VOV4.Jarai - Kiăo tui tơlơi jak iâu mơng khul hlăk ai tơring čar, lu grup hlăk ai ƀơi Dak Lăk čih hră rơkâo nao djru ƀing ơi ia jrao, ling tơhan glăk dŏ pơ anih pơgang klin Covid-19. Ƀu hŭi glêh glar, tơnap tap ôh, ƀing gơñu gum djru bruă mă ƀơi anih dŏ pơčlah, djru ba bing ơi ia jrao hăng ling tơhan gum pơgang klin.    

Giăm 2 wơ̆t hrơi tơjuh djru bruă pơgang klin ƀơi anih dŏ pơčlah ha anih ƀơi Sang ia jrao tơring glông Krông Pač, amai Phan Ngọc Bảo Nhi, dŏ ƀơi să Hòa An, tơring glông Krông Pač, tơring čar Dak Lăk juăt laih bruă mă hơmâo buh na nao sum ao pơgang klin kleng khŏp, adai pơ-iă, hơjan tŭ mơn ăt dŏ buh đôč. Jing sa čô ơi ia jrao phrâo hrăm giong, yua hnun ñu hơmâo arăng kiăng djru khăm hăng mă drah pơčrang kman kơ ƀing phrâo glăi mơng anih hơmâo klin.

Mơng telephôn, amai Phan Ngọc Bảo Nhi ră ruai, lăng klin kheng ƀơi Dak Lăk kơtang, mơnuih ƀă kman jai hrơi lu, yua hnun ñu hlong čih hră rơkâo hăng čih mơ-it nao hlao pơ khua Gơnong bruă ia jrao Dak Lăk kiăng dưi djru tom ƀing adơi ayong glăk pơ anih pơgang klin. Tơdơi kơ anun, khua Gơnong bruă ia jrao hơmâo lăi glăi laih anun mơ-it hră mơng amai anai kơ anom bruă pơgang klin tơring glông kiăng dưm dăp bruă brơi ñu.

“Kâo lăng klin ƀơi Dak Lăk anai glăk hơđuh đĭ kơtang, mrô mơnuih ƀă kman jai hrơi lu, yua hnun kâo amuaih gum djru pơgang klin, djru ba ƀing ơi ia jrao, adơi ayong glăk pơgang klin, yua dah ƀơi Dak Lăk ăt kơƀah mơnuih ngă bruă mơn. Bruă hơmâo lu biă mă, glêh biă mơn. Samơ̆ lơ̆m mă bruă hrŏm hăng abih bang mơnuih ƀơi anai gum pơgang klin jing kâo mơ-ak amăng pran jua biă”.

Tơlơi čih mơng amai Phan Ngọc Bảo Nhi mơ-it kơ khua mua Gơnong bruă ia jrao Dak Lăk.

Bruă gum djru mơng ơi ia jrao Bảo Nhi ƀơi anih dŏ pơčlah.

Ăt jing pô djru bruă pơgang klin ƀơi anih dŏ pơčlah pơƀut hrŏm ƀơi Sang ia jrao tơring glông Krông Pač, bruă ngă rim hrơi mơng ayong Nguyễn Tấn Huy dŏ ƀơi thôn 2, să Tân Tiến, tơring glông Krông Pač lĕ djru ba hyu gơnam ƀơi hơdôm anih dŏ, kih rơmet amăng anih dŏ pơčlah. Ayong Nguyễn Tấn Huy ră ruai, ñu glăk hrăm thun tal 2, Sang hră gưl prong Khoa học Tự nhiên ƀon prong Hồ Chí Minh. Yua hơmâo klin, anun jing mơng blan 5 ñu pơdơi hrăm glăi pơ plơi pla. Lơ̆m Hlăk ai tơring glông Krông Pač lăi pơhmư̆ rơkâo mơnuih djru pơgang klin, hơmâo sang anŏ ñu brơi mơn, yua hnun ñu čih hră rơkâo laih anun hơmâo arăng brơi nao djru pơ anih pơčlah amăng rơbêh 1 wơ̆t hrơi tơjuh anai laih.

“Sang anŏ gơmơi pơmin hlâo laih, yua hnun hơmâo arăng hơduah ĕp mơnuih djru pơgang klin lĕ sang anŏ kâo brơi nao mơtăm, yua kiăng djru ba mơnuih ƀon sang. amăng anai lĕ bruă huăi hơmâo hơget tơnap lơi, samơ̆ yua glăk hơmâo klin jing ƀu hơmâo pơplih nao rai ôh. Ƀing gơyut tơdah kiăng nao lĕ djă ba djŏp gơnam yua, hơmâo pran jua lĕ dưi ngă bruă laih, mut rai pơ anai tơlơi hơdip ƀu tui hăng ta dŏ pơ sang ôh, dŏ dong ƀong huă hrŏm hơbit yua hnun hơmâo lu anŏ phara mơn”.

