VOV4.Jarai - Amăng rơwang hrơi tơjuh laih rơgao, hơmâo pơphun Jơnum kơ bruă phiah phiăn blan 8 mơng Jơnum min apăn bruă Khua pơ ala mơnuih ƀon sang dêh čar. Amăng mông jơnum ania, Jơnum min apăn bruă Khua pơ ala mơnuih ƀon sang dêh čar pơgôp hiăp amăng 5 črăn tơlơi phiăn lăi pơthâo Khua pơ ala mơnuih ƀon sang dêh čar amăng jơnum lok 3 hăng 3 črăn tơlơi phiăn lăi pơthâo Khua pơ ala mơnuih ƀon sang dêh čar pơgôp hiăp amăng jơnum lok 4. Pơgôp hiăp amăng črăn tơlơi pơtrun ba tơbiă tơlơi pơkă jơnum Khua pơ ala mơnuih ƀon sang dêh čar (čih pơkra glăi), Khua pơ ala mơnuih ƀon sang dêh čar Vương Đình Huệ rơkâo pơhlôm ngă pô; tơlơi dưi, pran gơgrong mơng Khua pơ ala mơnuih ƀon sang dêh čar hăng hluai tui tơlơi sit nik.

Tơlơi pơkă amăng jơnum Khua pơ ala mơnuih ƀon sang dêh čar (čih pơkra glăi) kiăng pơgôp pơtrut bruă mă amăng Ƀirô Khua pơ ala mơnuih ƀon sang dêh čar jai hrơi klă ƀiă dong hăng hrưn đĭ lăp djơ̆, tŭ yua amăng hơdôm tal jơnum Khua pơ ala mơnuih ƀon sang dêh čar. Anŏ phrâo amăng tơlơi pơkă amăng hơdôm tal jơnum Khua pơ ala mơnuih ƀon sang dêh čar (čih pơkra glăi) anun lĕ tơlơi pơkă tong ten ƀiă dong kơ tơlơi gơgrong mơng khua mua lơ̆m nao jơnum  kah hăng lơ̆m ƀu dưi nao jơnum hrŏm. Lui hĭ tơlơi pơkă kơ bruă khŏm mơ-it nao hră pơ-ar nao kơ ƀing khua mơ̆ hơdai nao hră pơ-ar amăng điện tử; pơhrua tơlơi pơkă tong ten anăn hơdôm anom bruă, ƀing mơnuih kaih mơ-it nao hră pơ-ar.

Mông jơnum kơ bruă gah tơlơi phiăn blan 8

Truh ră anai, lu bruă dŏ pơmĭn phara, anun lĕ tơlơi pơkă kơ mông đĭ pơhiăp mơng Khua pơ ala mơnuih ƀon sang dêh čar amăng jơnum abih bang. Lu tơlơi pơgôp hiăp rơkâo ngă tui mông pơkă anun lĕ 7 mơnit  kar hăng tơlơi pơkă hơđăp kiăng kơ khua mua dưi lăi pơthâo tong ten hơdôm tơlơi ƀing gơñu kiăng. Gah ƀing pô git gai mông jơnum, ƀing khua mua rơkâo hơmâo tơlơi pơkă tong ten hơdôm anŏ kiăng hloh kơ ƀing mơnuih git gai jơnum rơkâo Khua pơ ala mơnuih ƀon sang dêh čar pơkă sui ƀudah aset ƀiă mông đĭ pơhiăp hăng lăi glăi tơlơi tơña. Khua jơnum min bơwih ƀong huă mơng Ƀirô Khua pơ ala mơnuih ƀon sang dêh čar Vũ Hồng Thanh rơkâo:

“Kiăng kơ pơhlôm tơlơi dưi mơng khua mua lơ̆m lăi pơthâo hơdôm tơlơi ƀing gơñu kiăng, sit biă ñu lĕ amăng hơdôm mông jơnum bơkơtuai, khua mua kiăng pơdah pran gơgrong mơng ƀing gơñu hăng ƀon lan ƀing gơñu tơbiă anăn đĭ ngă khua. Yua anun kiăng pơhlôm djơ̆ hrơi mông. Samơ̆ tơlơi pơplih kiăng kơ djơ̆ hơnong pơkă mơng anun mơnuih git gai amra ngă tañ ƀiă”.

