VOV4.Jarai-Jơnum min mơnuih ƀôn sang tơring glông Krông Pač, Dak Lak brơi pơdơi bruă Khua să Vụ Bổn yua kơ klin Covid 19 ƀă kơtang amăng plơi pla. Tui hăng anun, ơi Trần Văn Sáu, Khua să Vụ Bổn, tơring glông Krông Pač, Dak Lak arăng brơi pơdơi bruă 15 hrơi jăng jai, yap mơ̆ng lơ 10/8 truh lơ 24/8/2021. Ơi Sáu lĕ, khua tơring glông brơi ñu pơdơi bruă, yua lui hơmâo klin ƀă hyu lu amăng kual plơi, ƀu hơmâo hơdră pơgăn hmao kru klin Covid 19, djơ̆ ƀơi anih mơnuih ƀôn sang pơtum lu mơnuih laih anun git gai brơi dŏ pơčlah pơ sang anŏ ƀu tơpă, anun yơh klin ƀă amăng plơi pla.

Yap truh lơ 10/8, să Vụ Bổn hơmâo 2 bit anih klin Covid 19 ƀă, anun lĕ plơi thôn 6 hăng thôn 7 hơmâo 19 čô mơnuih ƀă. Amăng anun, kơnong thôn 7 hơmâo 16 čô. Mrô mơnuih ƀă ƀơi să Vụ Bổn lơ 10/8, ngă kơ mrô mơnuih ƀă ƀơi tơring glông Krông Pač lu hmar biă mă, jing tơring glông dong tal klâo amăng tơring čar Dak Lak.

Ră anai, anom bruă kơnuk kơna ƀơi Dak Lak pơphun guang dar, brơi tui kru ĕp mơnuih jĕ giăm hăng ƀing ƀă klin, pioh mă ia khak ba pơčrang kman laih anun ngă tui hơdră ĕp lăng tui bruă ia jrao khut khăt pơgăn kman klin Covid 19 ƀơi să Vụ Bổn.

Nay Jek: Pơblang