Ƀu hơmâo tơña lăi glăi tơl bơrơjah nao rai ôh ƀơi mông jơnum, samơ̆ tơña tơpă, lăi glăi tong ten ƀu bĕ dơneh hĭ tơlơi hơgĕt ôh, lăi glăi hăng tơlơi gơgrong ba sit nik mơ̆ng ƀing khua mua apăn akŏ anom bruă, kiăng pơsir hĭ hơdôm tơlơi tơnap tap, gun gan pioh djru pơtrut pơđĭ kyar bơwih ƀong huă mơnuih mơnam dêh čar.

Tơpă hnong hăng gơgrong ba. Anun lĕ tơlơi pơƀuh hrŏm mơ̆ng abih bang ƀing pơ ala mơnuih ƀôn sang amăng 2 hrơi mơkrah tơña lăi glăi. Ƀing pơ ala mơnuih ƀôn sang dêh čar tơña ber hăng hơbôt đôč, rơđah rơđong djơ̆ hăng tơlơi kiăng thâo, lăi nao hơdôm tơlơi hlăk hơmâo amăng bruă mă hơdip mơda dŏ dong ƀong huă rim hrơi; biă mă ñu, ƀu kư guăm, hŭi ƀudah dơneh ôh anŏ či lăi nao tơlơi pơhing hlăk hơmâo ră anai amăng mơnuih mơnam. Tơpă mơtam pơčrâo rơđah hơdôm tơlơi dŏ gun, kơƀah, ƀing pơ ala mơnuih ƀôn sang čang rơmang ƀing ding kơna amăng kơnuk kơna, djop ding jum, anom bruă ăt khom hơmâo hơdră pơsir khut khăt, tŭ yua, yua tơlơi pơđĭ kyar tañ, hơđong kjăp kơ dêh čar:

“Tơña lăi glăi hăng mông jơnum kơdok kơdor mơtam, tơpă hnong, pơtum nao mơ̆ng rim črăn bruă tơlơi git gai mơ̆ng Khul khua mua git gai mông jơnum ăt kah hăng tơlơi pơgôp hiăp mơ̆ng pô tơña hăng lăi glăi mơ̆ng ƀing khua mua apăn akŏ gơnong bruă, tơlơi lăi glăi mơ̆ng Kơ-iăng khua dêh čar hăng pran jua lăi glăi tơpă hnong laih anun djru gum ba soh”.

“Hơdôm tơlơi tơña mơ̆ng ƀing pơ ala mơnuih ƀôn sang mơ-it nao kơ khua apăn akŏ gơnong bruă hơmâo lăi glăi djơ̆ tơpă laih anun ăt tong ten mơ̆n. Kâo ƀuh hiam biă mă yua hơdôm hơdră mă bruă pơsir mơ̆ ƀing khua ding jum pơdah thâo”.

Pă čô khua ding jum, anom bruă jing pă čô khua apăn akŏ gơnong bruă ƀơi gơnong dlông lăi glăi tơlơi tơña lêng kơ ƀing khua ding jum, anom bruă tal blung a lăi glăi hăng ƀing pơ ala mơnuih ƀôn sang dêh čar tal 15. Hăng pran jua pơƀuh rơđah tơlơi glăm ba ƀudah gơgrong sit amăng bruă mă, lăi pơthâo rơđah rơđong hơdôm hơdră pơsir laih anun tơlơi ƀuăn amra git gai, wai lăng, pơčrâo bruă, ƀing khua ding jum, anom bruă ƀu leč ôh hăng tơlơi tơña laih anun pơčrong sai hrŏm hăng ƀing pơ ala, hơmâo hơdră pơsir tong ten tum teč soh djop tơlơi tơña mơ̆ng ƀing pơ ala. Hơmâo hơdôm čô pô pơ ala pơƀuh tui anai:

“Kâo ƀuh Khua ding jum kông ngăn lŏn glai hăng Ayuh hyiăng kjăp pran jua, lăi glăi tơpă hnong djop tơlơi tơña mơ̆ng ƀing pơ ala mơnuih ƀôn sang. Črăn khua ding jum lăi glăi sa črăn lơ̆m rơma kâo tŭ ư biă. Kâo yơr hnăl rơkâo pơčrong hrŏm kiăng tơña rơđah thim hơdôm bruă mă arăng kơsing nao amăng ia rơsĭ, bruă hyu mă čuah ngă bơbeč djơ̆ anih hơdip amăng ia rơsĭ”.

