VOV4.Jarai-Ƀơi Hà Nội, phrâo Jơnum pơčrông bruă mă mơ̆ng dêh čar pioh kơ hlăk ai hăng akŏ ñu “Pơtô hrăm bruă mă kơ hlăk ai”. Jơnum anai, kiăng pơtong glăi tơlơi hơmâo, lăi pơthâo mrô bruă mă sit nik brơi kơ Jơnum min hăng djop anom bruă gah sang bruă khua pơ ala mơnuih ƀôn sang dêh čar, kiăng rơkâo đĭ ƀing khua mua pơ ala, Kơnuk kơna thâo hơdôm jơlan hơdră pơtô hrăm bruă mă kơ hlăk ai djơ̆ găl hăng rơnuk rơnua phrâo.

 Pơhiăp amăng mông jơnum, Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn rơkâo: tui hăng tơlơi rơkâo mơ̆ng hlăk, djop anom bruă khom kơsem min, rơkâo đĭ khua mua pơ ala mơnuih ƀôn sang dêh čar, Kơnuk kơna ngă hră pơtrun ĕp hơdră pơsir hmao kru, ruh hĭ tơlơi tơnap tap, hơmâo jơlan hơdră kơtang pơtô hrăm bruă mă kơ hlăk ai, lir hơbit hăng hơdră rŭ glăi hăng pơđĭ kyar bơwih ƀong huă mơnuih mơnam lŏn ia.

Ƀơi mông jơnum bơkơtuai nao rai, hlăk ai kah pơpha tơlơi kiăng, čang rơmang rơkâo đĭ hăng djop sang bruă kơnuk kơna kơ bruă pơtô hrăm bruă mă kơ hlăk ai. Mơ̆ng anun, djru kơ lu anom bruă kơnuk kơna thâo tong ten hăng pơsir, pơgôp hrom pơđĭ tơlơi thâo hluh kơ hlăk ai hăng abih bang mơnuih mơnam hluh kơ jơlan hơdră pơtô hrăm bruă mă. Ayong Nguyễn Tường Lâm, Khua git gai anom bruă tơdăm dra mut phung rơnuk HCM dêh čar lăi, lu khul hlăk ai pơdah thâo tơlơi pơčeh phrâo rơkâo djơ̆ hăng bruă mă sit nik:

“Gơmơi ruah mă 150 čô hlăk ai amăng anun hơmâo wơ̆t hlăk ai kiăng ĕp bruă mă, hơdôm ƀing hlăk ai ngă kông ñơn, hlăk ai kual plơi pla, ƀing tơhan abih thun ngă tơhan glăi pơ sang, hlăk ai djop kual, hrom hăng anun ƀing gơmơi hơmâo jak iâu rai mơ̆n samơ̆ ƀing apah mơnuih mă bruă, hlăk ai pơphun bruă mă pô čih hơdră pơsir bruă mă kơ hlăk ai pơkŏn…ră anai ƀing gơñu ăt hơmâo bruă prăp lui laih mơ̆n tơlơi či rơkâo đĭ”.

Jơnum hăng ƀing čih tơlơi pơhing phrâo lơ̆m jơnum pơčrông sai jơlan hơdră dêh čar pioh kơ hlăk ai Việt Nam

Ƀing tơdăm dra mut phung, hlăk ai hơmâo lăi pơthâo tơlơi tơnap tap ƀing gơñu, anŏ gun amăng bruă pơtô hrăm bruă mă laih anun hơduah ĕp bruă mă laih hrăm giong bruă kơ hlăk ai plơi pla, hlăk ai mơnuih djuai ƀiă, hlăk ai ƀu klă drơi jăn, hlăk ai ƀing tơhan abih thun ngă tơhan. Rơkâo hơmâo hơdră djru ba ngă gêh găl ĕp bruă mă hăng pơtô hrăm bruă mă djơ̆ găl hăng tơlơi thâo mơ̆ng ƀing gơñu.

