VOV4.Jarai - Lơ 16/3, hơmâo mông tơña blung a mơng Jơnum min apăn bruă git gai pơ ala mơnuih ƀon sang dêh čar tal 15 pơphun hăng tơlơi tơña kơ Khua ding jum pơkra gơnam sĭ mơdrô Nguyễn Hồng Diên lăi nao jum dar bruă wai lăng bruă blơi mut, nua ia săng ia jâo, sa gơnam kiăng yua biă mă amăng bruă pơkra gơnam lăi hrŏm. Khua ding jum Nguyễn Hồng Diên brơi thâo: Dêh čar ta hơmâo 17 rơbâo anih sĭ ia săng ia jâo, ƀing apăn bruă hơmâo nao lăng laih ƀơi 16.800 anih sĭ mơdrô, hơmâo ƀuh 211 anih sĭ ia săng krư̆ amăng ƀu sĭ dong tah.

Khua ding jum pơkra gơnam sĭ mơdrô Nguyễn Hồng Diên.

Krư̆ amăng pơdơi sĭ lĕ yua glăk pơkra ming, hơmâo mơn anih sĭ ia săng ia jâo đa lĕ yua sang măi hlong ia jâo Nghi Sơn tŭ kơ pơdơi bruă anun jing ƀu thâo mă mơng hơpă dong tah. Laih dong brơi thâo, Ding jum pơkra gơnam sĭ mơdrô amra bơtơhmal mơtăm tơdah ƀuh pô hlơi pioh lui ia săng ia jâo truh đĭ kah mơng sĭ. Ƀing khua pơ ala hơmâo tơña kơ Ding jum pơkra gơnam sĭ mơdrô hơmâo hơdră pơsir hơget mơn đah mơng ngă trun ƀiă nua ia săng ia jâo, pơsir brơi tơlơi tơnap kơ bruă pơkra gơnam, sĭ mơdrô, Khua ding jum pơkra gơnam sĭ mơdrô lăi, tơlơi anun tui hluai kơ anih sĭ mơdrô ƀơi rŏng lŏn tơnah mơn.

Siu H’Mai: Pơblang