VOV4.Jarai-Lơ 28/10, tơring čar Dak Lak čih pioh hơmâo 126 čô mơnuih ƀă klin Covid 19, amăng anun 39 čô mơnuih arăng ƀuh amăng kual plơi pla. 126 čô mơnuih ƀă Covid 19 phrâo hăng 39 čô mơnuih ƀă amăng kual plơi pla tơring čar Dak Lak lu biă mă ƀơi hơdôm tơring glông Čư̆ Mgar, Krông Ƀŭk, plơi prong Ƀuôn Hồ hăng plơi prong Ƀuôn Ma Thuôt. Anai yơh hơdôm anih hơmâo čih pioh lu mơnuih ƀă klin hloh amăng kual plơi pla lơ̆m sa wơ̆t hrơi tơjuh rơgao, hơdôm ƀing ƀă anai pơdjơ̆ nao ƀă klin mơ̆ng mơnuih glăi mơ̆ng kual dơnung.

Ƀơi plơi prong Ƀuôn Ma Thuôt ăt čih pioh hơmâo lu mơnuih ƀă Covid 19 amăng plơi pla. Anom bruă ia jrao hlăk gir run pơgăn klin ƀă hyu lu anih

Lu să, lu phường dŏ amăng kual pơđĭ hnong hŭi rơhyưt hmar biă mă mơ̆ng hnong 1, hnong 2, 3, 4, mơ̆ng kual mơtah, đĭ jing kual kơñĭ leh anăn mriah kñĭ, truh mriah hur. Anom bruă ia jrao tơring čar Dak Lak hlăk gir run hơduah ĕp, tui kru, pok pơhai brơi pơčlah hĭ mơnuih mơnam hăng mă ia khak pơčrang kman abih bang mơnuih dŏ amăng anih hơmâo mơnuih ƀă klin hăng ba pơčlah abih ƀing jĕ giăm hăng pô ƀă kman F0.

Pơdjơ̆ nao klin covid 19 ƀơi Dak Lak tơnap biă mă ră anai, lơ 28/10, Jơnum min mơnuih ƀôn sang tơring čar Dak Nông hơmâo ngă hră pơtrun ječ ameč dơ̆ng mơ̆ng 29/10, ƀing apăn bruă, mơnuih mă bruă amăng kơnuk kơna tơring čar Dak Nông ƀu dưi nao ƀudah glăi pơ Dak Lak ôh amăng 14 hrơi, rơngiao kơ bruă yôm phara, nao mă bruă kơnuk kơna pơtrun ƀudah hơmâo tơlơi tŭ ư mơ̆ng sang bruă hơmâo tơlơi dưi.

Nay Jek: Pơblang