VOV4.Jarai-Mơ̆ng rơnuč blan truh ră anai, tơring čar Dak Lak hơmâo tŭ jum 137 rơbâo čô mơnuih glăi mơ̆ng hơdôm tơring čar, ƀôn prong gah Dơnung. Hrom hăng pơsir tơlơi hơdip ƀơi anăp mơta, tơring čar hlăk mă yua rơnoh prăk djru kơ mơnuih mă bruă glăi mơ̆ng kual Dơnung dưi čan pơđĭ kyar bơwih ƀong huă, đah mơ̆ng găn rơgao tơlơi tơnap tap ƀơi plơi pla. Anai lĕ tơlơi djru hiam klă, hmao kru kiăng mơnuih ƀôn sang găn rơgao hrơi mông tơnap yua klin kheng ngă.

Hơdui 3 drơi rơmô ba nao kiă pơ đang rơ̆k gah plơi thôn 6, să Čư̆ Kty, tơring glông Krông Bông, ơi Tăng Ngọc Thịnh, brơi thâo, rơmô anun sui mơ̆ng anai 1 blan hơmâo prăk djru kơ mơnuih mơnam tơnap, kơnuk kơna brơi čan hăng kơmlai ƀiă. Akŏ thun hlâo, rơkơi bơnai gơñu nao pơ Bình Dương mă bruă apah kiăng ĕp prăk. Samơ̆ klin Covid 19 tơnap tap đơi, bruă mă ƀu hơđong ôh anun yơh blan 6 rơgao, rơkơi bơnai ñu khom glăi pơ plơi pla đôč.

Ơi Tăng Ngọc Thịnh mă yua prăk čan kơmlai ƀiă blơi rơmô

Ƀu hơmâo lŏn tơnah ngă hmua, ƀu hơmâo prăk bơwih ƀong huă, ñu hơmâo grup pơkram prăk laih anun čan prăk amăng plơi pơtô brơi ngă hră pơar dưi čan 50 klăk prăk huăi song mă gơnam  hơgĕt ôh. Ơi Tăng Ngọc Thịnh brơi thâo, rơnoh prăk čan mơ̆ng tơlơi djru anai amăng 10 thun, kơmlai sa thun 7,92% ƀu tơguan hơmâo gơnam ngă anŏ gơgrong ôh. Ơi Tăng Ngọc Thịnh lăi:

“Klin kheng kơtang đơi anun glăi pơ plơi pla yơh, plai mơ̆n hơmâo hơdră djru mơ̆ng bơnah brơi čan 50 klăk blơi rơmô rông. Kâo ƀuh hơdră djru anai hiam klă yơh, djru ba mơnuih tơnap tap kah hăng kâo anai”.

Amăng 2 blan rơgao, hơmâo rơbêh 20 boh sang anŏ pơ tơring glông Krông Bông hơmâo mơnuih pơwơ̆t glăi mơ̆ng hơdôm tơring čar gah kual dơnung dưi tŭ mă prăk čan huăi kơmlai yôm rơnoh prăk 1 klai. Anai lĕ, sa amăng hơdôm tơring glông blung a ƀơi Dak Lak pok pơhai rơnoh prăk brơi čan kơ mơnuih glăi mơ̆ng anih pơkŏn, dŏ pơ tơring  čar, plơi pla pô. 

Khua mua pơ ala mơ̆ng sang bruă prăk djru mơnuih mơnam ĕp lăng bruă mă yua prăk kăk čan mơ̆ng mơnuih ƀôn sang

Ơi Nguyễn Tử Ân, Khua sang bruă prăk djru mơnuih mơnam tơnap tap tơring čar Dak Lak brơi thâo, anom bruă gơñu hơdai gum hrom gong gai kơnuk kơna ĕp lăng kiăng thâo anŏ kiăng hăng ngă gêh găl kơ mơnuih ƀôn sang čan prăk pơđĭ kyar bruă mă, hơđong tơlơi hơdip mơda ƀơi kual plơi pla. Sang bruă prăk rơkâo gơnong dlông pơbuă tui 19 klai prăk pioh kơ hơdôm sang anŏ hơmâo mơnuih glăi mơ̆ng hơdôm tơring čar, ƀôn prong gah dơnung.

Hrom hăng anun, hơdôm sang anŏ tơnap tap, tơdah čan laih prăk, anom bruă amra pơhrơ̆i hnưh brơi čan pơhrua dơ̆ng kiăng hơmâo prăk tuh pơ alin mă bruă.

“Gơñu hơmâo hơdră rơđah rơđong kơ bruă bơwih ƀong huă amăng plơi pla, boh nik ñu gơñu khom ngă hrom grup pơkrem prăk, čan prăk amăng plơi pla. Mut ngă ding kơna grup pơkrem prăk anai ƀơi plơi pla hă tơdơi kơ hơdôm hrơi blan ƀu sui ôh amra dưi čan prăk pioh tuh pơ alin bơwih ƀong huă hơđong rơnuk phrâo đah mơ̆ng hơmâo boh tơhnal tŭ yua ba glăi.

Nay Jek: Pơblang