VOV4.Jarai - Kiăng djru ba mơnuih ƀon sang mơng ƀon prong Hồ Chí Minh hơmâo tơring čar Dak Lăk nao tŭ glăi amăng mlăm lơ 10/8, Hlăk ai djŏp anom bruă hăng anom bơwih ƀong tơring čar Dak Lăk pơphun bruă “Sang tơnă asơi añăm mlăm hlăk ai” đah mơng tơnă hơbai 500 anung asơi huă añăm ƀong brơi kơ ƀing glăi mơng kual hơmâo klin. Rim anung hơmâo čăo tơkai bui, sữa bắp hăng ia mơñum. Tơpung čăo hơmâo pioh amăng hruh, pioh pơ-iă amăng kơthung laih anun ba nao pơ sang hră đom lăm Nơ Trang Lơng tơring Dak Lăk. Mơmot tom brơi, 345 čô mơnuih hơmâo čơkă glăi anun lĕ: Ƀing tha, čơđai, đah kơmơi pi kian, ƀing hơmâo ană mơda yŭ 36 blan; ƀing nao khăm, pơjrao tơlơi ruă, mơnuih nao čuă pô duam ruă, nao mă bruă jăng jai mơ̆ aka ƀu thâo glăi; ƀing hơmâo kơnuk kơna djru ƀong prăk rim blan; pô nao hrŏm hăng čơđai yŭ 10 thun, ƀing tha, ƀing đah kơmơi pi kian, mơnuih duam ruă...rơkâo glăi pơ sang anŏ. Mơnuih ƀon sang tơdơi kơ pơčrang kman hmar huăi ƀuh kman amra ba glăi dŏ pơčlah pơ tơring čar amăng 14 hrơi laih anun ăt krăp lăng pơ sang dong amăng 7 hrơi. Pô hlơi ƀă kman lĕ amra ba nao pơ sang ia jrao.

Siu H’Mai: Pơblang

Ăt amăng lơ 10/8, hơdră djru tơlơi khăp pap, hơmâo rơdêh pơgiăng brơi soh, ba nao laih mơnong ƀong huă kơ mơnuih ƀôn sang pơ anih dŏ pơčlah či să Ia Rvê, tơring glông Ea Sup, Dak Lak. Hơdră anai, yua kơ Khul đah kơmơi tơhan pơgang guai dêh čar ngă hrom khul djru tơlơi khăp pap Thiện Tâm 47 hăng lu sang bruă gum hrom djru.

Mơ-it gơnam kơ mơnuih ƀôn sang ƀơi anih pơgăn jơlan

Ƀơi să Ia Rvê, khul hơmâo djru 30 anung gơnam kơ sang anŏ tơnap tap ƀơi plơi thôn 8 hlăk dŏ pơčlah amăng sang anŏ. Sa anung gơnam hơmâo 5 kg braih, 1 kơthung mì tôm, sa gêt ia rơmă, ia mơsin, tơpung mih bột ngọt, ƀan tơpung, añăm mơnong chả giò hăng 100 rơbâo prăk.

 Hơdôm anung gơnam anai, ƀing khua mua pơ ala amăng plơi tŭ mă laih anun ƀơk glăi kơ sang anŏ hơmâo anăn pioh djru. Hrom hăng anun, khul djru dơ̆ng 500 kg añăm pơtam, hơbơi pơtơi kơ mơnuih ƀôn sang; ƀơk 500 gêt čai ia mơñum hăng 100 pok kơsu bơngač pơgang ƀô̆ kơ ƀing tơhan dŏ mă bruă ƀơi anih pơgăn jơlan

Nay Jek: Pơblang