Amăng hơdôm thun rơgao, khua mua, ling tơhan pơgang guai tơring čar Kon Tum hơmâo laih lu hơbô̆ bruă tŭ yua djru ba mơnuih ƀôn sang pơplih tơlơi bơwih ƀong kơ sang anŏ. Mơ̆ng akŏ thun 2025 truh ră anai, ƀơi djŏp jơlan guai glông rơbêh 292km ha mơguai hăng dêh čar Lao hăng Kur, khua mua, ling tơhan pơgang guai tơring čar Kon Tum glăk gum djru ruh abih sang dŏ ƀu rup, sang tơ̆i, djru ană plơi hơmâo sang dŏ, hơđong tơlơi hơdip.

Ƀu kơnong djru ba gong gai plơi pla tañ ngă giong bruă man pơkra sang dŏ phrâo brơi ană plơi tơnap đôč ôh, ƀing khua, ling tơhan pơgang guai ăt djru ba hơdôm boh sang anŏ dưi man pơkra sang dŏ yôm hloh hăng nua prăk Kơnuk kơna djru. Rơđah biă ñu, iâu pơthưr ƀing khua, ling tơhan, hơdôm anom bơwih ƀong, mơnuih thâo pap djru ba prăk kăk, ngă hiư̆m pă kiăng rim boh sang hơmâo nua mơ̆ng 85, 90 klăk prăk truh kơ lu hloh./.