VOV4.Jarai-Tlam mơmŏt lơ 28/9, Jơnum min plơi prong Đà Nẵng ngă hră pơčrâo kơ bruă ngă tui hơdră dŏ hrom rơnuk rơnua, hơdeč hmar, pel ĕp tŭ yua klin kheng Covid 19. Hră pơčrâo anai lăi pơthâo 9 hơdră bong glăi klin kheng amăng rơnuk phrâo. Bruă phun lĕ ăt khom pơtô tong ten kơ djop phường, să, kual plơi pla ƀôn ƀut amăng plơi prong, grup plơi mơnuih ƀôn sang jing anih bong glăi kjăp, mơnuih ƀôn sang lĕ gleng nao anŏ phun, ngă pô pơsit tŭ yua pơhlôm, pơgang klin.

Biă mă ñu, ƀôn prong pơtô lăi tong ten hăng pơphun ngă tui tŭ yua 6 tơlơi pơtrun bong glăi rơnuk rơnua, hơdeč hmar, pel ĕp tŭ yua klin duăm ruă Covid 19 ngă tui hăng tơlơi git gai mơ̆ng khua dêh čar. Jơnum min mơnuih ƀôn sang Đà Nẵng pơtrun, hăng kual hlăk ngă tui pơčlah mơnuih mơnam ƀudah phrâo akŏ pơjing lơ̆m hơmâo Covid 19 amăng kual plơi pla: Ăt ngă tui khut khăt hơdră pơhlôm pơgang, pơčlah mơnuih mơnam tui hăng bruă ia jrao, hlơi dŏ pơpă dŏ hơđong pơ anun.

Hăng hơdôm anih dŏ glăi, ƀôn prong brơi lui jăng jai bruă mă sĭ mơdrô, rô nao rai lu mơnuih, anih ngui ngor, tuai čuă ngui, adoh suang,  ƀong mơñum tơpai asơi, anih ngă hiam, kơnong hơdôm anih čơkăp ƀŭ hăng čô akŏ ƀiă mơnuih đôč brơi pok mă bruă; anih adoh karaoke, uh drơi jăn matsa, anih kơdưt suang ngui ngor ƀong mơñum tơpai asơi , sang pơdah phim, anih sĭ mơdrô apah yua internet lu mơnuih pơdơi abih jăng jai.

Nay Jek: Pơblang