VOV4.Jarai-Hăng hơdră kiăng ngă “hră pơar rơkâo dơ̆ pă pơsir dơ̆ anun”, tơring čar Dak Lak hlăk gir run pok pơhai jơlan hơdră djru mơnuih ngă bruă sĭ mơdrô hăng mơnuih mă bruă apah bưp tơlơi tơnap tap yua klin Covid 19. Yua kơ anun, truh ră anai, hơmâo giăm 3000 anom bruă hăng rơbêh 50.500 čô mơnuih ƀôn sang dưi tŭ mă tơlơi djru mơ̆ng jơlan jơdră anai tui Hră pơtrun 68 kơnuk kơna.

Tơdơi kơ ngă giong hră pơar rơkâo tui tơlơi pơtô brơi mơ̆ng anom bruă pơhlôm nua mơnuih mơnam tơring čar Dak Lak, kông ty pơčruh ngăn pơsơi Đông Nam Á, ƀơi anih tuh tia pơkra ming Hoà Phú, plơi prong Ƀuôn Ma Thuôt, tơring čar Dak Lak hơmâo pơhrŏ ƀiă rơnoh prăk pơhlôm nua truh 200 klăk prăk. Anai lĕ rơnoh prăk ƀiă bơkơnar hăng 0,5% rơnoh prăk khom pơčruh prăk pơhlôm nua hơmâo tơlơi truh lơ̆m mă bruă, pơhlôm nua duăm ruă lơ̆m mă bruă kơ 600 čô mơnuih mă bruă amăng 1 thun, yap mơ̆ng blan 7 thun anai truh abih blan 6 thun tơdơi.

Yă Lê Thị Tuyết Hạ, Kơ-iăng khua phun  kông ty brơi thâo, mah ƀu lu lơi samơ̆ jơlan hơdră djru anai jing pran kơtang pơtrut pran jua, kah pơpha amăng mông tơnap tap gleh glar kơ sang bruă gơñu hrơi mông anai.

"Rơnoh prăk blan gah kông ty gơmơi lĕ 3 klai rĭm blan, lơ̆m hơmâo rơnoh pơhrŏ hĭ ƀiă 0,5% jing dưm dưm hăng 15 klăk prăk sa blan. Ră anai, prăk djru mơ̆ng Hră pơtrun 68 gah kông ty pok pơhai blơi gơnam yua gah ia jrao, gơnam yua pơhlôm pơgang klin hăng pơgang tơlơi suaih pral, gum ba tơlơi hơdip mơda mơnuih mă bruă, ƀing ngă kông ñơn, djru rơnoh prăk yua amăng kông ty hrơi blan tơnap tap djơh hăng anai''.

Ƀơi anăp kơ tơlơi tơnap tap mơ̆ng tal klin Covid 19 tal 4 anai ngă, plơi prong Ƀuôn Ma Thuôt, tơring čar Dak Lak lu wơ̆t laih ngă tui hơdră pơčlah mơnuih mơnam tui hră pơčrâo mrô 16, hră pơčrâo 15, 15+ ( pơgôp). Lu sang bruă sĭ mơdrô khom pơdơi bruă mă, pơkra ming hăng sĭ mơdrô ƀudah ngă tui hơdră mă bruă pơkŏn tui hluai tơlơi gêh găl kiăng pơgang klin. Bruă mă hăng prăk pơhrui mơ̆ng mơnuih mă bruă apah bơbeč yua soh. Rơnoh prăk djru mơ̆ng Hră pơtrun 68 hơmâo djru kơ sang bruă sĭ mơdrô hăng mơnuih mă bruă apah plai ƀiă kơƀah, kiăng pơtrut pran jua gơñu mă bruă hơđong hloh.

Anom bruă pơhlôm nua mơnuih mơnam tơring čar Dak Lak djru anom bruă sĭ mơdrô, mơnuih mă bruă pơdơi hĭ bruă mă ƀudah pơdơi pơčruh prăk pơhlôm nua kiăng tŭ mă tơlơi djru Hră pơtrun 68

Ayong Trần Trung Tiến, mơnuih mă bruă amăng kông ty pơčruh ngăn Pơsơi Đông Nam Á, pơ anih tuh tia pơkra ming Hòa Phú, plơi prong Ƀuôn Ma Thuôt, tơring čar Dak Lak brơi thâo:

“Lơ̆m hơmâo klin ƀă kơtang mah bruă mă pơkra ming hrŏ ƀiă laih anun prăk pơhrui ăt trun mơ̆n. Samơ̆ khua mua amăng kông ty đing nao biă mă kơ mơnuih mă bruă apah ƀong prăk blan hăng ĕp lu hơdră, mơta sa djru prăk ƀong huă lơ̆m dŏ glăi mă bruă, djru prăk ia săng rơdêh nao rai mă bruă tăp năng ĕp brơi anih dŏ giăm anih mă bruă, kiăng huăi glăi pơ sang anŏ hŭi ƀă klin ƀudah tơbiă đuăi mơ̆ng anih hŭi rơhyưt, kual hlăk hơmâo klin kiăng ƀing mă bruă ăt dưi mă bruă hơđong amăng kông ty”.