Črăn tơlơi pơsit pơhrua tơlơi pơkă amăng bruă pơkhă nao rai amăng mông Jơnum kiăng kơ pơhlôm ngă pô amăng bruă mă mơng Khua pơ ala mơnuih ƀon sang dêh čar, ngă gêh gal kiăng khua mua lăi pơthâo rơđah hơdôm bruă đing nao. Hăng bruă tơña hăng lăi glăi, Jơnum min apăn bruă Khua pơ ala mơnuih ƀon sang dêh čar rơkâo ngă rơđah tơlơi pơkă kơ bruă brơi khua pơ ala mơnuih ƀon sang hơpă tơña kah mơng dưi bơrơjah glăi hăng mơnuih lăi glăi tơlơi tơña. Kơ-iăng Khua pơ ala mơnuih ƀon sang dêh čar Trần Quang Phương brơi thâo:

“Amăng mông lăi glăi tơlơi tơña mơ̆ ta bơrơjah, tơña ƀu tong ten. Bruă bơrơjah lĕ hơdôm bruă aka ƀu tong ten. Tơña glăi aka ƀu tong ten. Yua anun, tơlơi pơkă kơ mông đĭ pơhiăp ră anai amăng črăn tơlơi pơkă hơmâo 2 mơta. Amăng mông bơrơjah 3 mơnit, samơ̆ tơña, bơrơjah kơnong 2 mơnit. Tui kâo pơmĭn kiăng lui hĭ bơrơjah lơ̆m tơña mơ̆ tơña hăng lăi glăi ăt kơnong 1 mơnit đôč”.

Amăng mông jơnum, Khua pơ ala mơnuih ƀon sang dêh čar ơi Vương Đình Huệ lăi pơtong: Ƀirô Khua pơ ala mơnuih ƀon sang dêh čar lĕ anom bruă yua mơnuih ƀon sang ruah đĭ, yua črăn tơlơi pơtrun ba tơbiă tơlơi pơkă kơ jơnum Khua pơ ala mơnuih ƀon sang dêh čar (čih pơkra glăi) kiăng pơhlôm ngă pô; djơ̆ hăng tơlơi dưi; lăp djơ̆ hăng rơnuk phrâo; tong ten, tơpă sit; tŭ yua hloh; djơ̆ hăng tơlơi sit nik ră anai:

“Kiăo tui jơlan gah pơplih phrâo amăng bruă pơphun hăng bruă mă mơng Khua pơ ala mơnuih ƀon sang dêh čar, sit biă ñu pơhlôm tơlơi dưi hăng pran gơgrong mơng Khua pơ ala mơnuih ƀon sang dêh čar. Hơdôm tơlơi mơ̆ tui tơlơi dưi mơng Khua pơ ala mơnuih ƀon sang khŏm djop. Kiăng pơhlôm jơnum ngă hiưm pă kiăng khua mua dưi ngă tui tơlơi dưi anai. Ƀu hơmâo tơlơi pơgăn mơ̆ pơhlôm djơ̆ tơlơi dưi hăng pran gơgrong mơng khua mua. Tŏ tui pơplih hơdôm bruă akŏ phun mơng Khua pơ ala mơnuih ƀon sang dêh čar nao bruă pơčrông sai hăng bơrơjah dong”.

Hơdôm tơlơi pơgôp hiăp ăt rơkâo tơlơi pơkă bruă dong yua tui hluai lăp djơ̆ lơ̆m hơmâo bruă hơget thơ kah hăng lơ̆m klin ngă tơnap tap. Samơ̆, Khua pơ ala mơnuih ƀon sang dêh čar brơi thâo, anăm pơsit tong ten 2 mơta. Yua tơdah mă tơlơi dong yua amăng plang điện tử amăng sang jơnum mơ̆ ƀu mă amăng plang điện tử amăng mă telephôn dong tah.

Siu Đoan: Pơblang