Črăn jơlan nao pơ Yên Ninh glông năng ai 100 met, amăng ƀut plơi mrô 8,9,10 phường Yên Ninh, plơi prong Yên Bái hơmâo hơdôm boh sang bruă kơnuk kơna laih anun sang hră tir nao rai. Kual anai, rim kơ mơguah mut sang hră, yang hrơi dong tơbiă sang hră, tlam abih mông hrăm hră juăt lŭk pŭk yua mơnuih hăng rơdêh găn nao rai, pơtum ngă gun, kơđông jơlan, lu mơnuih ngă soh glăi tơlơi phiăn pơkă hơđong jơlan glông rô nao rai, hlâo adih tom hơmâo tơlơi truh rơdêh pơjrom. Giong nao ĕp lăng, pơtong glăi sit nik amăng kual, kông an phường Yên Ninh, plơi prong Yên Bái hơmâo lăi pơthâo anom bruă ping gah, gong gai kơnuk kơna plơi prong sem lăng akŏ pơjing grup mă bruă wai pơgang tơlơi hơđong rô nao rai ƀơi jơlan glông črăn juăt gun anai, boh nik ñu ƀơi anăp amăng jang sang hră gưl sa hăng gưl dua Yên Ninh, ƀing tơhan ngă hrŏm hơmâo kông an pô phun, tơhan plơi, ƀing mă bruă amăng ƀut plơi, tơhan pơgang sang hră amăng anun lĕ kông an yơh phun ngă hrŏm pioh pơgang tơlơi rơnuk rơnua hơđong jơlan glông anăp amăng jang sang hră. Trung tá Phạm Việt Đức, Kơ-iăng khua anom bruă kông an phường Yên Ninh, plơi prong Yên Bái brơi thâo:

“Grup wai pơgang tơlơi rơnuk rơnua jơlan glông hơmâo 8 čô ding kơna. Rim hrơi amra mă bruă ƀơi anih amăng jang sang hră hlâo kơ ană amôn mut sang hră 1 mông hăng tơdơi kơ abih mông hrăm hră ăt 1 mông mơ̆n, yua kơ amăng mông anai yơh lu mơnuih găn rơgao nao rai, rơdêh amĭ ama čơđai čơkă ană bă, ba ană bă juăt ngă kơniă hăng kơđông jơlan biă mă, anun hŭi hơmâo tơlơi truh ƀu klă”.

Sang hră gưl dua Quang Trung ƀơi akiăng jơlan Quang Trung, plơi prong Yên Bái hơmâo rơbêh 1.400 čô čơđai sang hră. Mah amăng jang sang hră hơđŏm ƀơi akiăng jơlan, samơ̆ anih hrăm lĕ sang hră ƀơi kơdư čư̆  anŏ dlông đing 10%, dlông pơngŏ 70 met. Rim hrơi sit truh mông pơdơi, hơdôm rơbâo čô čơđai sang hră tơbiă mơ̆ng sang hră ok or đuăi trun, hăt nao pơ anih amĭ ama gơñu dŏ tơguan či anăp amăng jang sang hră, hrŏm hăng khul rơdêh rô nao rai lu, kơniă jơlan, anun yơh juăt hơmâo na nao tơlơi kơđông jơlan, rơdêh nao rai sư̆ rơbư̆.

Kiăng pơhlôm rơnuk rơnua jơlan glông, rơngiao kơ bruă pơtô pơblang kơ ƀing amĭ ama čơđai sang hră, čơđai sang hră hăng ƀing nao pơtô hăng čơđai sang hră khom kĭ hră ƀuăn rơ̆ng pơhlôm tơlơi rơnuk rơnua jơlan glông nao rai mơ̆ng akŏ thun mơtam, rim hrơi pơpha grup khua mua sang hră hrŏm hăng ƀing pơgang sang hră krăo mă bruă tlam hăng mơguah ƀơi anăp sang hră, giăm amăng jang, djru pơgang hơđong rô nao rai, mut tơbiă amăng sang hră. Nai Nguyễn Thị Thúy Nga, Kơ-iăng Khua sang hră brơi thâo:

“Sang hră hơmâo pơpha bruă, pơčrâo jơlan mut tơbiă kơ čơđai sang hră, đĭ trun nao rai ƀơi amăng jang sang hră tui dua arăt jơlan, sa pioh kơ čơđai sang hră rơbat tơkai, sa pioh kơ čơđai trut rơdêh tang rơwang laih anun rơkâo amĭ ama cơđai sang hră, sit pơgiăng ană bă nao sang hră, trun ataih mơ̆ng amăng jang sang hră boh ƀiă 20 met. Kiăng ngă tui pơhlôm rơnuk rơnua rô nao rai ƀơi amăng jang, mơguah grup khua mua sang hră, nao pơtô hăng ƀing pơgang sang hră pơpha wơ̆t čơđai sang hră djru pơčrâo brơi jơlan, rô nao rai hơđong ƀơi amăng jang; yang hrơi dong lĕ khua mua sang hră, nai pơtô wơ̆t ƀing pơgang sang hră krăo ba jơlan čơđai sang hră găn jơlan truh gah adih, ƀơi anih amĭ ama čơđai sang hră dŏ tơguan ană bă či glăi, tơl abih čơđai sang hră glăi kah grup mă bruă anun mơ̆ng dưi glăi”.

