VOV4.Jarai - Tlam lơ 19/9 tui mông ƀơi dêh čar anai (anai lĕ mơguah lơ 20/9 tui mông Việt Nam) ƀơi Sang gru grua ngă hơkrŭ plơi prong jưh jom La Habana, Khua git gai tal sa Khul apăn bruă Ping gah Cộng sản Cuba, Khua mir sir dêh čar Cuba Miguel Diaz-Canel hơmâo git gai mông čơkă yôm phiăn Khua mir sir dêh čar ta ơi Nguyễn Xuân Phúc. Tơdơi kơ mông čơkă sit nik, Khua mir sir ơi Nguyễn Xuân Phúc hăng Khua git gai tal sa Khul apăn bruă Ping gah Cộng sản Cuba, Khua mir sir Cuba Miguel Diaz-Canel ba jơlan hlâo khua mua pơprong mơng dua boh dêh čar mut nao sang jơnum.

Amăng mông jơnum, dua čô khua tŭ ư pơ anăp anai dua bơnah kiăng tŏ tui kơtưn rô nao rai hluai tui mông jơnum pơbưp nao rao pơphun na nao, ba glăi tŭ yua dong amăng bruă ngă hrŏm, hơmâo Jơnum pơčrông sai kơplah wah Ping gah, Jơnum min pơlir hơbit dua kơnuk kơna, jơnum bơkơtuai kơđi čar kơplah wah dua Ding jum pơtom hiăp, Bơkơtuai hơdră bruă kơplah wah Ding jum ling tơhan. Khua mir sir dêh čar ơi Nguyễn Xuân Phúc pơpŭ bơni khua mua, Ding jum ia jrao hăng anom bruă pơkra ia jrao Cuba mah aka ƀu tlâ̆o brơi abih mơnuih ƀon sang samơ̆ ăt djru brơi laih dong jao ia jrao, jao boh thâo pơkra pơjing vaccine pơgang klin mơng Cuba brơi kơ dêh čar Việt Nam. Anai lĕ kiăng pơdah tơlơi dong yua hmao tlôn mơ̆ Cuba djru brơi Việt Nam kar hăng boh pơhiăp mơng Khua git gai ơi Fidel Castro “Yua kơ Việt Nam, Cuba amra tuh rơyut pran jua”.

Siu Đoan: Pơblang