VOV4.Jarai - Khua ding jum wai lăng bruă kơnuk kơna Phạm Thị Thanh Trà brơi thâo, thun anai, đơ đam dêh čar kiăng pơhrua nao dong 27 rơbâo 850 čô nai pơtô tui djơ̆ phiăn pơkă. Tơdah ƀu dưi pơsir, anai amra lĕ sa tơlơi bơngot biă mơng mơnuih mơnam. Tui tơlơi jŭ yap, mrô nai pơtô kơƀah amăng đơ đam dêh čar ta ră anai lĕ rơbêh kơ 94 rơbâo 714 čô nai. Hluai tui rơnoh pơkă nai pơtô čơđai sang hră ƀơi anih pơtô, ră anai gơnong bruă pơtô pơhrăm dô̆ kơƀah 65 rơbâo 980 čô nai. Khua ding jum wai lăng bruă kơnuk kơna Phạm Thị Thanh Trà lăi, tơdah ƀu pơhrua nao thơ amra tơnap biă kơ bruă pơtô pơhrăm ră anai. Yua kơ mơnuih ƀôn sang đĭ lu, amra đĭ mrô čơđai lu biă, biă ñu čơđai muai. Lu tơlơi akă pơsir mơng bruă pơtô pơhrăm ră anai khom pơsir pơđut, tơdah ƀu pơsir amra tơnap biă kiăng dưi pơhlôm tơlơi pơđĭ kyar mơng bruă pơtô pơhrăm. Pơ̆ anăp anai, Grŭp pơphun bruă mă kơnuk kơna hăng Ding jum wai lăng bruă kơnuk kơna amra yap glăi mrô nai pơtô kiăng mơng anun Ding jum kơđi čar pơsit kơ bruă wai lăng nai pơtô tui tơlơi pơkă amăng tơlơi phiăn./.

Siu H’ Prăk: Pơblang