VOV4.Jarai-Truh ră anai,  rơbêh 140 čô mơnuih dŏ pơ 47 boh sang anŏ jơlan weh anet mrô 189/1, Mai  Hắc Đế, phường Tân Thành, plơi prong Ƀuôn Ma Thuôt, tơring čar Dak Lak ăt dŏ amăng anih guang dar yua hơmâo 2 čô mơnuih ƀă klin Covid 19. Mơnuih ƀôn sang pơ anai tŭ mă tơlơi djru mơ̆ng phung wang, sang anŏ hăng mơ̆ng lu anom bruă mơnuih mơnam. Rĭm braih kơdung, anung hra, boh mơnŭ, añăm rơ̆k  ba nao, djru kiăng hơđong pran jua, hrom hăng gong gai kơnuk kơna khut khăt pơtrut đuăi klin kheng.

Dưi tŭ mă hơdôm bơgam djru ƀơi anih guang dar hĭ, amai Nguyễn Thị Lý, apah sang dŏ jơlan weh anet mrô 189/1 Mai Hắc Đế lăi, ñu mơ̆ng tơring glông Ea Kar, nao dŏ pơ plơi prong Ƀuôn Ma Thuôt, apah sang dŏ pok anih ngă bruă tơčoh rup boh hră amăng tơngan, drơi jăn ƀing kiăng tơčoh. Prăk ƀong ngă bruă rĭm hrơi kơnong djop jăng jai   tui hluai hrơi hơmâo, hrơi soh, kơ dua amĭ ană ñu djop prăk apah sa blah anih dŏ.

Truh mơmŏt lơ 8/5, lơ̆m hmư̆ hing jơlan weh anet mrô 189 /1 Mai hắc Đế, anih gơñu dŏ hơmâo mơnuih ƀă Covid 19, ñu bơngơ̆t biă mă. Samơ̆, lơ̆m hmư̆ ƀing apăn bruă amăng phường nao pơtô lăi, laih anun ngă tui djơ̆ tơlơi pơtrun mơ̆ng kơnuk kơna pơhlôm pơgang klin, ñu hơđong pran jua hăng đăo kơnang kơ hơdră kơnuk kơna pơhlôm pơgang klin kiăng anăm brơi ƀă lar hyu pơ anih pơkŏn. Hơdôm hrơi ngă tui tơlơi pơtrun guang dar ƀu brơi tơbiă đuăi mơ̆ng sang anŏ, ñu ngă tui djơ̆ tơlơi pơtô lăi, hơdră pơtrun pơhlôm pơgang klin, pơgang drơi jăn pô hăng mơnuih jum dar. Mah ƀu hơmâo nao mă bruă ôh hơdôm hrơi rơgao, hơmâo tơlơi djru mơ̆ng lu anom bruă, mơnuih ƀôn sang hăng gong gai kơnuk kơna, tơlơi hơdip mơda sang anŏ, dua amĭ ană ñu ăt hơđong ƀiă mơ̆n, ƀu hŭi kơƀah mơnong ƀông huă ôh rĭm hrơi.

“Hrơi brơi dŏ pơčlah truh 21 hrơi, gơmơi dŏ amăng sang anŏ ƀu tơbiă hyu ôh, tơnap tap biă mă samơ̆ hơmâo gong gai kơnuk kơna djru ba lu biă mă. Gơmơi tŭ mă braih, asơi hăng lu gơnam ƀong huă pơkŏn”.

Amăng mrô 47 boh sang anŏ mơnuih ƀôn sang dŏ ƀơi kual jơlan weh anet mrô 189/1 Mai Hắc Đế, hơmâo 20 boh sang anŏ, hăng 47 čô mơnuih, jing ƀing mơnuih mơ̆ng anih pơkŏn nao dŏ apah anih dŏ, mă bruă apah amăng 4 boh sang brơi apah dŏ. Lu kơ ƀing anai, mơnuih hyu mă bruă apah soh ƀu hơđong ôh, prăk pơhrui glăi djơ̆ hrơi hơmâo, djơ̆ hrơi soh, gơñu ƀu nao mă bruă lĕ, ƀu hơmâo prăk yua rĭm hrơi ôh, bơwih bơwăng kơ tơlơi hơdip mơda rĭm hrơi.

