“Việt Nam hmâo mă laih lu tơlơi pơplih phrâo yôm phăn amăng pơtrut tơlơi dưi kơ neh wa djuai aniă ƀiă”. Anun lĕ tơlơi pơtŏng sit mơ̆ng Kơ-iăng Khua Ding jum – Kơ-iăng Khua Jơnum min djuai ania Y Thông, Khua Grŭp Việt Nam ƀơi tal jơnum lok 111 mơ̆ng Jơnum min pơkôl jar kơmar sut lui djop tơlơi kah pha djuai ania (CERD) phrâo pơphun ƀơi Geneva, Thụy Sỹ. Lăi pơdah tơlơi lăi glăi amăng tal jơnum, Kơ-iăng Khua Ding jum – Kơ-iăng Khua Jơnum min djuai ania Y Thông, Khua Grŭp Việt Nam ƀơi Jơnum min pơkôl jar kơmar sut lui djop tơlơi kah pha djuai ania lăi rơđah: Mơ̆ng thun 2013 truh ră anai, glông jơlan tơlơi phiăn Việt Nam dưi pơjing hăng ngă giong pơhlôm ha amăng plĕ mơn, djơ̆ hăng tơlơi dưi phun kơ ană mơnuih amăng anun pơhlôm tơlơi dưi hăng bôh tŭ yua lăp djơ̆ mơ̆ng neh wa djuai aniă ƀiă.

Amăng 10 thun rơgao, Khua pơ ala mơnuih ƀôn sang dêh čar Việt Nam hmâo mă yua laih 125 tơlơi phiăn, amăng anun hmâo 352 mơta tơlơi pơkă tơlơi phiăn ƀơi anăp bơdjơ̆ nao tơlơi dưi hăng bruă mă mơng djop djuai ania ƀiă. Hluai tui ƀơi anăp jar kơmar, Việt Nam gum hrŏm klă laih hơdôm bruă bơkơtuai, jơnum kơ tơlơi dưi ană mơnuih, pơgăn kah ania pơpha djuai, pơkôl ngă tui hơdôm tơlơi pơkôl jar kơmar mơ̆ Việt Nam lĕ ding kơna. Kơ-iăng Khua Ding jum – Kơ-iăng Khua Jơnum min djuai ania Y Thông pơtŏng sit glăi Việt Nam pơpŭ hăng pơhlôm hơdôm tơlơi dưi kơ djuai aniă ƀiă hăng mơnuih dêh čar tač rơngiao ƀơi Việt Nam, biă ñu mơ̆ng hrơi Việt Nam gum hrŏm tơlơi pơkôl jar kơmar sut lui tơlơi kah ania pơpha djuai amăng thun 1982./.