Ayong Nguyễn Tấn Huy hơmâo sang anŏ ba nao pơ anih dŏ pơčlah đah mơng djru pơgang klin.

Ayong Nguyễn Văn Hà, Khua Hlăk ai tơring glông Krông Pač brơi thâo, lơ̆m ƀơi tơring glông hơmâo mơnuih ƀă klin hăng akŏ pơdong anih dŏ pơčlah čơkă mơnuih mơng tơring hơmâo klin, hlăk ai tơring glông hơmâo pơplih bruă mă, kiăng ngă bruă pơgang klin Covid-19 hăng djru tơlơi hơdip mơnuih ƀon sang yơh hlâo. Hrŏm hăng djru ƀing tơnap tap, hlăk ai hơmâo iâu pơthưr mơnuih nao djru kơ ƀing ơi ia jrao pơgang klin. Tal blung a hơmâo 15 čô hlăk ai hơmâo arăng kĭ brơi hră laih anun brơi nao djru pơ anih pơčlah pơƀut ƀơi Krông Pač.

“Mơng hrơi pơphun iâu pơthưr, mrô ƀing hlăk ai čih hră rơkâo nao djru djơ̆ hăng tơlơi kiăng mơng khua mua Hlăk ai tơring glông. Ƀing gơmơi ăt ngă kiăo tui tơlơi phiăn mơn, mơng čih hră truh kơ sang anŏ kĭ brơi, plơ pla kĭ brơi, hơmâo anom bruă pơƀuh anăn. Bưp ƀơi anăp ƀing nao djru, pơhmư̆ lăng tơlơi gơñu kiăng, tơlơi gơñu ră ruai, laih anun akŏ pơjing grup mă bruă, jao kơ hơdôm anih hơmâo klin, či dưm dăp, jao bruă, pơtô brơi ƀing gum bruă klă hloh.

Ƀơi tơring glông Čư̆ Mgar, mơng rơnuč blan 7, kơnong kơ hơdôm hrơi lăi pơhmư̆ hyu ĕp mơnuih djru bruă, khua mua apăn bruă Hlăk ai tơring glông Čư̆ Mgar hơmâo mă lu hră rơkâo mut hrŏm grup “Anih pơgang klin ao mơtah”. Tui hăng ayong Y Wal Mlô, Khua hlăi ai tơring glông Čư̆ Mgar, tar ƀar tơring glông hơmâo akŏ pơdong glăi 18 grup pơgang klin buh ao mơtah 2 gưl tơring glông hăng să hăng 280 čô mơnuih djru bruă pơgang klin, prăp lui anih anom kơ anih dŏ pơčlah. Hơjăn grup ƀơi tơring glông hơmâo čơkă mă 50 pok hră rơkâo djru bruă mơng hlăk ai. Tơring glông hơmâo čih anăn, pơtŏp bruă, prăp lui djŏp tơlơi pơgang klin, tơlơi ngă bruă kiăng rơnuk rơnua kơ ƀing nao djru. Laih dong pơhiăp tom hăng anom bruă pơgang klin gưi tơring glông dăp brơi bruă mă lăp djơ̆ kơ hơdôm grup.

“Lu ƀing hlăk ai tơdăm dra thun aset đôč, đa phrâo hrăm giong anih 12 rơkâo nao pơgang klin ƀơi tơring glông. Pran jua hur har, khin hơtai ngă bruă, glăm ba bruă tơnap, bruă phrâo mơng ƀing hlăk ai tơdăm dra lăi hrŏm hăng mơng hlăk ai ƀơi tơring glông Čư̆ Mgar lăi hơjăn lĕ hơmâo pơtrut tui. Tơlơi anun brơi ƀuh tơlơi gơgrong bruă mơng hlăk ai amăng bruă gum tơngan hrŏm hăng ping gah, gong gai amăng bruă pơgang klin”.

Hlăk ai djru pơdŭ gơnam brơi mơnuih ƀon sang pơ anih dŏ pơčlah.

Hăng tơlơi pơmin “ƀu nao djru bruă amăng mông anai lĕ hơbin mơng nao dong”, lu hlăk ai tơdăm dra ƀu hŭi kơ glêh tơnap čih anăn rơkâo nao djru pơ anih glăk hơmâo klin Covid-19. Ƀu hŭi kơ hrơi mlăm, pơ-iă hơjăn, hrŏm hăng adơi ayong pơkŏn, hlăk ai Dak Lăk glăk gir ngă bruă hăng pran jua ngă bruă hur har, ngă bruă rơđah rơđông kiăng dưi gum tơngan pơgang klin.

H'Xíu: Čih - Siu H'Mai: Pơblang