Song Hoành lĕ 1 amăng hơdôm boh plơi pla amăng să Lưu Vĩnh Sơn, tơring glông Thạch Hà, tơring čar Hà Tĩnh truh ră anai aka ngă tui bruă pơtum glăi pơsir lŏn hmua. Bruă ngă tui jao lŏn hmua pơkă dưm dưm hăng mrô akŏ mơnuih amăng plơi pla, hơmâo anŏ klă, hơmâo mơ̆n anŏ aka ƀu klă, hơmâo anŏ giăm, hơmâo mơ̆n anŏ ataih, ngă kơ lu bruă ba yua lŏn tŭ kơ hơmâo, lŭk pŭk sui thun. Khă hnun, ƀơƀrư̆ pơsir hĭ bruă pơtum glăi đang hmua, pơblih ala hmua pơpha kơ mơnuih ƀôn sang, akŏ pơjing hmua đang sa anih jing king hmua prong, samơ̆ truh ră anai, tơlơi pơpha raih daih mơ̆ng hlâo, tŭ kơ hơmâo ăt dŏ đôč. Ƀơi anăp kơ tơlơi anai, ơi Ngô Văn Ngụ, Khua git gai ping gah plơi Song Hoành, pơdah rai pran jua mơak mơ̆n lơ̆m ƀuh Tơlơi phiăn Lŏn mơnai thun 2024 dưi ngă tui mơ̆ng lơ 1/8, amăng anun pơkă kơ bruă pơtum glăi đơ đam lŏn, ngă hmua ia brơi yua djơ̆ găl hăng tơlơi pơđĭ kyar phrâo ngă hmua hăng boh thâo ia rơgơi, pơtum đơ đam đang hmua prong blah:

“Anŏ gêh găl phara hơjăn mơ̆ng plơi Song Hoành, hmua ia ƀu dăo đơi ôh, hơmâo anih ƀơi kơdư, hơmâo anih ƀơi plung dơnung đơi, djuai lŏn ƀu djơ̆ hrŏm bơkơnar ôh. Yua kơ anun, pơblih hơdră yua lŏn, pơtum hĭ ngă bok, king hmua anet jing king hmua prong lĕ tơnap yơh. Yua kơ pơdjơ̆ nao tơlơi hơdip mơda mơnuih ƀôn sang. Yôm hloh dơ̆ng lĕ, bruă pơblih hmua ia lŏn đang, ngă hiư̆m pă dưi ngă djơ̆ atur bruă ngă hmua phrâo mơ̆ djơ̆ găl hăng pran jua kiăng mơ̆ng mơnuih ƀôn sang”.

Hà Tĩnh ăt jing sa amăng hơdôm tơring čar hơmâo lu să pơmut glăi hrŏm mơ̆ng thun 2019-2023, tơdơi kơ dăp hơdră anun, ră anai dŏ glăi 12 boh sang să ăt rơbêh, ngă huač hue prong biă mă. Amăng anun, hơmâo lu sang bruă ƀơi să phrâo tuh pơ alin man pơdong đôč rơngiă hơdôm klai prăk. Mơnuih ƀôn sang pơ anai dŏ čang rơmang Tơlơi phiăn Lŏn mơnai čih pơhrua phrâo anai dưi ba yua amăng tơlơi hơdip mơda amra dưi jŭ yap glăi hăng pơsir hĭ khut khăt anŏ gun hơdôm boh sang să rơbêh rơbai anai. Ơi Nguyễn Xuân Linh, Khua Jơnum min mơnuih ƀôn sang să ơi Bùi La Nhân, tơring glông Đức Thọ dŏ bơngơ̆t:

“Lơ̆m pơmut glăi klâo boh să ăt ƀu găl đơi ôh hăng anŏ pơkă prong laih anun lŏn pơpha pioh wai lăng. Yua kơ anun, khom ruah mă sang hră yơh pioh ngă anih mă bruă phrâo jăng jai. Ră anai, lơ̆m 3 boh sang să hlăk rơbêh. Mơnuih ƀôn sang kiăng biă mă, mơ̆ng lơ 1/8 tơlơi phiăn lŏn mơnai dưi ngă tui lĕ jŭ glăi abih, kiăng hơmâo hơdră pơsir tañ hloh. Kâo đăo sit Tơlơi phiăn lŏn mơnai dưi ngă tui sit nik amra dưi pơsir hĭ tơlơi rơbêh sang bruă să anai”.

