VOV4.Jarai-Tlam lơ 6/7, Khul đah kơmơi mut phung kông an tơring čar Dak Lak ngă hrom hăng hơdôm mơnuih hơmâo pran jua čơmah plơi prong Ƀuôn Ma Thuôt, pơphun pơčruh gơnam djru 20 tơn gơnam kah hăng: Añăm pơtam asăt, braih, boh troh pơgiăng nao pơ ƀôn prong Hồ Chí Minh, brơi kơ mơnuih ƀôn sang hlăk dŏ amăng anih guang dar hĭ hăng anih dŏ pơčlah yua kơ klin Covid 19.

20 tơn gơnam anai, ăt amra pơpha ba nao pơ sang ia jrao tơhan Quân y 175 ƀơi kuân Gò Vấp hăng hơdôm anih tơnă asơi djru mơnuih mơnam giăm anih dŏ pơčlah amăng kuân, tơring glông lơ̆m ƀôn prong Hồ Chí Minh. Lơ̆m anih sĭ mơdrô phun sang čơ Bình Điền, sang čơ phun prong hloh amăng ƀôn prong Hồ Chí Minh, khom pơdơi sĭ mơdrô, yua hŭi ƀă klin, ƀing adơi amai đah kơmơi mut phung tơhan kông an tơring čar Dak Lak hăng ƀing hơmâo pran jua čơmah čang rơmang djru hrom ƀiă gơnam tam mơnong ƀong huă brơi kơ mơnuih ƀôn sang ƀôn prong Hồ Chí Minh plai ƀiă tơnap tap.

Pơ anăp anai, Khul đah kơmơi mut phung tơhan kông an tơring čar Dak Lak ăt jak iâu pơčruh gơnam tam mơnong ƀong huă mơit nao pơ hơdôm anih dŏ pơčlah, anih guang dar yua kơ klin amăng ƀôn prong Hồ Chí Minh.

Nay Jek: Pơblang