VOV4.Jarai - Tui hăng Anom git gai pơgang klin Covid-19 tơring čar Dak Lăk, amăng lơ 12/8, tar ƀar tơring čar hơmâo dong 12 čô mơnuih ƀă klin Covid-19. Pơđĭ tui mrô mơnuih ƀă kman amăng tơring čar lĕ 476 čô. Amăng 12 čô mơnuih phrâo ƀă hơmâo 3 čô glăi mơng ƀon prong Hồ Chí Minh hăng tơring čar Đồng Nai. 9 čô dŏ glăi bơdjơ̆ nao ƀing ƀă kman hlâo kơ anun. Lăp đing nao hloh, hơmâo 3 čô mơnuih djơ̆ hrŏm hăng ƀing ruă ƀơi să Vụ Bổn, tơring glông Krông Pač. 2 čô mơnuih ƀă kman ƀơi ƀut sang dŏ hrŏm Hoàng Anh Gia Lai, phường Tự An, plơi prong Buôn Ma Thuột, bơdjơ̆ nao mơnuih ƀă kman ƀơi thôn 20, să Čư̆ Bông, tơring glông Ea Kar. Bơdjơ̆ nao 2 čô anai, anom bruă ia jrao hyu ĕp mơnuih jê̆ giăm hơmâo 15 čô F1, amăng anun hơmâo 2 čô F1 arăng pơčrang kman hmar lĕ hơmâo kman SARS-CoV-2. Amăng mlăm lơ 11/8, ƀing apăn bruă pơgang klin nao pơgăn anih dŏ hăng mă ia khak, ia dung pơčrang kman brơi mơnuih ƀon sang dŏ ƀơi anih Block C mơng ƀut sang Hoàng Anh Gia Lai.

Kual Block C, ƀut sang dŏ Hoàng Anh Gia Lai hơmâo pơgăn hlao amăng mlăm.

Anom bruă ia jrao test hmar brơi mơnuih ƀon sang ƀơi anih dŏ Block C ƀut sang dŏ Hoàng Anh Gia Lai.

Amăng lơ 12/8, anom bruă ia jrao Dak Lăk brơi hră kơ 20 čô mơnuih ƀă klin Covid-19 dưi glăi mơng sang ia jrao. Tui anun, truh mông anai, Dak Lăk hơmâo laih 74 čô mơnuih pơjrao suaih kman Covid-19 laih anun hơmâo tơbiă laih mơng sang ia jrao.

Siu H’Mai: Pơblang