Hlâo kơ anun, ƀơi mông jơnum lok 7 tal XV ƀing pơ ala mơnuih ƀôn sang dêh čar phrâo anai, tal blung a amăng gru phun čih pioh kơ dêh čar ta, ƀing pơ ala mơnuih ƀôn sang dêh čar pơsit brơi pơtrut tañ bruă ngă tui tơlơi pơkă amăng tơlơi phiăn, ming pơkra glăi hrơi mông kiăng ngă tui mơ̆ng tañ hloh Tơlơi phiăn Lŏn mơnai mơ̆ng lơ 1/8/2024, jing tañ hloh 5 blan pơkă hăng tơlơi pơtrun hlâo kơ anun. Tui anun yơh, mơ̆ng akŏ blan 8 anai, djop pô mơnuih ƀôn sang hlơi kiăng pơblih hră yua lŏn hla hră mriah hêm tơ̆i, sô hĭ kiăng ngă phrâo dơ̆ng, pơkă glăi anih lŏn ta či hơƀơi kiăng djơ̆ tong ten…amra dưi ngă glăi hră phrâo tui hăng tơlơi phiăn Lŏn mơnai 2024. Lăp đing nao lĕ, sa pok hră yua lŏn ia mriah hêm hơmâo jao aka ƀu ƀu hơmâo hră yua lŏn sit nik hlâo kơ lơ 1/7/2014, tơdah lŏn dŏ yua na nao sui thun hơđong, huăi bơrơsua nao rai, huăi ngă soh glăi tơlơi soh lŏn mơnai. Nai thâo kơđi Phạm Thanh Tuấn, Grup nai thâo kơđi  ƀôn prong Hà Nội lăi lĕ:

“Amăng tơlơi phiăn phrâo hơmâo pioh glăi sui thun mơ̆ng lơ 1/7/2014. Tơlơi pơtrun anai ngă gêh găl kơ mơnuih ƀôn sang yua lŏn hơđong sui thun giăm 10 thun, gơñu hơmâo mông gêh găl ngă hră pơblih hră yua lŏn. Tui hăng ƀing gơmơi anai lĕ bruă ngă pơblih phrâo yôm biă mă. Yua kơ lu tơlơi aka ƀu ngă giong hră pơar kơ bruă ba yua hră pô lŏn, lu kơ pơdjơ̆ nao pô yua lŏn samơ̆ ƀu hơmâo hră yua lŏn ôh, ră anai lŏn ăt dŏ yua đôč. Anai lĕ anŏ gêh găl pioh gơñu ngă hră yua lŏn sit nik”.

Hrŏm hăng anun, jơlan hơdră pơkŏn kơ lŏn mơnai ăt dưi ngă tui mơ̆ng lơ 1/8 kah hăng duh glăi, djru kơ bruă pơdong plơi phrâo brơi mơnuih ƀôn sang: tơdah pơdong glăi plơi phrâo ƀơi plơi prong khom ngă djơ̆ tơhnal pơkă plơi prong phrâo laih anun tơdah pơdong glăi plơi pla phrâo ƀơi kual plơi pla ăt khom ngă djơ̆ tơhnal pơkă plơi pla phrâo mơ̆n, hơmâo jơlan glông nao rai, apui yua, ia mơñum, anih anom gru grua hiam, bơwih brơi bruă mơnuih mơnam. Hơdôm jơlan hơdră mă glăi lŏn yua pioh kơ bruă čar lĕ, pơgang lŏn ia, lŏn pioh pơpha brơi kơ mơnuih ƀôn sang djuai ƀiă, bruă mă glăi lŏn mơ̆ng djop plah anom bruă kơnuk kơna wai lăng kyâo glai; jơlan hơdră pơkă nua lŏn mơnai, prăk kăk yua lŏn, pơkă hnơ̆ng, akŏ bruă yua lŏn….amra dưi pơsir lăp kiăng ngă rơhaih brơi kơ bruă yua lŏn mơnai hơmâo boh tŭ yua hloh.

Bruă tañ ba tơlơi phiăn lŏn mơnai ngă tui sit nik amăng tơlơi hơdip mơda hơmâo anŏ tŭ yua yôm biă mă. Samơ̆ sa tơlơi yôm hloh lĕ, hơdôm tơlơi pơtrun amăng tơlơi phiăn dưi ngă tui sit nik, bĕ hĭ anŏ ngă tơnap kơ mơnuih ƀôn sang, pơsir hĭ tơlơi ba yua lŏn phăk phai, rŭ glăi anŏ tŭ yua hơmâo rơnoh yôm hloh mơ̆ng lŏn mơnai bơwih brơi tơlơi hơdip mơda mơnuih ƀôn sang.