VOV4.Jarai-Amăng mrô rơbêh 1.700 čô mơnuih ƀă Covid 19 ƀơi Dak Lak hơmâo ƀu ƀiă ôh đah kơmơi hlăk ƀă ană, pi kian čơdong truh hrơi đih apui. Hơdôm ană nge tơkeng rai amăng mông Covid 19 ngă jing hơdôm hrơi phara biă mă, yua dah hơmâo dơ̆ng ƀing amĭ djom pran jua klă lĕ ơi ia jrao, nai ia jrao khăp ƀu eng ôh hăng mă bruă glăm ba prong biă mă.

Mah krăo lăng na nao tơlơi suaih pral mơ̆ng ƀing čơđai muai, amai Bùi Thị Thu Hương, nai ia jrao mă ƀuai gah anom pơjrao čơđai muai nge arăng phrâo tơkeng, Sang ia jrao prong Kual Dap Kơdư ăt amlek amlek lăng nao ƀơi mông dŏ buh či tơngan. Truh 3 mông tlam, ñu mă gêt ia tơsâo ngă rơgoh kman laih, nao rơkâo ia tơsâo ƀing đah kơmơi, amĭ arăng phrâo tơkeng ană nge, laih anun ba ia tơsâo anun brơi kơ ană nge ƀing amĭ gơ̆ lĕ mơnuih ƀă kman Covid 19 arăng juăt iâu F0 dŏ pơjrao. Rơngiao kơ bruă hyu rơkâo ia tơsâo brơi ană nge mĕm, amai Hương hrom hăng ƀing nai ia jrao pơkŏn dŏ pơblih nao rai bruă mơnơi, rao, sut uă drơi jăn hăng pơblih akhăn eh mơ-añă ană nge, sem lăng tơlơi suaih pral kơ ană nge dơ̆ng.

Nai ia jrao Hương hlăk pơƀem ba ană nge amăng anih dŏ pơčlah phara

Ñu brơi thâo, mơ̆ng ƀing čơđai nge anun phrâo tơkeng rai, amĭ gơñu F0 lĕ arăng ba nao ƀing ană nge pơ anih pơjrao ječ pioh sem lăng pơjrao hơdră phara biă mă, lơ̆m anun kah hăng hơmâo sang anŏ phrâo dơ̆ng yơh pơdjru, lăng ba pơ anai. Ƀing adơi amai nai ia jrao mă ƀuai jing hĭ amĭ pô ƀă, pô pi mă eh mơ-añă hrơi mlam lăng ba ană nge arăng anun:

“Hơdôm ană nge anun yua ƀu hơmâo amĭ gơñu pi ƀơi tơngan ƀing gơmơi ƀuh pap drap biă mă anun yơh abih bang ƀing ngă bruă nai ia jrao anai lăng kơ gơñu kah hăng ană bă, ană amôn sang anŏ ta pô, pioh wai lăng ƀă ƀem čem rông ba hăng tơlơi khăp pơhrua kơ amĭ ƀing gơñu hăng hơdră klă hloh. Yua kơ amĭ dŏ pơčlah hĭ ƀu thâo djet ia tơsâo ôh brơi mĕm, ƀing gơmơi pơ anai rơkâo ia tơsâo hơmâo ană nge pơkŏn djru brơi mĕm, kiăng kơ ƀing gơñu hơmâo ia tơsâo biă mă mĕm hơdjă hloh”.

Ngă bruă wai lăng hrom ƀing ană nge phrâo tơkeng ƀơi Anom pơjrao čơđai muai duăm kraih, nai ia jrao mă ƀuai Dương Thị Hoa wai lăng tơlơi suaih pral kơ čơđai nge rah, glăk prăp rơmet dơ̆ng čơkă mă 2 čô čơđai nge phrâo tơkeng pơkŏn amĭ gơñu F0 laih.