Mơnong ƀong huă jao tơl tơngan mơnuih ƀôn sang anih guang dar

Yua kơ anun, gơñu, hơmâo tŭ mă anugn điơ̆, ƀuăn añăm mơguah arăng djru, ƀudah gơnam ƀong huă amăng tlam, arăng ba nao, yua ƀing mơnuih čơmah, thâo khăp pap djru, yom pơphăn tloh noh yơh. Yă Đặng Thị Liệu, mơnuih apah anih dŏ amăng kual arăng guang dar hĭ anun lăi, 3 hrơi hăng anai, hơmâo tơlơi djru hmao kru mơ̆ng khua mua plơi pla, anih dŏ, sang anŏ gơñu huăi bơngơ̆t kơƀah mơnong ƀong huă ôh, tơlơi djru hmao kru mơtam rĭm hrơi.

Ñu ƀuh pran jua, mưn amăng lăm adih pơđao biă mă, yua hơmâo mơnuih čơmah, khua mua amăng kơnuk kơna hăng ană plơi pla ieo gah djru ba mơnuih ƀôn sang dŏ amăng anih guang dar hĭ.

“Yua kơ hơmâo lu mơnuih čơmah, khul grup, gong gai kơnuk kơna djru gơmơi dưi găn rơgao hĭ amăng mông tơnap tap anai. Ƀing gơmơi ăt kơnong thâo bơni kơ abih bang đôč yơh”.

Yap truh lơ 15/5, Jơnum min mơnuih ƀôn sang phường Tân Thành hơmâo tŭ mă 30 klăk prăk, prăk mơta, 300 kg braih, 100 kơthung mì tôm, rơbêh 2 tă añăm asăt hăng lu gơnam djru pơkŏn lêng kơ mơnong ƀong huă soh.

Amai Vũ Thị Mai Tuyên, Khua khul đah kơmơi grup mrô 10, phường Tân Thành brơi thâo, hơdôm mơta gơnam djru anai, hơdôm hrơi rơgao, Khul đah kơmơi hơmâo ngă hrom Jơnum min mơnuih ƀôn sang phường hăng djop khul grup pơkŏn nao ƀơk gơnam tơl anih dŏ ƀing arăng guang dar anun.

Mơnong ƀong huă či kiăng biă mă hơmâo pơpha, dưm amăng anung bơkơnar hlâo kơ jao brơi tơl rĭm tơngan mơnuih ƀôn sang amăng anih guang dar hĭ

Tui hluai mơnong ƀong huă arăng djru, Khul amra pơpha brơi ƀing hlăk ai pơyơr pran jua, nao pơpha brơi sa anung sa anung kơ rĭm sang anŏ. Hăng añăm pơtam dŏ asăt laih anun boh troh, hơbơi pơtơi lĕ ƀing hlăk ai pơyơr pran jua hlong pơpha tơl sang, hơdôm gơnam ƀong huă pơkŏn thâo răk lui sui ƀiă pơpha bơkơnar.

“Truh ră anai djop sang anŏ mơnuih ƀôn sang dŏ pơ anih guang dar ăt hơđong ƀiă laih tơlơi hơdip mơda. Hrơi blan brơi guang dar amăng 21 hrơi anun yơh kiăng hơmâo lu tơlơi djru hrom mơ̆ng khul mơnuih mơnam, djru kơ mơnuih ƀôn sang dŏ pơ ƀut jơlan weh anet 189/1 Mai Hắc Đế anai. Hăng tơlơi gơgrong ba mơ̆ng pô ƀu lui kơ sang anŏ pơpă ôh kơƀah mơnong ƀong huă ăt kah hăng gơnam yua rĭm hrơi”.

Tơlơi đing nao mơ̆ng gong gai kơnuk kơna phường, tơlơi djru hrom sa pran jua mơ̆ng lu mơnuih čơmah, djru kơ mơnuih ƀôn sang dŏ amăng anih guang dar ƀu brơi tơbiă hyu pơ anih pơkŏn yua kơ hŭi ƀă hyu kman klin, gơñu ăt hơđong pran jua mơ̆n dŏ ha dơnong amăng sang anŏ abih 21 hrơi hrup hăng dŏ krư̆ kơđol. Mơ̆ng anun djru pran kơtang, kiăng gơñu găn rơgao hĭ tơlơi tơnap tap amăng tơlơi hơdip mơda laih anun hrom hơbit pơtrut đuăi, puh đuăi klin kheng mơ̆ng plơi pla dêh čar ta.

Nam Trang pô čih- Nay Jek : Pơblang