VOV4.Jarai - Kơ-iăng khua Jơnum min mơnuih ƀon sang tơring čar Dak Lak yă H’Yim Kđoh phrâo kĭ hră brơi braih djru kơ mơnuih ƀon sang kơƀah braih huă amăng mông glăk tơjŭ pla thun 2021. Tui anun, tar ƀar tơring čar hơmâo brơi rơbêh 854 tơn braih yua Kơnuk kơna mă mơng mrô braih dêh čar ta djru kơ mơnuih ƀon sang kơƀah asơi huă amăng tal anai. 13 boh tơring glông hơmâo mă braih kah hăng: Buôn Đôn, Cư M’gar, Ea Kar, Ea Súp, Ea H’leo, Krông Ana, Krông Bông, Krông Búk, Krông Năng, Krông Pắc, M’Drắk, Lắk hăng plơi prong Buôn Hồ. Jơnum min mơnuih ƀon sang tơring čar jao kơ Gơnong bruă Mơnuih mă bruă - Tơhan rơka hăng Mơnuih mơnam git gai, ngă hrŏm hăng Anom bruă pơđom gơnam Kơnuk kơna kual Dơnung Dap Kơdư, hơdôm gơnong bruă, anom bruă jao braih kơ hơdôm plơi pla, brơi braih tañ, djơ̆ tơlơi pơtrun. Amăng mông mă braih hăng ba hyu ƀơk, khŏm kơđiăng kơ bruă pơhlôm pơgang klin Covid-19.

Siu H’Mai: Pơblang