyai brơi lêng kơ mơ-ak soh”.

Tui hăng ơi Lê Quang Bất, Khua Jơnum min mơnuih ƀôn sang să Ea Tul, tơring glông Čư̆ M’gar, amăng hơdôm boh plơi pla djuai ania Êđê, tha plơi jing mơnuih ană plơi kơnang đah mơ̆ng wai lăng hơđong rơnuk rơnua plơi pla. Rơnuk anai, hrŏm hăng ngă mơnuih ping gah, gơñu hơmâo lu tơlơi gum pơgôp prong, anun lĕ tơhan glông drju ba gong gai pơtô pơblang tơlơi phiăn, hơdră djru mơ̆ng kơnuk kơna, nao hlâo ngă tui tơlơi pơtrun, djă pioh gru grua hiam, djru ngă hơđong tơlơi hơdip mơda hăng rơnuk rơnua plơi pla”.

“Tha plơi hăng mơnuih ană plơi đăo kơnang jing mơnuih hơmâo boh pơhiăp yôm biă amăng plơi pla djuai ania ƀiă. Gơñu hơmâo hơdră pơtô phara kiăng mơnuih ƀôn sang đăo kơnang kơ Ping gah, Kơnuk kơna, ăt kah hăng tơlơi phiăn kơnuk kơna pơtrun. Djru ngă hơđong tơlơi bơwih ƀong mơnuih mơnam ƀơi să amăng thun blan rơgao”.

Kiăng pơtrut tui tơlơi grong bruă mơ̆ng tha plơi, mơnuih ană plơi kơnang amăng kual mơnuih ƀôn sang djuai ƀiă, yă Nay H’Nan, Kơ-iăng khua Ping gah tơring glông Čư̆ M’gar, Dak Lăk brơi thâo:

“Mơnuih ană plơi kơnang amra pơtruh brơi djŏp tơlơi pơhing, hơdră djru, Tơlơi pơtrun mơ̆ng Ping gah, Kơnuk kơna hăng mơnuih ƀôn sang. Gơñu jing mơnuih hơmâo ping gah, gong gai pơphun pơtŏp bruă, pơtô brơi tơlơi thâo ngă bruă, mơ̆ng anun sit pô gơñu thâo hluh tui, pơtô brơi ană plơi thâo. Mơ̆ng anun iâu pơthưr mơnuih ƀôn sang ngă hơdră pơđĭ kyar bơwih ƀong huă - mơnuih mơnam, djă bong rơnuk rơnua hơđong; akŏ pơdong tơlơi hơdip hiam phrâo, mơ̆ng anun pơhlôm brơi tơlơi đĭ kyar amăng kual mơnuih ƀôn sang djuai ƀiă”.

Dak Lăk ră anai hơmâo 942 čô tha plơi hăng mơnuih ană plơi kơnang amăng kual mơnuih ƀôn sang djuai ƀiă. Anai jing mơnuih gum pơgôp prong biă amăng bruă akŏ pơdong Ping gah, gong gai, anom bruă kơđi čar; pơtrut đĭ kyar  bơwih ƀong huă mơnuih mơnam, djă lui gru grua hiam mơ̆ng djŏp djuai ania amăng kual plơi pla.