VOV4.Jarai-Ƀơi tơring čar Dak Lak ră anai, hơmâo giăm 4000 čô đah kơmơi ngă bruă ia jrao, ƀing  nai ia jrao hăng ơi ia jrao. Amăng bruă pơkơdong blah glăi hăng klin Covid 19, dong ƀơi anăp hăng tơlơi hŭi rơhyưt, mơ̆ng hơdôm ƀing ngă bruă ĕp lăng pơčlah mơnuih mơnam amăng plơi pla, ƀudah amăng mông dŏ bruă mă ia mơdung, ia khak pioh ba pơčrang kman, ƀơi anŏ dŏ pơjrao ƀing ƀă kman Covid 19 hlăk duăm ruă….gơñu hơmâo pơyơr pran jua, tơlơi pơmin, ba glăi boh tŭ yua, lui hĭ tơlơi mơak, bruă mă amăng sang anŏ, kjăp pran jua djru mă bruă pơ anih pơgang klin hŭi rơhyưt.

Glăi pơ sang yơh tơdơi kơ 1 blan pơyơr pran jua nao pơ ƀôn prong Hồ Chí Minh pơgang klin Covid 19, ơi ia jrao Trần Thị Lệ, anom pơjrao Bơbrah blong kô, sang ia jrao prong Kual Dap Kơdư, ăt aka ƀu abih ôh tơlơi hŭi dŏ pơmin na nao anŏ ñu ƀuh hăng bruă ngă lơ̆m pơjrao klin kheng. Anih ñu mă bruă amăng kual dŏ pơjrao mơnuih duăm ruă ƀă kman Covid 19 jing anih pơjrao tơlơi ruă ƀă kman, sang ia jrao prong Chợ Rẫy.

Dŏ bơngơ̆t kơtang biă sit hmư̆ telephôn iâu nao, pran jua ol kơdol lăi glăi hăng sang anŏ mơnuih duăm ruă ƀă covid 19

Bruă ngă ječ ameč mơ̆ng ƀing ơi ia jrao, gir run sua glăi tơlơi hơdip rơpih thĕr ƀiă či djai mơ̆ng mơnuih duăm ruă, hmư̆ dơnai suă jua tơnap tap, kah hăng jua hran mơ̆ng mơnuih ruă hrom hăng jua mơñi mơ̆ng măi djru suă jua kit kit Ecmo mơñi kah hăng črăn hrĕ phim čơkul dŏ dar pơdah tui ƀơ ƀrư̆ rơnang blan pơƀuh, ñu ră ruai glăi:

“Tơlơi hŭi răm ƀăm hơmâo na nao rĭm hrơi, rĭm čô mơnuih djai lơ̆m mông gơmơi hlăk gir run pơjrao brơi, kiăng sua glăi tơlơi hơdip tui anun, amăng pran jua hơmâo tơlơi pơmin phara biă mă, tơlơi hning rơngôt đĭ trun amăng lăm hơtai boh, samơ̆ gơmơi gir run abih pran jua, tơdah ƀuh mơnuih ruă kraih tui laih, ta ƀu hơmâo tơlơi gir run ôh lĕ, hiư̆m dưi bong glăi kjăp kiăng pơjrao kơ mơnuih duăm ruă, tơdah ta tơdu pran jua sit mơ̆n hơdră pơjrao amra ƀu tŭ yua ôh.

 Rơngiao kơ bruă pơjrao, gơmơi dŏ ngă hrom wai lăng ƀing duăm ruă suaih laih hăng dŏ giăm biă mă hrom ƀing gơñu, mông anun ƀu hơmâo tơlơi dŏ pơ ataih nao rai dơ̆ng tah hăng mơnuih ƀă klin covid.

Ƀơi anŏ hmư̆ mơnuih mơ̆ng sang anŏ pô ruă dŏ pơ rơngiao pơhiăp telephôn kơ nai ia jrao, lăi pơthâo mơnuih ruă dưi hơdip hă ƀudah djai, ƀing ơi ia jrao djă telephôn ăt ol kơdol pran jua ƀu truh pơhiăp ôh, tuč rơnuč ăt khom lăi tơpă mơ̆n tơlơi hơgĕt hlăk truh".

Amai Trần Thị Thu Thủy dăp hĭ gơnam yua mă bruă hlâo kơ nao mă ia khak, ia mơdung pơčrang kman

kơ mơnuih ƀôn sang

Hăng amai Trần Thị Thu Thủy, mơnuih ngă bruă pơčrang kman duăm ruă gah anom bruă ia jrao plơi prong Ƀuôn Ma Thuôt ră ruai mơ̆ng blan 5/2021 truh ră anai, jing hơdôm hrơi tŏ tui lăp hơdor pioh biă mă yơh amăng bruă ngă, tơlơi hơdip mơda mơ̆ng ñu. Sang anŏ, ăt kah hăng hrơi blan dŏ mă bruă ñu lŭk pŭk abih, blư̆ blang đang kup yua kơ mut tơma hrom bruă pơjrao covid 19. Plơi prong hơmâo na nao lu mơnuih ƀă sa bit anih amăng kual plơi pla, laih anun mă ia khak, ia mơdung ĕp kman mơ̆ng abih bang ană plơi, ƀing gơñu khom ngă bruă wơ̆t hrơi mlam ƀu pơdơi ôh, tui kru ĕp mơnuih jĕ giăm hăng mơnuih ƀă kman:

“Gơmơi mă bruă hơtŭt ba mơtam, ƀu hơmâo mông pơdơi pơdă ôh. Sit khua mua iâu mông hơƀơi hrơi pơpă gơmơi tơgŭ nao mơtam yơh, bơ bruă amăng sang anŏ gơmơi dăp mă tơdơi”.

