Amăng jang jar kmar Xa Mát lĕ sa amăng dua amăng jang prong hloh ƀơi tơring čar Tây Ninh hăng lu gơnam tam pơdŭ pơgiăng nao rai amăng ha hrơi. Hrŏm hăng bruă amra ƀuh arăng sĭ dŏp gơnam tam, yua anun anom bruă bơdjơ̆ nao lêng rang kơđiăng pok pơhai bruă pơgăn sĭ dŏp găn nao amăng jang. Sit biă ñu lĕ tơdơi kơ klin kheng tơdu trun, anom bruă wai lăng amăng jang Xa Mát hơmâo pơkiăo nao ling tơhan kah hăng hơdôm hơdră bruă mă kiăng pơhlôm gơnam tam dưi găn nao rai ƀơi amăng jang  hăng djru brơi hơdôm anom bơwih ƀong sĭ mơdrô amuñ pơdŭ pơgiăng gơnam nao rai kah hăng mơnuih dưi mut nao rai. Mơng akŏ thun truh ră anai ƀơi amăng jang jar kmar Xa Mát aka ƀu ƀuh bruă hơget ôh kơtang bơdjơ̆ nao sĭ dŏp gơnam. Ơi Nguyễn Nam Hồng Sơn, Kơ-iăng khua anom bruă wai lăng amăng jang Xa Mát brơi thâo:

“Bruă sĭ dŏp gơnam tam amra ƀuh lu dong, yua mơng hơdră pok phư kah hăng amuñ ngă hră pơ-ar, ƀing sĭ dŏp amra hluai tui hơdôm tơlơi anun kiăng pơdŭ pơgiăng gơnam tam hăng ƀu duh jia, sit biă ñu ƀơi amăng jang Xa Mát lĕ ha guai hăng dêh čar Kur lĕ kual ngă đang hmua. Yua anun bruă sĭ dŏp ƀơi amăng jang Xa Mát ngă tơnap tap biă mă. Samơ̆ tơdơi kơ abih klin anom bruă bơdjơ̆ nao ƀơi ƀon lan hơmâo pok pơhai ba tơhan nao pơgang, pơgăn, yua anun bruă sĭ dŏp ră anai glăk aset tui samơ̆ ăt dŏ tơnap tap mơn, yua gơnam tam găn nao rai rĭm hrơi ƀơi amăng jang Xa Mát”.

Kar kăi hăng hơdôm anom bruă wai lăng amăng jang pơkŏn, anom bruă wai lăng amăng jang jar kmar Xa Mát lêng dong ƀơi anăp lu tơlơi tơnap tap amăng bruă pơgang sĭ dŏp gơnam tam, ma túy, gơnam pơkra mă ča čot găn nao amăng jang, hơdôm gơnam sĭ dŏp anai dưm hrŏm hăng gơnam hơmâo hră pơ-ar kiăng kơ dưi pơgiăng nao rai ƀơi amăng jang, amăng anun hơmâo lu gơnam arăng kŏm. Ƀing ngă soh juăt pơplih na nao kiăng kơ găn nao rai tui hơdôm jơlan pơdŭ pơgiăng hơđăp kiăng pơgiăng nao rai gơnam bĕ hĭ tơhan wai lăng. Ơi Nguyễn Văn Đạt, Khua grup, anom bruă wai lăng amăng jang Xa Mát brơi thâo:

“Să Tân Lập prong biă mă, guai lŏn ia glông giăm 35 km, hơmâo lu jơlan mut nao rai, ƀing sĭ mơdrô pơƀut gơnam kơtuai tui glông guai lŏn ia ta hăng dêh čar Kur. Juăt ƀing gơñu sĭ dŏp gơnam mut rai dêh čar Việt Nam amăng mơmŏt mlăm, hơmâo mơnuih kiăo tui lăng ling tơhan, yua anun ngă tơnap tap amăng bruă hyu tir hăng wai lăng, pơgăn sĭ dŏp kơtuai tui jơlan guai. Dua dong lĕ anom bruă ƀu hơmâo grup wai lăng gơgrong gah sĭ dŏp yua anun bruă pơgang, pơgăn bưp tơnap tap yua anai glông guai glông, prong đơr hơr.

Pơsit tong hơdôm tơlơi tơnap tap mơng akŏ thun, anom bruă hơmâo gơgrong kiăo tui lăng kiăng pơjing jơlan hơdră bruă mă akŏ phun hăng ba tơbiă hơdôm hơdră pơsir hĭ tơnap tap, amăng anun đing nao pok pơhai sa, dua hơdră bruă anun lĕ: Ngă tui hơdôm hơdră pơhlôm pơhrui ngăn drăp lăp djơ̆, pơtrut pơplih ngă hră pơ-ar, pơhlôm klă dong bruă mă ƀơi amăng jang, pơplih bruă mă kơtưn pok pơhai hơdôm hơdră bruă kiăng pơgang, pơgăn sĭ dŏp, sĭ mơdrô ča čot ƀơi kual giăm guai.

Hrŏm hăng hơdôm hơdră bruă tui anun, anom bruă wai lăng amăng jang jar kmar Xa Mát hơmâo kơtưn amăng bruă gum hrŏm pơlăi nao rai amăng pôr pơhing hăng ƀing tơhan wai pơgang guai, wai lăng sĭ mơdrô, kông ang, hơmâo lu anŏ pơplih phrâo, lu bruă pel ĕp, hơmâo tơlơi mut hrŏm khut khăt mơng hơdôm anom bruă bơdjơ̆ nao. Ơi Nguyễn Nam Hồng Sơn, anom bruă wai lăng amăng jang Xa Mát brơi thâo dong:

“Kiăng pơhlôm kơ bruă pơgăn sĭ dŏp klă hloh, anom bruă wai lăng amăng jang hơmâo pok pơhai lu hơdră bruă, pơhmutu lĕ kiăo tui lăng tơlơi sit nik, pơlăi nao rai tơlơi pơhing kah hăng kĭ pơkôl gum hrŏm hăng hơdôm anom bruă bơdjơ̆ nao amăng ƀon lan. Laih dong ƀing apăn bruă lơ̆m pel ĕp kơ bruă pơgăn sĭ dŏp, kiăng kiăo tui lăng hơdôm tơlơi pơhing amăng hơdôm plang anom bruă wai lăng amăng jang kiăng kơ tañ thâo hơdôm bruă ngă soh, bruă mă kah hăng ƀing ngă soh ƀơi ƀon lan. Ƀing gơmơi khŏm nao pơtop hrăm hrŏm hăng hơdôm anom bruă bơdjơ̆ nao gưl glông hăng gơnong bruă, arăng amra črâo ba, pơhŭi hlâo hơdôm bruă amra ƀuh kiăng abih bang mơnuih ngă klă bruă amăng ƀon lan”.

Kiăng ngă pơgiong hơdôm hơnong pơkă bruă mă mơ̆ djop gưl jao amăng thun 2022, anom bruă wai lăng amăng jang Xa Mát tŏ tui pok pơhai khut khăt ha amăng plĕ hơdôm hơdră bruă, hmao tlôn pơjing hơdôm hơdră bruă pơgăn ƀing sĭ dŏp gơnam tam hăng leč blor amăng sĭ mơdrô, pơgôp wai lăng klă ƀơi guai lŏn ia, amăng jang.