VOV4.Jarai - Tlam lơ 9/9, Khua Jơnum min mơnuih ƀon sang tơring glông Ea H’leo, tơring čar Dak lăk brơi thâo glăk ngă hrŏm hăng anom bruă ia jrao tơring čar lơ̆m ƀuh dua čô kơhnâo mơnuih dêh čar tač rơngiao nao pơ tơring glông pơkra apui lơtrik pơkĕ hăng jua angin ƀă kman SARS-CoV-2. Tui hăng ơi Nguyễn Văn Hà, Khua Jơnum min mơnuih ƀon sang tơring glông Ea H’leo, lơ 6/9, ƀing kơhnâo dêh čar tač rơngiao hơmâo 6 čô mơng ƀon prong Hồ Chí Minh nao pơ tơring glông či pơkra apui lơtrik pơkĕ jua angin. Tơdơi kơ nao truh pơ tơring glông, wơ̆t 6 čô anai hơmâo ba pơčlah ƀơi sang jưh tuai, rim čô mơnuih dŏ anih phara. Lơ 8/9, Sang ia jrao tơring glông Ea H’leo pơčrang kman hmar lĕ ƀuh 2 amăng 6 čô mơnuih kơhnâo anai ƀă kman. Ƀing kơhnâo kơhnak anai hơmâo tlâ̆o 2 arăt vaccine pơgang Covid-19 laih, laih anun hơmâo dŏ pơčlah amăng 14 hrơi ƀơi ƀon prong Hồ Chí Minh. CDC Dak Lăk lăi, năng ai 2 čô anai huăi pơƀă klin kơ arăng lơi. Ră anai, hơdôm anom apăn bruă mơng tơring čar Dak Lăk hăng tơring glông Ea H’leo glăk ngă hră pơ-ar ba 2 čô kơhnâo anai nao pơjrao, laih dong, brơi hơdôm čô pơkŏn pơčlah tui tơlơi pơtrun.

Siu H’Mai: Pơblang