Phrâo toh hĭ sum ao hrôm drơi jăn pơgang klin hăng kleh hĭ bơnal gôm ƀô̆ ia jrao, tơdơi kơ 7 mông na nao mơtam dŏ buh gôm hrôm drơi jăn ƀô̆ mơta amăng labo, anih mă bruă pơčrang kman ĕp lăng klin sars-cov-2, amai Trần Thị Nguyên Hằng mơnuih mă bruă amăng Anom ĕp kman duăm ruă, lăng rup tơlơi ruă amăng drơi jăn mơnuih, gah Sang bruă ĕp kman duăm ruă tơring čar Dak Lak buh glăi yơh sum ao, truă bơnal gôm ƀô̆ hăt he biă mă, yua dah hơmâo tơlơi pơthâo lăi, kiăng pơčrang kman tañ arăng phrâo ba nao:

“Ngă bruă amăng anom ta dŏ mă bruă sit mơ̆n ăt thâo ƀơi anŏ mă bruă krong mơta jĕ dah krah mlam ƀu pơdơi ôh, ngă bruă djơh hăng anun sit yơh bơbeč djơ̆ kơ tơlơi suaih pral pran jua ta samơ̆ ƀuh lu mơnuih pi ană anet glăi mơ̆ng ataih, brơi sem lăng kman hlâo či glăi dŏ pơčlah pơ sang anŏ, ƀuh gơñu tơnap tap biă mă, hơjan angin, rơbŭ kơthel hai đĭ rơdêh thut jơlan ataih, mơmŏt mlam pap biă mă, jai kraih pran jua ta kơtưn ngă bruă kiăng giong bruă, bruă amăng sang anŏ ta pô lui raih pơ klôn đôč yơh.

Ta pơmin anŏ pơsăn drơi jăn pran jua ta tui anun, kiăng pơgang tơlơi rơnuk rơnua kơ abih bang mơnuih hiư̆m ngă khom gir run baih lah”.

Ayong Nay Phila, Khua Gơnong bruă ia jrao tơring čar Dak Lak brơi thâo, ră anai, mơnuih ngă bruă amăng gơnong bruă ia jrao tơring čar hơmâo 6000 čô, amăng anun 60% lĕ đah kơmơi. Amăng tal blah glăi klin Covid 19, ƀing nai ia jrao đah kơmơi, ƀu kơnong rơgơi amăng bruă ia jrao, sơ̆n pran jua đôč ôh, dŏ jing sa bruă mă ƀuh rơđah gơñu hơmâo pran jua rơ-un, mă bruă tong ten wai lăng mơnuih duăm ruă.

Ƀing đah kơmơi hrơi nai ia jrao Anom ĕp kman duăm ruă, lăng rup drơi jăn mơnuih ruă, sang bruă ĕp lăng kman duăm ruă tơring čar Dak Lak mă bruă hrơi mlam amăng anih dŏ sir krĕp

Yua hơmâo gơñu yơh, hơdôm mơnuih arăng mă ia khak, ia mơdung ba pơčrang kman, ƀing mơnuih duăm ruă dưi pơgang ba, pơjrao djơ̆ hnong, ƀuh abih bang hơđong pran jua, jĕ giăm biă mă. Hơdôm hrơi blan dŏ mă bruă pơgang klin Covid 19 hăng ƀing đah rơkơi tơnap tap laih, hăng ƀing đah kơmơi jai kraih tơnap tap hloh:

“Lơ̆m ƀing đah kơmơi hrơi ngă hrom bruă pơgang klin ƀiă lu ăt bơbeč yua soh yơh tơlơi dŏ dong ƀong huă rĭm hrơi mơ̆ng gơñu. Kah hăng lui raih hĭ abih bruă pưk sang pơ klôn, bruă čem rông ană bă yua khom nao pơtum pran jua kơ bruă pơgang klin, anai yơh bruă ngă lăp hơdor pioh lăp pơpŭ bơni biă mă kơ ƀing adơi amai đah kơmơi hrơi.

Pơ anăp anai, anom bruă ia jrao amra hơmâo hră mơ-it iâu pơthưr djop anom bruă, mơnuih mơnam hơmâo bruă ngă kiăng pơtrut pran jua  ngă mơak hrom ƀing adơi amai đah kơmơi gah bruă ia jrao. Yua tal anai, lu adơi amai kah hăng pơsăn drơi jăn pran jua sang anŏ gơñu pô khom djru lu bruă pơgang klin Covid kiăng ba glăi tơlơi rơnuk rơnua kơ ană plơi pla”.

Amăng tal blah glăi hăng klin Covid 19 tơnap tap, hŭi rơhyưt sui hrơi, hơdôm ơi ia jrao, nai ia jrao ăt hrơi mlam gir run, pran jua, kjăp tơlơi pơmin pơ anih mă bruă kơsung nao pơ anăp hrom hăng lu khul ling tơhan kơnuk kơna ngă bruă kiăng puh pơđuăi hĭ klin kheng, ba glăi tơlơi hơdip mơda rơnuk ngă sang rơnang ngă hmua kơ ană plơi pla ala ƀôn.

Nay Jek: Pơblang