“Anom bruă Tuh tia hăng sĭ mơdrô, jing anom bruă kơnuk kơna jao wai lăng hơmâo kơsem min, pơtong rơđah hơdôm bruă mă mơ̆ng phun ñu pơpă ngă kơ lu sang bruă sĭ mơdrô tơbiă đuăi mơ̆ng anih anom sĭ mơdrô. Hơdôm sang bruă sĭ mơdrô anun sĭ mơdrô djuai gơnam tam hơgĕt? Thun mă bruă mơ̆ng anom bruă anun hơdôm kiăng hơmâo jơlan hơdră pơsir brơi tơlơi anun. Rơđah rơđong hnun kah ƀing ta mơ̆ng dưi hơmâo jơlan hơdră djru ba lăp kơ anom bruă sĭ mơdrô”.

Lăi glăi ƀơi anăp ƀing pơ ala mơnuih ƀôn sang dêh čar, Khua ding jum Kông ngăn lŏn mơnai hăng ayuh hyiăng ơi Đặng Quốc Khánh, pơčrâo rơđah tơlơi tơnap tap gah gơnam yua man pơdong hơdôm ring bruă, kơčăo bruă pơprong mơ̆ng dêh čar, biă mă ñu kơčăo bruă čuk pơkra jơlan rơdêh đuăi hmar; lăi pơthâo lu hơdră pioh “rŭ pơhơdip glăi” djop “hnoh ia krông thu” yua kơ anŏ hơƀak jrak hăng adai pơ-iă kơtang ngă. Lăi pơtong kơ bruă đing nao pơđĭ kyar gru grua hiam kual mơnuih ƀôn sang djuai ƀiă, Khua ding jum Gru grua Pơrơguăt drơi jăn hăng tuai čuă ngui ơi Nguyễn Văn Hùng lăi lĕ: tơlơi phiăn pơkă kơ bruă mă gah gru grua jing sa tơlơi kiăng hăng anŏ gêh găl akŏ pơjing anih dŏ jum dar hơmâo gru grua hiam. Laih dơ̆ng brơi thâo, amra hơmâo jơlan hơdră phrâo ngă gêh găl brơi klă hloh ƀing rơjang drơi jăn, ƀing kơtang, kơhnâo kơhnăk adoh suang hơmâo anŏ tŭ yua tơdơi kơ abih thun hyu pơplông, pơdah adoh suang.

Lăi glăi ƀơi anăp ƀing pơ ala mơnuih ƀôn sang dêh čar, Kơ-iăng Khua dêh čar, ơi Trần Hồng hà lăi pơtong hơdôm hơdră pơkă glăi rơnoh sĭ mơdrô kiăng pơhlôm brơi bruă ngă pơgăn hĭ hŭi prăk trun nua lơ̆m pơblih pơđĭ prăk blan mơ̆ng lơ 1/7 thun anai. Pô ala Phạm Thị Thanh Mai, grup mơ̆ng Hà Nội lăi lĕ:

"Kơ-iăng khua dêh čar jing mơnuih thâo hruaih laih amăng bruă lăi glăi tơlơi tơña ƀơi mông jơnum ƀing pơ ala mơnuih ƀôn sang dêh čar. Ƀing gơmơi ƀuh hơdôm tơlơi yua mơ̆ng bruă arăng tơña kơ Kơ-iăng khua dêh čar, ñu thâo tong ten hăng lăi glăi lăp, tơpă hnong mơtam. Hơmâo boh yôm phun tum teč hăng wơ̆t bruă mă sui thun yôm pơphăn hai, gơmơi čang rơmang khom hơmâo hrơi blan mơ̆n či ƀuăn rơ̆ng ngă tui laih anun khom hơmâo akŏ bruă. Tơlơi anun yôm biă mă pioh kơ mơnuih ruah khua, mơnuih ƀôn sang, ăt kah hăng ƀing pơ ala pô krăo lăng”.

Hrŏm hăng lu hơdră pơsir laih anun tơlơi ƀuăn dưi hơmâo ƀing khua ding jum, anom bruă hơmâo lăi pơthâo ƀơi mông jơnum lok anai, ƀing pơ ala hăng mơnuih ruah khua čang rơmang tơlơi phiăn pơkă kơ bruă krăo lăng amra dưi ngă tui tơpă đah mơ̆ng pơhlôm brơi djop tơlơi ƀuăn hơdră ngă anun tŭ yua, ba glăi boh tơhnal hiam klă amăng bruă mă rim hrơi./.