Amai Hoa brơi thâo, hrom hăng bruă ngă kơđiăng hloh pơgang klin, ƀing adơi amai đah kơmơi nai ia jrao mă ƀuai hăng abih bang ƀing ngă bruă amăng anom pơjrao phara anai đing nao kơ bruă rơmet ia tơsâo amĭ, kiăng kơ ană nge dưi mĕm ia tơsâo amĭ yơh klă hloh kơ tơlơi suaih pral čơđai nge phrâo tơkeng, ia tơsâo djop anŏ găng añrăng, kơtang drơi jăn kơ ană nge amăng hơdôm blan blung hlâo phrâo tơkeng:

“Kơ tơlơi ia tơsâo amĭ lĕ ră anai hơmâo mơ̆n ia tơsâo arăng djet brơi, pơđŏm lui rơ-ot, laih anun ƀing nai ia jrao mă pơhang brơi lĭ pler čơkô̆ ƀơ̆I, ba ngă pơđao glăi hlâo kơ brơi ană nge mĕm ia tơsâo arăng djru. Tơdah hơmâo ia tơsâo mơ̆ng ƀing amĭ pơkŏn djet brơi, jur amăng đing tơsâo mĕm lĕ mă pioh lui brơi mĕm ia tơsâo anun, tơdah kơƀah lĕ mă ia tơsâo pơđŏm lui hăng rơ-ot pler adih baih lah brơi mĕm”.

Tui hăng ơi ia jrao kơhnăk tal II chuyên khoa II Nguyễn Đức Toàn, Anom pơjrao čơđai muai duăm kraih, sang ia jrao prong Kual Dap Kơdư lăi, bruă wai lăng pơƀem čơđai nge, hơmâo amĭ gơñu ƀă kman F0 laih lĕ, anom bruă hơmâo pơpha ƀơi 2 anih dŏ phara hơjăn, anih pơjrao tơđar sa hăng anih pơjrao phara pơčlah hơjăn. Tui hăng anun, tơdơi kơ ƀing čơđai nge arăng tơkeng rai, ba nao pơ anih pơčlah pơjrao hăng wai lăng.

Nai ia jrao Hoa gir run na nao ĕp ia tơsâo amĭ arăng djru, djet ba pơmĕm kơ ană nge kiăng

kơtang ƀiă drơi jăn pran jua gơ̆

Tơdơi 14 hrơi, tơdah pran jua ană nge suaih pơđĭ kyar klă laih anun pơčrang kman klin 3 wơ̆t ƀu ƀuh ôh kman sars-cov-2 hăng hơdră pơčrang RT-PCR amra ba nao pơ anih pơjrao đôč đač tơđar tơguan amĭ ñu hăng sang anŏ tơdơi kơ pơjrao hlao laih duăm yua kman Covid 19, nao tŭ mă ană nge gơñu glăi. Ơi ia jrao Nguyễn Đức Toàn brơi thâo, mah mrô čơđai nge khom pơjrao phara hơjăn ƀu lu ôh, samơ̆ tơlơi pơhŭi klin Covid 19 ngă lĕ, ƀing ơi ia jrao, nai ia jrao pơ anai ăt khom kơđiăng tong ten biă mă:

“Bruă wai lăng pơjrao čơđai muai ƀu hơmâo mơnuih sang anŏ dŏ lăng ba tơnap biă mă, tơdah hơmâo amĭ gơ̆ dŏ hrom plai ƀiă mơ̆n, bơ anai lĕ ƀing nai ia jrao hlong dŏ hrom pơjrao amăng anih phara mơtam, yua kơ anun ƀing nai ia jrao đah kơmơi rô nao rai ĕp lăng tong ten hŭi kơ duăm kraih ƀu hơmao pơjrao. Yua kơ anun, pơjrao ană nge ƀă Covid 19 anai tơnap bơkơnar hăng bruă pơjrao kơ 3 čô čơđai nge pơkŏn, anun yơh bruă ƀing nai ia jrao đah kơmơi mă ƀuai tơnap tap hăng hŭi rơhyưt biă mă”.

Tơkeng rai amăng mông klin kheng Covid 19 ngă, khom dŏ pơčlah hăng amĭ pô dơ̆ng mơ̆ng hrơi mông phrâo tơkeng mơtam, sa tơlơi kơƀah prong biă mă kơ ană nge phrâo tơkeng. Samơ̆ sang ia jrao prong Kual Dap Kơdư, ƀing čơđai nge anun hơmâo ƀing ơi, nai ia jrao lăng kah hăng amĭ pô hiam klă yơh čem rông lăng ba. Hơdôm čơđai nge tơkeng kah tơđar mơ̆n samơ̆ jing phara biă mă, ăt hlăk brô̆ prong tui ƀơ ƀrư̆ rĭm hrơi amăng tơngan tơlơi khăp pap prong mơ̆ng ƀing nai ia jrao pô gôm ba.

Nam Trang-pô čih: Nay Jek pơblang