VOV4.Jarai - Amăng rơwang thun 2021-2025, amra hơmâo giăm 230.000 boh sang anŏ ƀun rin amăng kual plơi pla amra djru man pơdong sang dŏ, kiăng ƀơƀrư̆ hơđong tơlơi hơdip mơda, pơgôp pơhrŏ trun rin rơpa hơđong kjăp. Anai lĕ tơlơi črâo trun hơmâo Ding jum man pơdong ngă tui tơlơi pơtrun mơng Kơnuk kơna kơ hơdră bruă djru brơi sang anŏ ƀun rin sang dŏ rơwang thun 2021-2025. Kiăng kơ pơgôp pơsir hĭ tơlơi kiăng djru brơi sang dŏ ƀơi hơdôm kual ƀon lan glăk lu ră anai, rơwang thun 2021-2025, ră anai hơmâo 2 jơlan hơdră tui hơnong pơkă dêh čar hơmâo boh tơhnal djru sang dŏ brơi mơnuih ƀun rin lĕ: Jơlan hơdră tui hơnong pơkă dêh čar amăng pơđĭ kyar bơwih ƀong huă- mơnuih mơnam ƀơi kual mơnuih djuai ania ƀiă hăng kual ataih, asuek rơwang thun 2021-2030, rơwang tal 1 mơng thun 2021-2025 hăng Jơlan hơdră tui hơnong pơkă dêh čar amăng pơhrŏ trun ƀun rin hơđong kjăp rơwang thun 2021-2025. Samơ̆, bruă pok pơhai 2 jơlan hơdră tui hơnong pơkă anai ƀu pơphun djop anih amăng đơ đam dêh čar mơ̆ kơnong djru brơi sang anŏ ƀun rin ƀơi kual mơnuih djuai ania ƀiă đôč, kual ataih hăng hơdôm tơring glông ƀun rin.

Siu Đoan: Pơblang