VOV4.Jarai - Kiăng pơtrut tui bruă djru mơnuih mơnam anăp nao ƀing hlăk ai čơđai muai hăng mơnuih ƀon sang tơnap tap amăng tơring čar, hlăk ai Dak Lăk hơmâo ngă jơlan hơdră Hur har pran jua bơyan Puih hăng lu bruă ngă klă hiam. Tui anun, djŏp grup hlăk ai amăng tơring čar pơtrut hyu pơtô pơblang bruă pơgang klin Covid-19 kơ mơnuih ƀon sang; iâu pơthưr abih bang mơnuih gum djru brơi hơdôm rơtuh gơnam hăng brơi ao pơđao, abăn mơsum kơ ƀing čơđai sang anŏ rin, brơi prăk djru hlăk ai bơwih ƀong, djru ba ƀing tơdăm dra tơbiă mơng sang krư̆ dưi hơdip hrŏm mơ-ak, huăi mlâo hiâo kơ mơnuih mơnam.

Gơnam djru kơ sang anŏ tơnap tap bơbeč yua klin Covid-19.

Hlăk ai tơring čar Dak Lăk hơmâo ruah să Ea Riêng, tơring glông Mdrăk ngă anih pơphun jơlan hơdră gưl tơring čar hăng brơi 50 anung gơnam kơ hơdôm boh sang anŏ tơnap tap, 10 boh rơdêh tang wang hrŏm hăng abăn mơsum, ao pơđao kơ ƀing čơđai...Amăng jơlan hơdră, Hlăk ai tơring čar Dak Lăk ăt man pơdong 2 boh sang khăp pap kơ sang anŏ hlăk ƀun rin ƀơi tơring glông Krông Pač hăng Ea Kar. Prăk pioh ngă bruă anai rơbêh kơ 200 klăk prăk.

Siu H’Mai: Pơblang