VOV4.Jarai - Dăp pơdah thâo ngăn drăp Kơnuk kơna mơng Việt Nam đĭ 9 črăn bơhmu hăng tal hơduah ĕp hlâo adih, dŏng tal 68 amăng mrô 120 bôh dêh čar dưi pơsit. Anai lĕ tơlơi pơhing lăp đing nao, brơi ƀuh tơlơi gir run mơng Việt Nam amăng bruă kơtưn lăi pơdah rơđah ngăn drăp Kơnuk kơna lŏn ia. Tui hăng bôh tơhnal Pel ĕp Ngăn drăp Kơnuk kơna pơhư đơ đam rŏng lŏn tơnah thun 2021, mrô črăn puang pioh kơ 3 glông phun hmâo lu yak anăp nao hăng leng kơ đĭ črăn bơhmu hăng tal hơduah ĕp hlâo, dưi hmâo rơnoh 44/100 puang pioh kơ glông pơdah rơđah ngăn drăp kơnuk kơna, 17/100 puang hăng glông gum hrom mơng djop mơnuih, hăng 80/100 puang hăng glông Lăng tui ngăn drăp Kơnuk kơna (hơdôm glông leng kơ đĭ 6 puang bơhmu hăng thun 2019). Puang ƀuh rơđah mơng Việt Nam lĕ tơlơi pơplih puang mrô kơ glông Tơlơi gum hrom mơng djop mơnuih, dưi hmâo rơnoh 17/100, lu hloh hơnong pơkă đơ đam rŏng lŏn tơnah lĕ 14/100. Ding jum prăk kak brơi thâo, pơ̆ anăp anai, amra ngă klă dong bruă lăi pơdah ngăn drăp Kơnuk kơna./.

Siu H’ Prăk: Pơblang