VOV4.Jarai - Tơdơi kơ hơmâo sa čô mơnuih ƀă kman SARS-CoV-2 glăk dŏ mă bruă ƀơi Sang ia jrao tơring glông Lăk, anom bruă ia jrao tơring čar Dăk Lăk ngă hră pơtrun guang dar jăng jai Sang ia jrao tơring glông Lăk đah mơng pok pơhai ječ bruă pơhlôm pơgang klin. Hrŏm hăng guang dar Sang ia jrao tơring glông Lăk, Gơnong bruă ia jrao Dăk Lăk hyu hơduah tơña, brơi pơčkah, mă drah pơčrang kman abih bang ƀing dŏ đih pơjrao, pô wai lăng mơnuih duam ruă, wơ̆t hăng ƀing ơi ia jrao, mơnuih mă bruă amăng sang ia jrao mơng 7 mông lơ 2/7/2021 truh hrơi hơmâo tơlơi lăi glăi.

Ơi ia jrao mă drah pơčrang kman brơi ƀing duam ruă hăng pô sang mơnuih ruă amăng Sang ia jrao tơring glông Lăk.

Pơphun pruih jrao ƀơi abih bang anih amăng Sang ia jrao tơring glông Lăk amăng mlăm lơ 2/7 mơtăm. Pô ƀă kman SARS-Cov-2 lĕ điều dưỡng glăk ngă bruă ƀơi anih dŏ pơčlah mơng Sang ia jrao tơring glông Lăk. Pô anai lĕ F1 mơng pô ruă 15921.

Siu H’Mai: Pơblang