VOV4.Jarai - Lơ 30/12, tơring čar Dak Lăk hơmâo pơphun Jơnum klah čun 20 thun ngă tui tơlơi pơtrun mrô 13/2002 mơng Khul khua apăn bruă git gai Ping gah dêh čar tal 9 kơ bruă pơplih phrâo, pơđĭ kyar hăng pơđĭ tui anŏ klă mơng tơlơi bơwih ƀong ngă hrŏm, 10 thun ngă tui Tơlơi phiăn Hợp tác xã. Lăi pơthâo glăi ƀơi mông jơnum, amăng 20 thun rơgao pok pơhai tơlơi pơtrun, tơring čar ră anai hơmâo 608 anom bơwih ƀong hrŏm, amăng anun, 390 anom bơwih ƀong gah bruă hmua, 218 anom bơwih ƀong rơngiao kơ đang hmua.

 Hơdôm mơta gơnam hmư̆ hing mơng anom bơwih ƀong hrŏm ba pơdă pơƀuh gơnam OCOP Dak Lăk.

Tơlơi bơwih ƀong hrŏm djru brơi 21.000 čô mơnuih hơmâo bruă mă na nao, prăk pơhrui glăi đĭ 10 wơ̆t amăng rơwang thun anai. Pơhiăp ƀơi mông jơnum, ơi Nguyễn Đình Trung, Ding kơna Ping gah, Khua git gai Ping gah tơring čar Dak Lăk kiăng djŏp anom bruă, plơi pla pơtrut tui bruă hyu pơtô pơblang, iâu pơthưr mơnuih ƀon sang thâo hluh kơ tơlơi bơwih ƀong hrŏm, tañ pơsir brơi tơlơi tơnap, tơlơi ngă gun, ngă gal brơi kơ anom bơwih ƀong hrŏm dưi đĭ kyar. Akŏ pơjing hơbô̆ bruă bơwih ƀong hrŏm tui gru phrâo lăp djơ̆ hăng bruă hơkrŭ măi mok phrâo 4.0.

Siu H’Mai: Pơblang