Lăi glăi tơlơi tơña mơ̆ng ƀing hlăk ai kơ hơdră pơtô hrăm bruă rơgơi phrâo, ơi Trương Anh Dũng, Khua anom bruă wai lăng pơtô bruă mă mơ̆ng Ding jum Bruă mă Tơhan rơka hăng Mơnuih mơnam brơi thâo: Ră anai kơnuk kơna hơmâo akŏ bruă pơđĭ kyar pơdong sang hră tŭ yua phrâo. Him lăng, thun 2025 hơmâo 70 boh sang ngă tui boh tŭ yua phrâo, 135 boh sang hră pơtô bruă mă phun djup gưl, amăng anun pơtô hrăm bruă mă pơdjơ̆ nao kơ boh thâo ia rơgơi. Phrâo anai, Ding jum lăi pơthâo laih anun kơnuk kơna tŭ ư brơi pơblih hăng jao hơdră pơtô hrăm mơ̆ng hơdôm dêh čar rơgơi pơdrong asah. Ră anai pok pơhai 12 hơdră lông ngă lăng mơ̆ng dêh čar Australia, hăng 25 hơdră mơ̆ng dêh čar Đức. Kơnuk kơna hăng Khua dêh čar hơmâo hơdră anăp ngă bruă laih anun pơtô brơi bruă mă kơ čơđai sang hră, ƀing hrăm bruă tơdơi kơ hrăm giong. Hơmâo ruah mă bruă hrăm anih pơtô hrăm bruă mă, lăi pơthâo, rup clip pơtô bruă mă tum teč:

“Tơlơi pơkă hăng anom brưa hơmâo tơlơi kiăng prong biă mă djop sang hră pơtô hrăm bruă mă pơkra hơdră či mă bruă prong, laih anun lông ngă tui pơtô lông lăng, Kơnuk kơna phrâo pơsit kơčăo bruă pơblih hăng mrô amăng bruă pơtô hrăm bruă mă, 4 tơhnal pơtrun pơkă kơčăo bruă dưi pok pơhai pơ anăp anai pơdjơ̆ nao tơlơi thâo hruaih amăng bruă mă yua mrô, man pơdong sang bruă, pơkra jơlan glông anih pơtô hrăm bruă mă”.

Kơnang kơ tơlơi rơkâo anun, hơdôm tơlơi kiăng mơ̆ng hlăk ai ƀơi mông jơnum bưp nao rai, Kơ-iăng Khua git  gai pơ ala mơnuih ƀôn sang dêh čar ơi Trần Thanh Mẫn rơkâo djop sang bruă mơ̆ng anom bruă pơ ala mơnuih ƀôn sang dêh čar, kơnuk kơna, djop ding jum anom bruă pơ gơnong dlông laih anun ĕp hơdră pơsir tŭ yua, pơblih hơdôm tơlơi pơmin pơčeh phrâo rơkâo anun jing bruă mă sit nik, kiăng pơđĭ tui bruă mă, mơnuih mă bruă, ba glăi boh tŭ yua lơ̆m bruă mă, pơtrut pơđĭ kyar bơwih ƀong huă, tơlơi thâo pơhno bruă mă. Ơi Trần Thanh Mẫn lăi:

“Jơnum min Gru grua, Pơtô hrăm mơ̆ng sang bruă pơ ala mơnuih ƀôn sang dêh čar, Ding jum Bruă mă Tơhan rơka hăng Mơnuih mơnam hăng Jơnum min wai lăng hlăk ai Việt Nam ăt ngă hrom tong ten, pok pơhai ngă tui klă laih anun krăo lăng ngă tui pơtô hrăm bruă mă kơ hlăk ai, laih dơ̆ng pơmin ĕp, rơkâo đĭ hăng khua mua pơ ala mơnuih ƀôn sang dêh čar, kơnuk kơna ngă hră pơtrun hmao kru pơsir hĭ tơlơi tơnap tap, hơdôm jơlan hơdră tŭ yua pơtrut kơtang bruă pơtô hrăm bruă mă kơ hlăk ai, lir hơbit hơdră rŭ glăi tơlơi pơđĭ kyar bơwih ƀong huă mơnuih mơnam lŏn ia”.

Ƀơi mông jơnum bưp nao rai hăng khua mua dêh čar tal anai, Kơ-iăng Khua dêh čar ơi Vũ Đức Đam lăi pơtong, khua mua pơ ala Ding jum bruă mă hơmâo lăi glăi tơlơi tơña  hơdôm tơlơi tơnap tap mơ̆ng hlăk ai, samơ̆ Ding jum anai ngă hrom lu anom bruă gơnong dlông pơčrông sai ĕp hơdră ngă tui sit nik hloh. Kơ-iăng khua dêh čar lăi lĕ, hăng ƀing hlăk ai, rơngiao kơ tơlơi thâo hơdeč amăng bruă mă kiăng hrăm dơ̆ng lu tơlơi thâo pơkŏn, kơsem min rơgơi pioh djru pơgôp hrom hăng ană plơi pla lu hloh dơ̆ng kơñ pơgi ni anăp.

Nay Jek: Pơblang