Grup mă bruă wai pơgang tơlơi rơnuk rơnua jơlan glông hơmâo djru hrŏm klă biă mă, pơtrut tơlơi thâo hluh kơ ƀing amĭ ama čơđai sang hră, amăng bruă ngă tui djơ̆ tơlơi phiăn pơhlôm pơgang jơlan glông nao rai, djru kơ ƀing čơđai hơđong pran jua sit nao sang hră, pơhrŏ ƀiă tơlơi kơđông ƀudah kơniă jơlan glông nao rai amăng mông lu mơnuih mut tơbiă, tŭ hăng čơkă ană bă nao sang hră, glăi mơ̆ng sang hră. Adơi Bùi Lương Nguyên, čơđai sang hră gưl dua Yên Ninh, plơi prong Yên Bái brơi thâo:

“Ƀơi sang hră gơmơi ăt hơmâo pơtô hrăm kơ tơlơi rơnuk rơnua rô nao rai ƀơi jơlan glông kah hăng sit đĭ rơdêh thut ƀudah rơdêh ƀong pil lĕ khom klŭm đuăn pơgang akŏ, hrŏm hăng lu tơlơi pơkă pơkŏn brơi ngă tui djơ̆ khut khăt. Sit nao pơ sang hră, kâo ƀing nai pơtô hrăm hră, ƀing neh wa, met anong kông an pơčrâo brơi jơlan nao, anun yơh mut tơbiă ƀơi amăng jang rơhuai hluai hloh, gơmơi hơđong yơh nao rai”.

Amăng plơi prong Yên Bái ră anai hơmâo 35 boh sang hră, hăng rơbêh 22 rơbâo čô čơđai sang hră, amăng anun hơmâo lu amăng jang mut tơbiă dŏ kơniă, sang hră pơdong ƀơi lŏn kơdư čư̆ siăng dlông…Yua kơ anun, anom bruă Pơtô pơjuăt plơi prong Yên Bái juăt ngă nră pơtrun na nao, pơčrâo ba, git gai pơtrut pơsur lu sang hră, kơtưn wai pơgang tơlơi rơnuk rơnua hơđong ƀơi jơlan glông kơ čơđai sang hră. Ơi Hà Yên Thái, Kơ-iăng Khua anom Pơtô hăng Pơjuăt plơi prong Yên Bái, tơring čar Yên Bái brơi thâo:

“Anom bruă Pơtô hăng Pơjuăt plơi prong juăt ngă hrŏm re se hăng Khul wai pơgang tơlơi rơnuk rơnua jơlan glông tơring čar pioh pơtô brơi tơlơi phiăn jơlan glông kơ čơđai sang hră thâo hluh; git gai djop sang hră amăng mông lu mơnuih mut tơbiă, khom hơmâo nai pơtô, čơđai sang hră grup hla kơ mriah dŏ ƀơi amăng jang pơčrâo brơi jơlan mut tơbiă, pơpha glông jơlan mut nao, pơtă pơtăn ƀing čơđai sang hră mut tơbiă rơnuk rơnua djơ̆ rơ-ua, boh nik ñu ƀơi amăng jang sang hră, anih lŏn kơdư čư̆ siăng đing đuai lĕ brơi čơđai sang hră trut rơdêh đôč ƀu dưi đĭ ôh, rơdêh tang rơwang ƀudah rơdêh ƀong pil hai kơnong trut đôč ƀơi jơlan kơdư dlông”.

Tui hăng tơlơi jŭ yap, mơ̆ng akŏ thun hrăm 2023-2024 truh ră anai aka ƀu hơmâo tơlơi truh rơdêh pơjrom pơpă ôh truh ƀơi anăp amăng jang sang hră lơ̆m plơi prong Yên Bái. Samơ̆ ƀơi anăp kơ lu rơdêh mơnuih ƀôn sang blơi prăp jai hrơi lu, biă mă ñu rơdêh ôtô, lơ̆m anun jơlan glông dŏ kơniă, anet, lu anih ƀơi anăp sang hră, anăp amăng jang sang hră aka ƀu hơmâo ôh hơdră pơhlôm djơ̆, lu mơnuih yua hăt he, rô nao rai ƀu kơđiăng, ngă soh glăi tơlơi phiăn jơlan glông, yua kơ anun, rơngiao kơ tơlơi gir run mơ̆ng khua mua, nai pơtô ƀơi sang hră, wơ̆t hăng ƀing adơi ayong anong wa tơhan kông an, rim čô amĭ ama čơđai sang hră kiăng thâo hluh tong ten ngă tui djơ̆ tơlơi phiăn pơgang rơnuk rơnua jơlan glông; pơtô lăi, pơtă pơtăn na nao kơ ană bă ngă tui djơ̆ tơlơi phiăn pơgang rơnuk rơnua jơlan glông nao rai anăm lui hơmâo tơlơi truh sat răm ƀăm.