VOV4.Jarai - Lơ 14/11, Khua anom bruă pơphun bruă dêh čar ơi Phan Đình Trạc hrŏm hăng grup hyu mă bruă mơng Ding jum kơđi čar hơmâo mông mă bruă hăng Khul apăn bruă Ping gah ƀôn prong Đà Nẵng lăi pơthâo hơdôm boh than ba glăi lơ̆m pel ĕp kơ bruă git gai amăng bruă kơsem min, hrăm tui, hruă kjăp, pơtô pơblang, ngă tui sit nik hăng pok pơhai hơdôm tơlơi pơsit mơng Jơnum Ping gah đơ đam dêh čar tal XIII.

Ơi Phan Đình Trạc đĭ pơhiăp amăng mông mă bruă

Đĭ pơhiăp pơđut mông jơnum, ơi Phan Đình Trạc pơpŭ bơni hăng lăng yôm hơdôm tơlơi gir run mơng Khul apăn bruă Ping gah ƀôn prong Đà Nẵng hăng djop gưl Ping gah hơmâo pel ĕp amăng pok pơhai ngă bruă, hrăm tui, pơphun hơdôm tơlơi pơsit mơng Jơnum Ping gah tal XIII. Ơi Phan Đình Trạc rơkâo Đà Nẵng kiăng tŏ tui pơsit rơđah amăng bruă pơtô hrăm, khut khăt ngă tui hơdôm tơlơi pơsit lĕ bruă kiăng ngă na nao, tong ten, hơmâo ngă tui amăng ha rơwang thun ngă bruă; tŏ tui pơtrut pơtô pơblang, kơđiăng git gai, mă bruă mơng gưl Ping gah, mơnuih apăn bruă, biă mă ñu lĕ amăng bruă pơjing, pơplih amăng Ping gah.

Siu Đoan: Pơblang