VOV4.Jarai-Tui hăng Khul git gai pơhlôm pơgang klin Covid 19, tơring čar Dak Lak, amăng lơ 10/8, đơ đam tơring čar čih pioh hơmâo dơ̆ng 36 čô mơnuih ƀă kman sars-cov-2 ƀơi 6 boh tơring glông hăng plơi prong Ƀuôn Ma Thuôt. Lăp gleng nao hloh, ƀơi thôn 7 să Vụ Bổn, tơring glông Krông Pač phrâo ƀuh sa ƀut anih ƀă klin truh 17 čô F0 ƀu thâo ƀă mơ̆ng pơpă.

Hơdôm anom bruă nao ƀơk gơnam hăng mơnong ƀong huă kơ tơhan dŏ mă bruă pơgăn klin Covid 19 ƀơi să Vụ Bổn

Ră anai, plơi anai  arăng guang dar laih. Anom bruă ia jrao tơring čar Dak Lak brơi tui kru hơduah ĕp hơdôm rơtuh čô mơnuih F1. Kiăng pơhlôm djơ̆ brơi mơnuih ƀôn sang ăt hơmâo mơnong ƀong huă hơđong amăng anih guang dar, să Vụ Bổn hơmâo akŏ pơjing sa grup djru mơnong ƀong huă laih anun lăi pơthâo mrô telephôm mơ̆ng grup djru mơnuih ƀôn sang sit hơmâo tơlơi kiăng.

Bruă tui kru hăng mă ia khak ĕp kman test hmar pok pơhai tañ ƀơi să anai

Hrom hăng anun, să ăt pơtô lăi kơ khua mua amăng plơi pla čih anăn hơdôm sang anŏ ƀun rin, tơnap tap kơƀah mơnong ƀong huă dŏ ƀơi anih pơčlah phara, kiăng thâo hăng djru hmao kru. Bruă tơña lăng, hơduah ĕp, tui kru guang dar, kiăng pơgăn klin khut khăt. Yap truh lơ 10/8, tơring čar Dak Lak hơmâo 446 čô mơnuih ƀă kman sars-cov-2, amăng anun 415 čô hlăk dŏ pơjrao, 30 čô mơnuih ruă dưi pơjrao suaih laih hăng 1 čô mơnuih djai.

Nay Jek: Pơblang