VOV4.Jarai-Tơring čar Dak Lak hlăk pok pơhai bruă ngă djru bơyan pơplông ƀơi 32 bit anih pơplông abih anih 12 thun 2021, hơmâo giăm 1000 čô hlăk ai tơdăm dra mut phung mă bruă. Tui hăng anom bruă khua wai lăng hlăk ai tơring čar Dak Lak, hơdră djru bơyan pơplông thun anai, pok pơhai tong ten, yua dah hơmâo mơnuih ƀă klin Covid 19.

Yua kơ anun, ƀing hlăk ai pơyơr pran jua amra djru kih rơmet, rơnăk, pruih ia jrao anih pơplông, pơtô lăi ngă tui djơ̆ tơlơi phiăn pơplông hăng pơgang klin Covid 19. Hrom hăng anun, kah hăng rĭm thun mơ̆n, hơdôm bruă ngă pơyơr pran jua ăt ĕp lăng anăn ƀing čơđai sang hră anih 12 nao pơplông, iâu pơthưr djru ba čơđai sang hră tơnap tap.

Biă mă ñu, bơnah tơlơi pơhing pôr anăn djru bơyan pơplông-Dak Lak amăng plăng facebook lăi pơthâo bruă djru, pok na nao brơi thâo kiăng pơtruh nao rai tañ hăng tơpă sit nik.

Nay Jek: Pơblang