VOV4.Jarai-Tơdơi kơ rơbêh 1 blan pok pơhai ngă tui hră pơtrun 68 mơ̆ng kơnuk kơna hăng Hră pơtrun mrô 23 mơ̆ng khua dêh čar kơ hơdră djru mơnuih mă bruă apah hăng mơnuih apah mă bruă bưp tơlơi tơnap tap yua klin Covid 19 ngă, truh ră anai, tơring čar Dak Lak djru giăm 49 rơbâo wơ̆t mơnuih tŭ mă giăng 18 klai 200 klăk prăk.

Tơring čar Dak Lak pok pơhai ngă tui ƀơi 8/11 khul mơnuih tui hăng tơlơi pơtrun. Ră anai, hlăk jŭ yap glăi hăng ngă tui hơdră djru kơ mơnuih hơmâo anăn tŭ mă tơlơi djru, jing ƀing mă bruă apah hăng mơnuih apah mă bruă laih anun sang anŏ sĭ mơdrô anet. Kơnong djru prăk kơ anom bruă apah mơnuih mă bruă pơtô hrăm bruă mă, aka ƀu hơmâo anom bruă pơpă ôh rơkâo djru.

Sa tơlơi gun prong hloh ră anai lĕ jŭ yap, pel ĕp glăi hơdôm ƀing hơmâo anăn djru. Dak Lak ră anai, hơmâo lu mơnuih ƀôn sang nao mă bruă pơ tơring čar pơkŏn glăi, lu tơring čar hlăk ngă tui hơdră pơčlah mơnuih mơnam anun aka ƀu jŭ yap djop. Samơ̆, tơring čar ăt gir run mơ̆n ngă tui hơdră djru mơ̆ng kơnuk kơna kiăng hmao kru, djơ̆ pô.

Nay Jek: Pơblang