Tui hăng ơi Nguyễn Khắc Tuấn, Khua anom bruă Pơhlôm nua mơnuih mơnam tơring čar Dak Lak, ngă tui jơlan hơdră djru tui Hră pơtrun 68, anom bruă pơhlôm nua mơnuih mơnam tơring čar Dak Lak, ngă tui bruă pơhrŏ ƀiă rơnoh prăk pơčruh pơhlôm nua pơgang bruă mă hăng duăm ruă yua kơ bruă mă, kơ giăm 3 rơbâo boh sang bruă sĭ mơdrô prong hơmâo apah truh kơ 44 rơbâo čô mơnuih mă bruă. Rơnoh prăk djru 13 klai. Pơdơi jăng jai pơčruh prăk pơdơi abih thun bruă pơdơi lơtret hăng prăk djru djai brŭ kơ 4 boh sang bruă sĭ mơdrô giăm 800 klăk prăk. Anom bruă gơmơi ăt jing sang bruă pơsit brơi anom bruă sĭ mơdrô hăng mơnuih mă bruă apah pơdơi hĭ yua klin ngă ƀudah pơdơi pơčruh prăk pơhlôm nua jăng jai samơ̆ amra ƀu tŭ mă prăk rơngiă bruă pioh djru mơ̆ng Hră pơtrun 68.

Truh ră anai, bruă pok pơhai Hră pơtrun mrô 68 ƀơi anom bruă pơhlôm nua lĕ gêh găl hăng amuñ amĕ. Yua kơ anun, mơnuih mă bruă apah hăng sang bruă sĭ mơdrô apah mơnuih mă bruă huăi rơngiă lu mông ôh sit nao ngă hră pơar.

“Amăng bruă pok pơhai anai gơmơi tŭ ư ngă hrom mơ̆ng gơnong dlông truh pơ tơring čar, brơi ngă tui jơlan hơdră mơ̆ng kơnuk kơna hăng khua mua gơnong bruă. Anom bruă pơhlôm nua mơnuih mơnam Việt Nam git gai djop sang bruă lơ̆m sa hrơi khom pơsit brơi kơ mơnuih mă bruă apah hăng sang bruă sĭ mơdrô djop laih hră pơar lĕ, anom bruă pơhlôm nua mơnuih mơnam tơring čar Dak Lak, gơmơi git gai mơtam brơi mơ-it abih hră pơar anun kơ anom bruă pơhlôm nua kơnong amăng sa mông khom pơsit giong hră pơar kơ anom bruă sĭ mơdrô pioh ngă gêh găl kơ mơnuih mă bruă apah hăng sang sĭ mơdrô tŭ mă tơlơi djru tui jơlan hơdră mơ̆ng Hră pơtrun mrô 68”.

Ơi Nguyễn Quang Thuân, Kơ-iăng khua gơnong bruă wai lăng Bruă mă Tơhan rơka hăng Mơnuih mơnam tơring čar brơi thâo, truh ră anai ƀơi Dak Lak hơmâo ngă tui 9/11 khul jơlan hơdră djru tui boh yôm phun Hră pơtrun 68. Amăng anun, hơmâo 3 bruă mă phun dưi pok pơhai klă jing jơlan hơdră pơhrŏ rơnoh prăk pơčruh prăk nua pơgang tơlơi truh lơ̆m mă bruă, pơjrao duăm ruă yua kơ bruă mă; jơlan hơdră pơdơi jăng jai pơčruh prăk lơtret hăng prăk djru kơ djai brŭ, jơlan hơdră djru kơ mơnuih mă bruă gah tơlơi adoh suang hăng ƀing ba hyu tuai čuă ngui.

Rơnoh prăk djru mơ̆ng Hră pơtrun 68 hơmâo djru kơ anom bruă sĭ mơdrô hơmâo ƀiă prăk djru glăi kơ mơnuih mă bruă apah pơtrut pran jua  hơđong mă bruă

Ră anai, Gơnong bruă wai lăng Bruă mă Tơhan rơka hăng Mơnuih mơnam hlăk pok pơhai lu hơdră pơtrut pơtô pơblang, lăi pơthâo jơnum min mơnuih ƀôn sang tơring čar jao tơlơi dưi djru hơdôm tơring glông, plơi prong hăng plơi prong phun pơhlôm djop hrơi blan, hơdră ngă bruă, boh yôm phun laih anun djơ̆ mơnuih kiăng djru ba. Laih dơ̆ng, Gơnong bruă anai akŏ pơjing grup mơnuih hyu mă bruă pioh krăo lăng, pơtrut hăng ngă tui hră pơtrun 68 pơ kual plơi pla.

“Kiăng ngă klă hloh bruă mă anai pơ anăp, Gơnong bruă hơmâo pơčrông sai, ngă hrom hăng Gơnong bruă Tơlơi pơhing-Pôr pơthâo, djop gơnong bruă pơkŏn, biă mă ñu djop tơring glông brơi kơtưn pơtô hơdôm khul mơnuih djơ̆ anăn djru prăp lui ngă hră pơar, djơ̆, djop, pơtô brơi ƀing anai thâo hluh tong ten tơlơi dưi gơñu tŭ mă anŏ djru mơ̆ng hơdră anai”.

Hăng anăp ngă “hră pơar rơkâo dơ̆ pă pơsir dơ̆ anun, ƀu lui mơnuih ƀôn sang hăng anom bruă sĭ mơdrô dŏ tơguan ôh”, ră anai, djop gưl, anom bruă tơring čar Dak Lak hlăk kơtưn ngă hrom jŭ yap glăi, čih anăn pioh ngă tui hơdră djru kơ mơnuih mă bruă apah hăng mơnuih apah mă bruă djơ̆ hăng tơlơi phiăn. Tơlơi pơtrun djru khom hmao kru, djơ̆ pô, pơhaih tong ten, rơđah rơđong, ƀu dưi dŏ ƀong kông ngăn kơnuk kơna djru.

    H’Xíu H’Mốc-pô čih: Nay Jek –pơblang