Ƀing Khua pơ ala mơnuih ƀon sang hơmâo pơčrông sai ƀơi grup kơ črăn tơlơi pơtrun kơ bruă ngă lông lăng sa, dua hơdră bruă akŏ phun pơđĭ kyar plơi prong Buôn Ma Thuột, tơring čar Dak Lak. Ƀing khua mua hơmâo tŭ ư kiăng hơmâo tơlơi pơtrun kơ bruă ngă lông lăng sa, dua hơdră bruă yôm phara brơi plơi prong Buôn Ma Thuột, yua anai lĕ plơi prong akŏ phun amăng kual Dap kơdư, pơlir hăng hơdôm plơi prong kual Dơnung tong krah, kual Ngŏ Dơnung hăng kơplah wah 3 boh dêh čar Lao, Việt Nam hăng Kur; dưi pơtrut bơwih ƀong huă, gru grua hăng jing anih phun amăng bơwih ƀong huă mơnuih mơnam, pơgang rơnuk rơnua ƀơi kual Dap kơdư hăng đơ đam dêh čar. Ơi Trần Văn Tiến, Khua pơ ala mơnuih ƀon sang tơring čar Vĩng Phúc lăi rơđah:

“Bruă ba tơbiă tơlơi pơtrun mơng Khua pơ ala mơnuih ƀon sang dêh čar kơ ngă tui sa, dua hơdră bruă yôm phara amăng pơđĭ kyar plơi prong Buôn Ma Thuột lĕ kiăng hloh, kiăng pơtrut tañ pơjing plơi prong Buôn Ma Thuột jing plơi prong phun amăng kual Dap kơdư hăng pơtrut pơđĭ kyar bơwih ƀong huă mơnuih mơnam amăng kual Dap kơdư, anai lĕ kual arăng lăng yôm phăn amăng bruă wai pơgang rơnuk rơnua lŏn ia hăng amăng kual hơmâo lu mơnuih djuai ania ƀiă dŏ hơdip, samơ̆ tơlơi bơwih ƀong huă mơnuih mơnam dŏ kaih pơđĭ kyar yua anun kiăng hơmâo hơdră yôm phun kiăng pơtrut bơwih ƀong huă mơnuih mơnam amăng kual anai pơđĭ kyar”.

Khua Jơnum min prăk kak, ngăn drăp Kơnuk kơna mơng Ƀirô Khua pơ ala mơnuih ƀon sang dêh čar Nguyễn Phú Cường lăi pơthâo kơ bruă krăo lăng črăn tơlơi pơsit ngă lông lăng sa, dua hơdră bruă yôm phara kiăng pơđĭ kyar plơi prong Buôn Ma Thuột, tơring čar Dak Lak

Ơi Lê Ngọc Hải, Khua pơ ala mơnuih ƀon sang tơring čar Dak Lak lăi pơtong, ră anai Buôn Ma Thuột ăt dŏ kơƀah hăng dŏ tơdu amăng djop mơta bruă, sit biă ñu anih anom, jơlan glông, yua anun črăn tơlơi pơtrun kiăng kơ ba rai hơdră yôm phara, pơplih phrâo kiăng pơhưč tuh pơ alin amăng kual anai:

“Bruă kiăng đing nao mơng anom bơwih ƀong sĭ mơdrô, yua jơlan nao rai tơnap tap biă mă, yua anun bruă mă mơng hơdôm anom bơwih ƀong sĭ mơdrô amăng hơdôm ƀon lan amăng kual Dap kơdư kah hăng plơi prong Buôn Ma Thuột bưp tơnap tap mơn, yua anun kâo pơmĭn kiăng mă jia aset brơi hơdôm anom bơwih ƀong sĭ mơdrô kiăng pơhưč hơdôm anom bruă nao tuh pơ alin bơwih ƀong ƀơi kual mơnuih djuai ania ƀiă ƀơi Dap kơdư kiăng pơđĭ kyar bơwih ƀong huă mơnuih mơnam brơi klă hloh. Kah hăng kiăng wai lăng bruă dưm dăp man pơdong hăng hơmâo hơdră djru brơi ƀing rơgơi kơhnâo kah dưi pơhưč man pơdong plơi prong Buôn Ma Thuột klă hloh”.

Lu khua mua brơi thâo, hơdôm boh tơhnal bơdjơ̆ nao hơdôm hơdră bruă yôm phara amăng prăk kak, ngăn drăp, tuh pơ alin kiăng pơmĭn nao tong ten, yua sa, dua boh tơhnal aka lăp djơ̆ hăng hơdră hrŏm. Kơ bruă mă jia, ră anai hơdră djru mă jia brơi hơdôm anom bơwih ƀong sĭ mơdrô hăng ƀing mơnuih ƀơi kual tơnap tap, rin rơpa, samơ̆ lơ̆m ngă tui hơdră bruă amăng črăn tơlơi pơtrun anai ƀơi tơring čar Dak Lak kơnong đing nao kual pơđĭ kyar ƀiă, hơdôm ƀon lan pơkŏn ƀu hơmâo hơdră djru hơget ôh. Yua anun kiăng pơmĭn tong ten kah dưi pơhlôm bơkơnar, ha amăng plĕ amăng pok pơhai ngă tui tơlơi phiăn yua Khua pơ ala mơnuih ƀon sang dêh čar ba tơbiă. Laiw pơtong kiăng pơhưč mơnuih kơhnâo kơhnăk mă bruă ƀơi Buôn Ma Thuột, ơi Đỗ Tiến Sỹ, Khua pơ ala mơnuih ƀon sang tơring čar Hưng Yên brơi thâo:

“Tơlơi pơtrun ngă tui amăng 5 thun tui kâo pơmĭn kiăng pơhrơ̆i mơng 7-10 thun. Yua anai lĕ kual yôm phun tui tơlơi klah čun mrô 67 mơng Ding jum kơđi čar. Sa tơlơi dong lĕ hơmâo hơdră djru brơi ƀing rơgơi kơhnâo kiăng pơhưč nao mă bruă ƀơi hơdôm anom bruă bơdjơ̆ nao, amăng hrơi blan ngă tui tơlơi pơtrun anai kiăng lui mă jia amăng 5 thun. Tui kâo pơmĭn kiăng pơhưč dong kiăng pơhrơ̆i thun blan ngă tui amăng 10 thun kah dưi”.

Ơi Lê Tấn Tới (Khua pơ ala mơnuih ƀon sang tơring čar Long An), Khua jơnum min wai pơgang rơnuk rơnua

Pơsit tong, hăng 4 grup hơdră bruă hơmâo ba tơbiă amăng črăn tơlơi pơtrun kơ hơdră akŏ phun brơi plơi prong Buôn Ma Thuột, ơi Nguyễn Tuấn Anh (Khua pơ ala mơnuih ƀon sang Long An) brơi thâo, tơdah tơlơi pơtrun anai hơmâo Khua pơ ala mơnuih ƀon sang dêh čar tŭ yap, anai lĕ tal blung a Khua pơ ala mơnuih ƀon sang pơsit hơdră akŏ phun brơi sa boh plơi prong lĕ anih anom kơđi čar gưl tơring glông, yua anun ƀing khua mua čang rơmang hơdôm tơlơi rơkâo mơng Khua pơ ala mơnuih ƀon sang kah hăng mơnuih ƀon sang amra kơsem min, sem lăng, pơhrua kiăng pơjing plơi prong ba gru amra pơtrut pơđĭ kyar djop ƀon lan. Rơngiao kơ 4 grup hơdră bruă hơmâo ba tơbiă amăng črăn tơlơi pơtrun, ơi Nguyễn Tuấn Anh rơkâo Khul čih pơkra kiăng sem lăng sa, dua tơlơi pơgôp mơng mơnuih ƀon sang. Sit biă ñu, jao Khul pơ ala mơnuih ƀon sang plơi prong dưi kah pha mă yua ngăn drăp plơi prong kiăng kơ dưi đĭ tui prăk apah brơi ƀing mơnuih apăn bruă amăng kual wai lăng kơnuk kơna, anih anom kơđi čar mơnuih mơnam hăng anom bruă kơnuk kơna yua plơi prong wai lăng tui tơlơi tŭ yua mơng bruă pơkŏn, samơ̆ amra apah prăk đĭ ƀiă tui tơlơi pơkă amăng tơlơi phiăn ră anai kơ hơdră prăk kak hăng hơdôm anom bruă kơnuk kơna. Hơdră bruă anai ăt kar kăi hăng Khua pơ ala mơnuih ƀon sang dêh čar brơi ngă tui amăng tơlơi pơtrun mrô 54 thun 2014 kơ hơdră bruă yôm phara amăng pơđĭ kyar ƀôn prong Hồ Chí Minh.

Tŭ ư hăng 4 hơdră yôm phara brơi plơi prong Buôn Ma Thuột, ơi Lê Tấn Tới (Khua pơ ala mơnuih ƀon sang tơring čar Long An), Khua Jơnum min wai pơgang rơnuk rơnua, ăt hơmâo tơlơi pơgôp dong amăng hơdră bruă anai kiăng kơtưn amăng wai pơgang rơnuk rơnua brơi plơi prong yua Buôn Ma Thuột lĕ ƀơi kual Dap kơdư,  yua kual Dap kơdư lĕ anih phun amăng wai pơgang rơnuk rơnua, ƀu djơ̆ kơnong ƀơi kual Ngŏ ƀudah kual Yŭ đôč ôh, yua anun hơdôm hơdră yôm phara kiăng pơđĭ kyar bơwih ƀong huă mơnuih mơnam amăng plơi prong Buôn Ma Thuột lĕ yôm phăn biă mă samơ̆ kiăng pơlir hơbit pơđĭ kyar bơwih ƀong huă hăng wai pơgang rơnuk rơnua, yua pơhlôm hơđong kah dưi pơđĭ kyar bơwih ƀong huă. Yua anun, ơi Tới rơkâo kiăng hơmâo hơdră yôm phara brơi kông ang, ling tơhan wai pơgang ƀơi kual anai.